Palandaisi Yili Muyehi!

Vyuma vyavivi vili nakulingiwa thimbu yino mu kaye, vili nakusholola ngwavo Palandaisi yili muyehi. Mbimbiliya yendekele ngwayo tukamona vyuma vyavikalu manene thimbu kanda Palandaisi yije. Evi vyuma tuli nakuvimona mu thimbu yino yituli nakuyoyamo. Vyuma vimo viyendekele Mbimbiliya ngwayo vikalingiwa, evi:

Vindthzita vyakama. “Lifuti limo likalwa nzita na lifuti likwavo, co vumwene vukalwisa vumwene vukwavo.” (Mateo 24:7) Vyuma vivendekele mu vupolofweto ovu, tuli nakuvimona. Kutunda mu mwaka wa 1914, kunakala vindthzita vivali vya kaye na vindthzita vyavindondo vyavingi. Vanu vavangi vanathsi mu vindthzita evi.

Kutuma kwa mishongo. Kukakala “mishongo yakulitambwisa kwoshe-ikwoshe.” (Luka 21:11) Eyi mishongo tuli nakuyimona ndi? Eyo. Mushongo wa kansa, na mushongo wa mbunge, na TB, na mushongo walithikathika, na AIDS, na mishongo yikwavo, yili nakwitula vanu vavangi manene.

Kujeneka vyakulya. Mu kaye koshe muli vanu vamo vaje kuvethi na vyakulya vyakupwamo. Mwaka na mwaka vanu vavangi vali nakuthsa ku njala. Echi chinapu chithzivukitho chikwavo chakutumwetha ngwavo Palandaisi ololo yija. Mbimbiliya yendeka ngwayo: “Kukakala . . . njala ya lyangengela.”—Mako 13:8.

Mandunduma. “Kukakala . . . mandunduma ku mitambela ya kuliseza-seza.” (Mateo 24:7) Mandunduma tuli nakuwathziva matangwa ano. Vanu vakutuvakana miliyoni yimo vanathsi ku mandunduma kutunda mu mwaka wa 1914.

Vanu vavavi. Vanu vakapwa “vaka-kuzema vimbongo” na “vaka-kulizema vakevo vavenya.” Vakapwa “vakakuzema manene senga kutuvakana kuzema Njambi.” Vana vakapwa “vaka-kujeneka kwononoka kuli visemi vavo.” (2 Timateo 3:1-5) Mutava ngweni kuli vanu vavangi vakufwa ngechi matangwa ano ndi? Kuvethi kuthingimika Njambi, cho lalo vali nakunenela vukalu vaje vashaka kulilongetha vya Njambi.

Vutothzi. ‘Vuvi vukatuma’ lalo. (Mateo 24:12) Mwatha kutava ngweni vutothzi vunatumu manene matangwa ano kutuvakana myaka ya kunima. Vanu mu kaye koshe vali nakuveva vyuma vyavo, nakuvakwitha, nambe kuvavulumuna.

Evi vyuma vyoshe vili nakusholola ngwavo Vumwene vwa Njambi vuli muyehi. Mbimbiliya yendeka ngwayo: “Omo mukamona vyuma evi vilingiwa, mukazivuka ngeci Vumwene vwa Njambi vuli muyehi.” (Luka 21:31) Vumwene vwa Njambi vwapwa vuka? Vwapwa fulumende ya Njambi ya mwilu yije yikanena Palandaisi hano hathi. Vumwene vwa Njambi vukayinga vifulumende vya vanu.—Ndanyele 2:44.