Vaka-ñole Va Njambi Veya?

Satana Liyavolo ikeye muka-ñole wakama wa Njambi. Wapwa munu wa kusipilitu uje watengulukilile Yehova. Satana natwalelelaho kulwitha Yehova, cho lalo ali nakunenela vanu vukalu. Satana wapwa muka-vuvi. Wapwa muka-makuli, cho lalo muka-kuthsiya vanu.—Yowano 8:44.

Vanu vakwavo va kusipilitu valikwatathanene na Satana nakutengulukila Njambi. Mbimbiliya yavatumbula ngwayo vandemona. Vandemona navo vapwa vaka-ñole va vanu ngwe omwo wapwa Satana. Vashaka kunenela vanu vyuma vyavivi. (Mateo 9:32, 33; 12:22) Yehova akanyongetha Satana na vandemona vendi. Vanathala na thimbu yayindondo lika yakunenela vanu vukalu.—Kujombolola 12:12.

Nga mushaka kupwa kavuthamba ka Njambi, kumwapandele kulinga vyuma vyashaka Satana ngwendi muvilinge. Satana na vandemona vathzinda Yehova. Vapwa vaka-ñole va Njambi, cho lalo vashaka neni mupwe vaka-ñole va Njambi. Hakati ka Yehova na Satana, munapande kwangulaho umo imushaka kuthzivitha kuvwaha ku mbunge. Nga mushaka kukayoya myaka yoshe, munapande kwangula kulinga chithzango cha Njambi. Satana wakala na vingila vyavingi vyakukwithilamo vanu. Ali nakukwitha vanu vavangi. —Kujombolola 12:9.