Mumwathela Kulilongetha Vya Njambi

Mwatha kulilongetha vya Yehova mukutanda Mbimbiliya. Kuthañulu, Njambi wangwile vanu vamo vathoneke viyongola vyendi. Vije vithoneka vikevyo Mbimbiliya. Matangwa ano, tukalilongetha vya Njambi mukutanda Mbimbiliya. Mu Mbimbiliya mwakala majwi a Yehova, ngechi yapwa Lijwi lya Njambi. Twatha kukulahela viyendeka Mbimbiliya mwafwa Yehova kethi kukwitha. “Njambi kasa kwendeka makuli.” (VaHevelu 6:18) Lijwi lya Njambi lyapwa vuthunga.—Yowano 17:17.

Mbimbiliya yapwa vwana vwavuvwa vuje vwatwana Njambi. Mbimbiliya yapwa ngwe mukanda wanathonekela chithemi vana vendi. Ikatuleke vyuma vyakulahetha Njambi vyakutengulula kaye kupwa Palandaisi. Ikatuleke vyuma vyalingile kunima, nevi ali nakulinga thimbu yino, nevi vyakalingila vana vendi vakulongwa kulutwe. Ikatukwatha lalo mwakumanethela vukalu vwetu na mwakupwila vakuvwahelela.—2 Timateo 3:16, 17.

Vakaleho va Yehova vapwa vavuthamba va Njambi, ngechi vamikwatha kuthzivithitha viyalongetha Mbimbiliya. Valekeni ngweni mushaka kulilongetha Mbimbiliya. Kuvethi kufwetetha ha vilongetha evi. (Mateo 10:8) Mwatha lalo kuya ku viwano vya vaka-Kilisitu. Evi viwano vakavilingila mu vinjuvo vyakulemethela Njambi vivatumbula ngwavo Vinjuvo vya Vumwene. Nga muya ku viwano vya vaka-Kilisitu, cho muthzivuka vwathi vya Njambi.

Mwatha kulilongetha vya Njambi kwitila mu vyuma vyatanga. Mbimbiliya yendeka ngwayo: “Njambi watangele lilu na kaye.” (Kushangumuka 1:1) Omwo Yehova watangele “lilu,” watangele na litangwa. Echi chatuleka vika hali Njambi? Chatuleka ngwe Yehova wakala na ndthzili yakama manene. Ikeye lika atha kutanga chuma cha ndthzili ngwe litangwa. Chatuleka lalo ngwe Yehova wakala na mana, mwafwa wapangethele mana hakutanga litangwa, lije likatwana litanya na cheke, cho kulyethi kuthzima.

Vyuma vyatanga Yehova vyasholola ngwavo watuthzema. Achithinganyekeni ha vushuka vwakulithethza-thethza vwakala hano hathi. Yehova ngwe washakele, ngwe watwanene vushuka vwa muyati umo lika, nambe kutumina vushuka vwoshe. Oloni watwanene vushuka vwavwingi vwakulithethza-thethza. Echi chasholola ngwe Yehova wapwa Njambi wa chithzemo, muka-kwana, muka-kutwaka mana, cho lalo wapwa wa ngothzi.—Myaso 104:24.