1. Kuma Njambi Ikeye Ali Na Kutunenela Tuyando Ndi?

Bikwapwila kwa Seho Kuzibuka Cikumbululo

Banu babangi, bakasinganyeka ngwabo Njambi ikeye ali na kunena tuyando.

Bimunapande Kuzibuka

Bantwama ba bulombelo babangi bali na kulongesa ngwabo Njambi ikeye ali na kutunenela tuyando. Simbu imo bakalingi ngoco mu ngila ije kubasa kunanguka banu. Cakumwenako bamo bakendeka ngwabo:

• Bukalu bwa kulizila bunapu kashitiko ka kutunda kuli Njambi.

• Banike bakatsi mwafwa Njambi atonda tungelo babangi mwilu.

• Njambi akemanenena banu bamo mu binzita, bije bili na kuyandesa manene banu.

Kuma bantwama ba bulombelo bali na kulongesa bene banu makuli hali Njambi ndi? Tunapande kutaba bibali na kulongesa ndi?

Biyendeka Mbimbiliya

Njambi keti ikeye ali na kutunenela tuyando.

Kulinga ngoco kukulitombola na bifwa byendi bije bili mu Mbimbiliya. Cakumwenako:

‘Njambi wapwa wa kulongwa na busunga, akalingi mwamubwa na kusungama.’—KWITULUKA MU MASHIKO 32:4.

“Njambi kesi kulinga bubi nambe kamandondo, co Muka-nzili yoshe kesi kulinga bubi embwe.” —YOMBI 34:10.

“Muka-nzili yoshe . .kesi kulinga bubi ku munu.”—YOMBI 34:12.

Njambi ali na kubyana bulombelo buje buli na kulongesa makuli hali ikeye.

Obu bunapu bulombelo buje buli na kulongesa ngwabwo Njambi ikeye ali na kunena tuyando, na bulombelo buje bukalikobelesa mu nzita na lwozi.

“Baka-kwimanena bali na kwendeka makuli mu lizina lyange, kunjabatumine embwe, nameme kubana mashiko amo, nambe kwendeka lijwi limo kuli bakebo. Bimona bije bali kwambulula kubyesi na kutunda kuli yange, oloni binapu bimona byabo bya ngoco, . . . na biyongola byabo babenya.”—NJELEMIYA 14:14.

Yesu wapayele banu baje bakele na cibembulu.

“Kesi munu woshe anjitumbula ngwendi, ‘Mwene, Mwene’ akakobela mu Bumwene bwa mwilu embwe, oloni kubanga baje bakalingi cizango ca Tate wa mwilu. Ha litangwa lya Kusompa, babangi bakendeka kuli yange ngwabo, ‘Mwene, Mwene, mu lizina lyobe twambulwile muzimbu wa Njambi, co lalo ,mu lizina lyobe twatundisile minzinzime ya kujwala, co lalo mu lizina lyobe twalingile bizibukiso byabingi.’ Asinoni njikabakumbulula ngwange, ‘kunjimizibuka. Tundeni kuli yange, yeni bakakulinga byabibi.’” —MATEO 7:21-23.