5. Kuyanda Kukahwa Ndi?
Bikwapwila kwa Seho Kuzibuka Cikumbululo
Nga tukulahela ngwetu kuyanda kukahwa, co eli lilabelelo litukwasa kuyoya mu ngila yaibwa na kumona ngwetu Njambi watwaka mbunge.
Bya Kusinganyekesesa
Banu babangi bashaka kumanesa tuyando, oloni kubesi na nzili ya kumanesa tuyando twoshe. Cakumwenako:
Nameme kunawaniwa bingila bikwabo mwakusakela banu . . .
Mushongo wa mbunge anga uli na kutsiya manene banu.
Kansa ili na kutsiya banu babangi mwaka na mwaka.
Mu libulu lya Frontiers in Immunology, ndotolo wa lizina lya David Bloom wasonekele ngwendi, nameme kuli byemba byabiha byabingi, anga kucili mishongo yaingi ije kubasa kusaka bandotolo. Co lalo, banu bali na kubinja mishongo ikwabo yaiha na mishongo ije kubamwene banu ha simbu yailaha.
Nameme mafuti amo anafuku . . .
Banike babangi bali na kutsa mwaka na mwaka, maneneni mu mitambela muje muli manene buhutu.
Banu babangi bali na kuyoya mu myela ya kujwala.
Banu babangi, kubesi na kunwa mema a kujela.
Nameme banu bazibuka ngwabo kubapandele kulinga bakwabo mwamubi . . .
Muzimbu umo wa baka-United Nations, umwesa ngwawo, mu mafuti amangi bali na kulandesa banu, co simbu imo baka-fulumende kubesi kuzibuka ngwabo bali na kulandesa banu babo, nambe hamo bakonwa kwana kashitiko baje bali na kulandesa bakwabo.
LILONGESENI BYABINGI
Kengeni vidio ya Bumwene bwa Njambi Bwapwa Buka? ije ili ha jw.org/mck.
Biyendeka Mbimbiliya
Njambi watwaka mbunge.
Ali na kumona tuyando twetu, co katuyengwile.
“[Njambi] kesi kumbila kuti tuhutu, nambe kuyengula tuyando twabo, nambe kubakengesa nima, oloni abakumbulula omwo batambeka kuli ikeye mu kubakwasa.”—MYASO 22:24.
“Akeni bukalu bweni bwoshe hali ikeye omwo ikeye ali na kumilela.”—1 PETULU 5:7.
Tuyando tangwa tukahwa.
Mbimbiliya yakulahesa ngwayo byuma byayongwele kutulingila Njambi tangwa bikalishulisilila.
“Njambi . . . Akasikumuna misozi yoshe ku mesho abo. Co kukukakala kutsa, na busiwa nambe kulila nambe kukemanga.”—KUJOMBOLOLA 21:3, 4.
Njambi akanyongesa byuma byoshe bije bili na kuyandesa banu.
Akapangesa Bumwene bwendi mu kumanesa tuyando.
“Njambi wa mwilu akaka bumwene buje kubukahu. Na umo wahi akabufungulula. . . . Bukebwo bukakala myaka yoshe.”—NDANYELE 2:44.