CILONGESA 21

Mbetele Yapwa Ika?

Bakaleho babali bali na kupanga mu Dipatimenti ya Kusona ha Mbetele — Dipatimenti ya baka-kusona, ku U.S.A.

Mukaleho wa Yehova ali na kupangela ku likina lya kupulinta ha Mbetele ku Germany — Ku Germany

Mukaleho wa Yehova ali na kupangela ku makina a kukusha buzalo ha Mbetele ku Kenya — Ku Kenya

Baka-kwana byakulya bali na kwaka byuma ha bimesa mu mulili wa kulila ha Mbetele ku Colombia — Ku Colombia

Mbetele, lyapwa lizina lya Cihebelu lije lilumbununa ngwalyo “Njubo ya Njambi.” (Kushangumuka 28:17, 19, majwi a kwisi) Eli lizina linafwila kulisanesa maofisi abanatungu Bakaleho ba Yehova mu kaye koshe mwafwa bakawapangesa mu kutwamenena na kukundwiya cipangi ca kwambulula. Cibunga ca Kutwamenena cakala ku ofisi yakama ku New York State, ku America. Eyi ofisi yakama ikeyo ili na kutwamenena bipangi byoshe bibali na kulinga ha maofisi a minango ya mu mafuti a kulisezaseza. Mbunga ya banu baje bali na kupangela ha maofisi awa, baitumbula ngwabo naanga ya Mbetele. Co bakala hamo, bakapangela hamo, bakalila hamo byakulya na kulilongesela hamo Mbimbiliya, ngwe mubakalingila banu ba mu naanga.—Myaso 133:1.

Wapwa mwela wa kulitila uje wakala na banu baje banalyana. Ha Mbetele hakala bandolome na bandokazi ba kuhya ku sipilitu baje banalyana kulinga cizango ca Njambi na kupanga bipangi bya Bumwene simbu yoshe. (Mateo 6:33) Naumo wahi ibakana fweto, oloni bakabana milili ya kutumbamamo, byakulya na kambongo ka kulanda byuma bya ku mubila. Banu boshe ha Mbetele bakala na cipangi cibakalingi. Bamo bakapangela mu maofisi, mu kicini, nameme mu mulili wa kulila. Beka bakapangela ku kupulinta na kutunga mabulu, kujelesa milili, kukusha buzalo, kubwahesa byuma bije binabihya na bipangi byeka lalo.

Mwela wa kuzezama uje ukakundwiya cipangi ca kwambulula bya Bumwene. Cipangi cakama cibakalingi ha Mbetele capwa ca kuzibukisa banu busunga bwa mu Mbimbiliya kwitila mu mabulu. Eli libulu linapu limo lyawa mabulu. Cibunga ca Kutwamenena cikatala cipangi ca kusoneka mabulu. Co bakapangesa makina kutuma mabulu ku bibunga bya baka-kunungulula mu bindaka bya kulisezaseza mu kaye koshe. Kutundaho, bakawapulinta kupangesa makina akama aje awaniwa ha Bimbetele bimo na kuwatuma ku bikungulukilo bya kutubakana 120,000. Binaanga bya Mbetele bikakwasa manene mu kukundwiya cipangi cakama ca kwambulula muzimbu waubwa.—Mako 13:10.

Beya bakapangela ha Mbetele, co bakabanyungu bati?
Cipangi muka ca seho cibali na kukundwiya ku bipangi bya ha Mbetele?