Muzimbu Waubwa wa mu Mbimbiliya Watunda Kuli Njambi Ndi?

1. Iya babenya Mbimbiliya?

Mu Mbimbiliya muli muzimbu waubwa wa kwendeka ngwawo banu bakayoya hano hasi myaka yoshe. (Myaso 37:29) Mbimbiliya ili na mikanda 66. Njambi wapangesele banu ba kupwa 40 mu kusoneka eyi mikanda. Mikanda ya kulibanga itanu baisonekele kuli Mosesa myaka 3,500 kunima. Co mukanda wa mamaneselelo bausonekele kuli kapositolo Yowano myaka 1,900 kunima. Biyongola byeya bibasonekele baka-kusoneka Mbimbiliya? Njambi wapangesele sipilitu ya kujela mu kuleka banu basoneke biyongola byendi. (2 Samwele 23:2) Basonekele biyongola bya Njambi, keti byabo embwe. Ngeci, Yehova ikeye babenya Mbimbiliya.​—Tandeni 2 Timateo 3:16; 2 Petulu 1:20, 21.

2. Tuzibuka bati ngwetu Mbimbiliya inendeka busunga?

Tuzibuka ngwetu Mbimbiliya yatunda kuli Njambi mwafwa inendeka busunga ha byuma bikalingiwa kulutwe. Munu kasa kulinga ngoco. (Yoshwa 23:14) Njambi Muka-nzili Yoshe ikeye lika azibuka byuma bikalingiwa kulutwe.​—Tandeni Isaya 42:9; 46:10.

Omwo mukemwo mulinapande kupwa libulu lya kutunda kuli Njambi. Linapande kupwa lya kulitila. Mbimbiliya banaisoneka mu bindaka byabingi, co lalo bali na kuyana ku banu babangi. Mbimbiliya baisonekele kusañulu, oloni inendeka mu kusungama ha biñanda bya sayansi. Co lalo byuma bibasonekele baje banu 40 byalitombola. Byuma biinendeka Mbimbiliya ha cizemo bitunda kuli Njambi wa cizemo na busunga. Co ili na nzili ya kutengulula banu bayoye bwino. Oku kunalingisa banu babangi batabe ngwabo Mbimbiliya yapwa Lijwi lya Njambi.​—Tandeni 1 Tesalonika 2:13.

3. Mbimbiliya inendeka biñanda muka?

Mbimbiliya inendeka bya muzimbu waubwa uje umwesa ngwawo Njambi akalingila banu byuma byabibwa kulutwe. Bisoneka binamwesa mubonowelele banu kutumbama mu paladaisi, nomwo mubakelwisila lalo paladaisi.​—Tandeni Kujombolola 21:4, 5.

Mu Mbimbiliya muli lalo mashiko na binangulo. Co lalo inatuleke byalingile Njambi ku banu ba kusañulu. Byuma byalingile Njambi binamwesa cifwa cendi. Ngeci, Mbimbiliya imikwasa muzibuke Njambi. Imileka mwakulikutila nendi busamba.​—Tandeni Myaso 19:7, 11; Yakomba 2:23; 4:8.

4. Bika bimikwasa muzibisise Mbimbiliya?

Eli libulu limikwasa muzibisise Mbimbiliya nga mukabangeya muje mwalingile Yesu. Byuma byendekele Yesu wabikundikile ku bisoneka, co wakwasele banu bamone ‘mubyalumbunukilile bisoneka.’​— Tandeni Luka 24:27, 45.

Muzimbu waubwa wa kutunda kuli Njambi uli na kuzibisa banu babangi kubwaha. Oloni bamo bali na kuubyana, co beka bali na kubihilila kubaleka ou muzimbu. Tumilomba ngwetu keti mubyane ou muzimbu. Kuyoya kweni kwa myaka yoshe kunemana ha kuzibuka Njambi.​—Tandeni Yowano 17:3.