Bika Byanayongola Njambi Kukalinga Hano Hasi?

1. Njambi watangelelele bika lifuti-libu?

Yehova wanene banu lifuti-libu mangana lipwe limbo lyabo. Adama na Eva kubabatangele mangana batumbame mwilu na kukitilamo embwe. Njambi wabangele kutanga tungelo mangana batumbame mwilu. (Yombi 38:4, 7) Njambi watangele munu wa kulibanga na kumwaka mu paladaisi yaibwa ibatumbula ngwabo citungu ca Edeni. (Kushangumuka 2:15-17) Yehova wakulahesele Adama na bana bendi baje bakakita kulutwe ngwendi bakayoya myaka yoshe hano hasi.​—Tandeni Myaso 37:29; 115:16.

Ku mashangumukilo, citungu ca Edeni cikeco lika cakele paladaisi. Ba Adama na Eva bapandele kukita bana na kushulisa hasi hoshe. Mu kwita kwa simbu, bapandele kutengulula lino lifuti-libu kupwa paladaisi. (Kushangumuka 1:28) Lino lifuti-libu kubakalinyongesa embwe. Lyapwa limbo lya banu ku myaka yoshe.​—Tandeni Myaso 104:5.

2. Bika lino lifuti-libu kulyatengulukile kupwa paladaisi?

Adama na Eva kubononokele Njambi, ngeci wabashekele muje mu citungu. Ano mangwa, hano hasi kuhatengulukile kupwa paladaisi mwafwa hacinashulu bilinga byabibi. Mbimbiliya ngwayo: “Njambi nana kaye kuli baka-bubi.”—Yombi 9:24.​—Tandeni Kushangumuka 3:23, 24.

Yehova nonwa kulingila banu byuma byayongwele ha kulibanga ndi? Embwe. Yehova wakala na nzili ya kutubakanesa. Kasa kwonowa. (Isaya 45:18) Akatengulula hano hasi kupwa paladaisi lalo.​—Tandeni Myaso 37:11, 34.

3. Hano hasi bakatengululaho bati kupwa Paladaisi?

Paladaisi ikakalako lalo mu ciyulo ca Yesu, Mwene yanangula Njambi. Ha nzita ya Alamagidoni, Yesu akatwamenena tungelo ba Njambi mu kunyongesa boshe baje banabyana Njambi. Kutundaho, Yesu akakuta Satana ha myaka 1,000. Oloni banu ba Njambi bakoboka mwafwa Yesu akabatwamenena na kubanyungilila. Bakayoya mwamubwa mu Paladaisi hano hasi.​—Tandeni Kujombolola 20:1-3; 21:3, 4.

4. Tuyando tukahwa mwaka uka?

Mwaka uka wakatundisa Njambi bubi hano hasi? Yesu wanene “cizibukiso” cije citukwasa tuzibuke ngwetu mamaneselelo ali muyehi. Byuma binakulingiwa mu kaye ano matangwa bili na kuzibisa banu lyoba. Co lalo bili na kumwesa ngwabyo tuli mu simbu ya “kukotoka kwa kaye.”​—Tandeni Mateo 24:3, 7-14, 21, 22.

Yesu akamanesa tuyando twoshe hano hasi omwo akayula myaka 1,000 mwilu. (Isaya 9:6, 7; 11:9) Yesu akapwa Mwene, co akapwa lalo Kapilisitu Wakama uje akazimangana bubi bwa banu baje bazema Njambi. Njambi akapangesa Yesu mu kutundisako kubinja, kukulubala na kutsa.​—Tandeni Isaya 25:8; 33:24.

5. Beya bakakala mu Paladaisi?

Boshe baje bononoka Njambi bakebo bakakala mu Paladaisi. (1 Yowano 2:17) Yesu watumine bandongesi bendi baye mu kushakezeka banu bababotsi na kubalongesa mwakuzibisila Njambi kubwaha. Ano matangwa, Yehova ali na kukwasa banu babangi bakayoye mu Paladaisi hano hasi. (Zefaniya 2:3) Ku Binjubo bya Bumwene bya Bakaleho ba Yehova kukekwo kubali na kulilongesela banu mwakupwila banalume bababwa, banakazi bababwa na bisemi bababwa. Bisemi na bana bakalemesela hamo Njambi na kulilongesa muubakwasela muzimbu waubwa.​—Tandeni Mika 4:1-4.