Pweni Vakuvwahelela mu Nanga
Vinanga vyatha kupwa vyakuvwahelela ndi?
Vyatha kuvwahelela vati?
Kuli vinanga vimo vimuthzivuka vije vyapwa vyakulikwatathana nakuvwahelela ngwe mumunamwena ha tilakiti eyi ndi? Vinanga vyavingi mu kaye vili nakulyangununa. Kuthsa kwa malo, kujeneka vipangi, vukalu vwakulela vana chithemi endi lika, kufutuka ku mbunge, vikevyo vili nakwangununa vinanga. Munu umo uje walilongetha manene vya nanga wendekele ngwendi: “Thimbu yino, vanu voshe vanatanekeya vyuma vili nakwangununa vinanga.”
Mwafwa vika vinanga vili nakulyangunwina ngachije mu thimbu yino? Twatha kupwa vati vakuvwahelela mu nanga?
Muyaputukile Nanga
Nga tushaka kukumbulula vihula vili helu, tunapande kuthzivuka muvwaputukile vulo na nanga. Vulo na nanga vyakala na munu waviputukile, Ishamatanga. Ngechi vanu mu nanga vanapande kutala kuli ikeye avatwamenene, mwafwa atanekeya vwino mutunapandela kupwa vakuvwahelela mu nanga.
Yesu Kilisitu wendekele ngwendi Ishe ikeye watangele munalume na munakathzi, cho lalo wendekele majwi avathonekele mu Lijwi lya Njambi kuthañulu, ngwendi: ‘Ngecivene, vaje vanapandakana Njambi, munu kesi avangunune.’—Mateo 19:4-6.
Yesu Kilisitu wendekele vuthunga. Njambi wa mana watangele vanu vakulivanga, cho wavwahethele ngwendi vapwe vakuvwahelela mu nanga. Njambi wanungile ava va munalume na munakathzi, cho wendekele ngwendi munalume ‘akalipandakana na munakazi wendi, co vakapwa muvila umolika.’ (Kushangumuka 2:22-24) Vukalu vutuli nakumona matangwa ano mu vinanga, vuli nakwija mwafwa vanu kuvethi nakukavangeya mashiko athoneka Ishamatanga mu Lijwi lyendi, Mbimbiliya.
Vyuma Muka Vyatha Kukwatha Nanga?
Ngechi mumwathzivukila, mu kaye matangwa ano, vanu vanaka manene kulutwe vyuma vivashaka vakevo vavenya. Munu umo muka-kukwatha vanu vimbongo walekele vaka-sikola ha chilika chakumanetha sikola yavo mu United States ngwendi: “Nuna yapwa yayivwa. Watha kukala na nuna nakulithziva vwino yove vavenya.” Oloni kutonda manene vufuko kuchatha kumikwatha. Kuthzema vufuko kunapu ngila yimo yakama yili nakunena vukalu mu nanga, mwafwa kuli nakuthsiya vushoko vwa vanu nakuvavihithila thimbu na vimbongo. Oloni tutaleni ha vithimo vivali vya mu Mbimbiliya vije vinatha kutukwatha tuthzivuke vyuma vyakama vije vituthzivitha kuvwaha.
“Mwamuvwa kulisa visapa-sapa ku njuvo kuje kuli cizemo, kutuvakana kulisa situ ya mazi ku njuvo kuje kuli cizindo.”
“Mwamuvwa kulya livanda lya kuma lya likende mu kwoloka, kutuvana kukala na ciwano mu njuvo muje muli lwozi.”
Evi vithimo vili na vinimbu vyavivwa, indi vati? Thinganyekeni mukatha kufwa kaye nga vinanga vyoshe vikavangeya omu muvinendeka evi vithimo! Mbimbiliya lalo yaleka vanu muvanapande kutumbamena mu nanga. Tuchitaleni ha mashiko amo a mu Mbimbiliya.
Vanalume: ‘Zemeni vanakazi veni ngwe mumukazeme mivila yeni vavenya.’—Efeso 5:28-30.
Eli linapu lishiko lyalyathi, oloni limikwatha manene! Mbimbiliya lalo yaleka munalume ‘kusingimika munakazi wendi.’ (1 Petulu 3:7) Munalume akathingimika munakathzi wendi hakumwaka mana, nakumutetela, nakumuthzivithitha, nakumumwetha chithzemo. Akamono vyuma vyendeka munakathzi wendi kupwa vyakulema, cho lalo akamutolilila. (Etheketheniko Kushangumuka 21:12.) Nga munalume alingila munakathzi wendi vyuma vyashaka ngwe omwo ikeye ashaka kumulingilavyo, cho nanga yitumbama vwino.—Mateo 7:12.
Vanakathzi: ‘Singimikeni vanalume veni.’—Efeso 5:33.
Munakathzi natha kulingitha nanga kupwa yakuvwahelela hakukwatha munalume wendi mangana apange vwino vipangi vyendi vya mu nanga. Omwo mukemwo mwayile vithinganyeka vya Njambi hakutanga munakathzi nakumwana kuli Andama ngwendi apwe “mukwasi wakulipanda nendi.” (Kushangumuka 2:18) Nanga yatha kupwa yakuvwahelela nga munakathzi athingimika munalume wendi hakukundwiya viyongola vyendi nakupangela hamo nendi mangana vawane vyuma vitondeka mu nanga.
Vaka-kulyambata: “Vanalume na vanakazi vanapande kupwa vaka-kulikulaela umo na mukwavo.”—VaHevelu 13:4.
Nga munalume na munakathzi valikulahela umo na mukwavo, nanga yitumbama vwino. Vupangala vukashandola nanga. (Visimo 6:27-29, 32) Ngechi Mbimbiliya yaleka vanalume ngwayo: “Vwaelela nakujolela na munakazi wove . . . Omwo vikajo uzemena munakazi wa mukweni?”—Visimo 5:18-20.
Vithemi: ‘Longeseni vana veni ngila ije ivanapande kwendela.’—Visimo 22:6.
Nga vithemi vaka mana ku vana vavo, cho kuyoya kwa nanga kupwa kwakuvwa manene. Ngechi Mbimbiliya yaleka vithemi valongethe vana vavo vingila vyavivwa ‘omwo vali mu vinjuvo vyavo, nambe omwo vali nakwenda mu ngila, nambe omwo vali nakuhwima, nambe omwo vali nakupanga.’ (Kwituluka mu Mashiko 11:19) Mbimbiliya yendeka lalo ngwayo vithemi vanapande kuthzema vana vavo nakuvanangula.—Efeso 6:4.
Vana: “Eni vanike, ononokeni kuli visemi veni muli Mwene.”—Efeso 6:1.
Eyo, kwononoka vithemi veni kwapwa kwakukalu mu kaye kano ka vanu vavilinga vyavivi. Ikeyeni mwatanekeya ngweni kulinga vyuma vyamileka uje waputukile nanga kunapu kwakuvwa manene kuli yetu ndi? Atanekeya vyuma vitwapande kulinga mangana tupwe vakuvwahelela mu nanga yetu. Ngechi ononokeni vithemi veni. Jenjukeni ku vyetheko vya mu kaye kano vije vimitwala kukulinga vyuma vyavivi.—Visimo 1:10-19.
Nga munu na munu mu nanga akavangeya viyendeka Mbimbiliya, cho nanga yoshe yitumbama vwino. Nanga yiyoya vwino mu thimbu yino, nakukayoya vwino lalo kulutwe mu kaye kakaha kanakulahetha Njambi. (2 Petulu 3:13; Kujombolola 21:3, 4) Ngechi lilongetheleni hamo Mbimbiliya na nanga yeni thimbu yoshe! Vinanga vyavingi mukaye koshe vinawana vukwathi vwakama manene mu livulu lya Jila Yakuwana Kuwahilila chaTanga mu muyati wa Luvale, nambe Sinotolo kwa Tabo ya Lubasi mu muyati wa Silozi.
Vithoneka vyoshe vinatundu mu Mbimbiliya ya Livulu lya Shukulu Kalunga, oloni vije vili na NW vinatundu mu Mbimbiliya ya New World Translation of the Holy Scriptures—With References.