Yesu Kilistu Ikeye Iya?

1. Yesu Watundile Kuli?

Yesu wapwile kangelo mwilu simbu kanda asemuke hano hasi. Ngeci, Yesu naliseze na banu. (Yowano 8:23) Ikeye ibabangele kutanga kuli Njambi, co wapangele na Ishe mu kutanga byuma byoshe. Mbimbiliya inatumbula Yesu ngwayo muna Njambi “umo lika” mwafwa ikeye lika ibatangele kuli babenya Yehova. (Yowano 1:14) Mbimbiliya inamutumbula lalo ngwabo “Lijwi” mwafwa wapwile Muka-kwendekelako Njambi.​—Tandeni Visimo 8:22, 23, 30; Kolose 1:15, 16.

2. Bika byezililile Yesu hano hasi?

Njambi watumine Munendi hano hasi. Wanungulwilile kuyoya kwendi mwimo lya Maliya, mumbanda wa Kayunda uje kanda alimone na munalume. Yesu kakele na ishe wa hano hasi. (Luka 1:30-35) Yesu wezile hano hasi (1) mu kutulongesa busunga hali Njambi, (2) mu kutumwesa mwanja uje utukwasa tulinge cizango ca Njambi nameme tuli mu bukalu, (3) mu kwana kuyoya kwendi kupwa “ndando ya kupatula.”​—Tandeni Mateo 20:28.

3. Bika bitutondela ndando ya kupatula?

Ndando ya kupatula inapu fweto ije ibana mangana bapatule munu ku kutsa. (Kutuuka 21:29, 30) Njambi mwatangele banu, kayongwele ngwendi bakulubale na kutsa embwe. Tuzibuka bati ngoco? Njambi walekele munu wa kulibanga Adama ngwendi nga alinga “bubi,” co akatsa. Ngwe Adama kalingile bubi, ngwe katsile. (Kushangumuka 2:16, 17; 5:5) Mbimbiliya ngwayo kutsa ‘kwezile’ ku banu kwitila muli Adama. Adama washambwisile bubi na kutsa ku bana bendi boshe. Ngeci, tubaboshe tutonda ndando ya kutupatula ku kutsa kuje kwatunda kuli Adama.​—Tandeni Loma 5:12; 6:23.

Iya ha kati ketu wasale kufweta eyi ndando mangana atupatule ku kutsa? Naumo wahi. Nga munu natsi, akafwete mulonga wa bubi bwendi lika. Munu wa kujeneka kulumbunuka kasa kufwetela bubi bwa bakwabo.​—Tandeni Myaso 49:7-9.

4. Bika byatsililile Yesu?

Yetu banu kutwalumbunukile. Oloni Yesu wapwile wa kulumbunuka. Ngeci, katsililile bubi bwendi, mwafwa ikeye kalingile bubi. Oloni Yesu watsililile bubi bwa bakwabo. Njambi watuzemene manene mukemo watumine Munendi mangana akututsile. Yesu nendi wamwesele ngwendi watuzema mwafwa wononokele Ishe na kwija mu kutsila bubi bwetu.​—Tandeni Yowano 3:16; Loma 5:18, 19.

5. Bika byali na kulinga Yesu honi?

Yesu mwakele hano hasi, wendwile baka-kubinja, wasangwile batsi na kwobola banu mu bushonde. Yesu wamwesele byuma byakalingila banu ba kwononoka kulutwe. (Mateo 15:30, 31; Yowano 5:28) Yesu mwatsile, Njambi wamusangwile na kupwa munu wa ku sipilitu. (1 Petulu 3:18) Munima ya kumusangula, Yesu wabandamenene kweta noho Yehova wamupwisile Mwene wa kuyula hasi hoshe. (Vahevelu 10:12, 13) Yesu napu honi Mwene uje ali na kuyula mwilu, co baka-kumukabangeya bali na kwambulula muzimbu waubwa mu kaye koshe.​—Tandeni Ndanyele 7:13, 14; Mateo 24:14.

Yesu ha kupwa Mwene, ololo apangesa nzili yendi mu kutundisako tuyando twoshe na baje bali na kutunena. Boshe baje bakulahela Yesu bakalikuwa buyoye mu paladaisi hano hasi.​—Tandeni Myaso 37:9-11.