Bika Bitukwasa Tujauke na Byuma Bituli Nabyo?

Pangeni na Nzili

‘Munu napande kupanga, ngeci ayoye mwamubwa ikeye babenya, co ase kukwasa lalo tuhutu.’—EFESO 4:28.

Njambi ashaka ngwendi tumone bipangi mu ngila yaibwa. Mwafwa bika? Munu uje apanga na nzili abwahelela mwafwa awana bya kulishuka na baka-naanga yendi, co asa kukwasako na bakwabo. Bakulunu bendi ku bipangi nabo bamona kulifwita kwendi. Ngeci, muka-kupanga na nzili kubasa kumutundisa bwasi bipangi. Mukemwo Mbimbiliya inendeka ngwayo kupanga na nzili kunapu “bwana bwa Njambi” ku banu.—Muka-kwambulula 3:13.

Pweni Baka-busunga

“Mwa busunga bene tuli na citakutaku cacibwa, omwo tushaka kulinga cuma ca busunga simbu yoshe.”—VAHEVELU 13:18.

Nga tulinga byuma mu busunga, kutulizibi ngwe tubangoco, tupwa ba kubwahelela, co lalo tulikuwa kulala tulo. Kutundaho, bakwetu batukulahela na kutusingimika. Oloni nga munu keti muka-busunga, banu kubamukulahela. Kutundaho, citakutaku cendi cimupaya, simbu yoshe alishoshomwena ngwendi hamo bilinga byendi bijomboloka.

Moneni Bimbongo mu Ngila Yaibwa

“Keti mukakateye mu cizemo ca bimbongo, pweni baka-kujauka na byuma bije muli nabyo.”—VAHEVELU 13:5.

Bimbongo byasa kutukwasa kulanda byakulya na byuma bikwabo. Nameme ngoco, kutwapandele “kukala na cizemo ca bimbongo.” Kuzema bimbongo kwasa kulingisa munu abiisile simbu yendi na nzili yendi ku kushakezeka bimbongo byabingi. Kwaka mbunge ku kushakezeka bimbongo kwasa kubiisa bulo bwa munu, kumwonowesa simbu ya kukala hamo na naanga yendi na kumulingisa ajeneke kulikangula mwamubwa ku mubila. (1 Timateo 6:9, 10) Co lalo munu uje wazema bimbongo asa kulikobelesa mu bilinga bimo byabibi. Mbimbiliya ngwayo: “Njambi abezikisa baka-kulongwa, oloni anyanyamesa boshe baje bashaka kufuka bwasi.”—Visimo 28:20.

Lilongeseni Bilongesa bya Seho Manene

“Nyunga mana obe na kuzibuka kwobe kwakubwa.”—VISIMO 3:21.

Kulilongesa kwasa kukwasa munu mu buyoye bwendi. Oloni kuya lika ku masikola a ku mubila kukulumbununa ngwabo tuwana byuma byoshe bitulingisa tupwe ba kubwahelela. Nga tushaka kulinga mwamubwa byuma na kupwa ba kubwahelela, tunapande kukala na mana a Njambi. Mbimbiliya ngwayo munu uje atolilila kuli Njambi ‘abezika mu byoshe byalinga.’—Myaso 1:1-3.