Mwasa Bati Kupwa ba Kubwahelela mu Naanga?

1. Kulyambata kwesekesa na mashiko kulingisa bati banu mu naanga babwahelele?

Yehova uje wapwa Njambi wa kubwahelela ikeye babenya muzimbu waubwa. Co ashaka ngwendi banu mu naanga babwahelele. (1 Timateo 1:11) Yehova ikeye wakeleko bulo. Kulyambata kwesekesa na mashiko kulingisa bisemi na bana mu naanga babwahelele na kuliziba ngwabo balizema. Baka-Kilistu banapande kukabangeya mashiko a kusonekesa bulo a mu lifuti lyabo.​—Tandeni Luka 2:1, 4, 5.

Njambi wamona bati bulo? Washaka ngwendi munalume na munakazi bakale mu bulo myaka yoshe. Yehova ashaka ngwendi munalume na munakazi balikulahele umo na mukwabo. (Vahevelu 13:4) Njambi wazinda kutsiya bulo. (Malakiya 2:16) Njambi natabesa muka-Kilistu atsiye bulo na kulyatamba na munu weka kubanga ngwe muka-limbo lyendi nalingi bukoi.​—Tandeni Mateo 19:3-6, 9.

2. Munalume na munakazi banapande kutumbama bati mu bulo?

Yehova watangele munalume na munakazi mangana balikwase umo na mukwabo mu bulo. (Kushangumuka 2:18) Munalume, ha kupwa mutwe wa naanga, napande kutondela naanga yendi byuma bya ku mubila na kubalongesa bya Njambi. Napande kuzema munakazi wendi na mbunge yendi yoshe. Munalume na munakazi banapande kulizema na kulisingimika. Ha kuwana ngwe boshe bali na tupenga, banapande balikonekela mangana babwahelele mu bulo.​—Tandeni Efeso 4:31, 32; 5:22-25, 33; 1 Petulu 3:7.

3. Munapande kuseza muka-limbo lyeni nga kumwesi na kutumbama bwino mu bulo ndi?

Nga kumwesi na kutumbama bwino mu bulo, co waneni bingila bya kulimweselamo cizemo. (1 Kolinte 13:4, 5) Mbimbiliya kuyatabesele ngwayo kulyangununa ikeyo ngila ya kumaneselamo bukalu bwa mu bulo embwe.​—Tandeni 1 Kolinte 7:10-13.

4. Eni banike, Njambi ashaka ngwendi mupwe bati?

Yehova ashaka ngwendi mubwahelele. Namyana binangulo byabibwa bije bimikwasa muyoye bwino mu bwanike bweni. Ashaka mutolilile bisemi beni mwafwa bali na mana, co lalo bazibuka byabingi. (Kolose 3:20) Yehova ashaka lalo ngwendi mubwahelele nga mupangela Ikeye na Munendi.​—Tandeni Muka-kwambulula 11:9–12:1; Mateo 19:13-15; 21:15, 16.

5. Eni bisemi, bana beni batonda bika mangana babwahelele?

Munapande kupanga na nzili mangana muwanene bana beni byakulya, mwakulala na buzalo. (1 Timateo 5:8) Oloni nga mushaka ngweni bana beni babwahelele manene, co balongeseni bazeme Njambi na kumutembwinina. (Efeso 6:4) Nga mumwesa ngweni mwazema Njambi, co nabo bamuzema. Nga mulongesa bana beni byuma bije bitunda mu Lijwi lya Njambi, co bashangumuka kusinganyeka mwamubwa.​—Tandeni Kwituluka mu Mashiko 6:4-7; Visimo 22:6.

Bana beni baliziba mwamubwa nga mubakanyamesa na kubashangazala. Munapande lalo kubolola na kubanyanyamesa. Nga mulinga ngoco, co mubanyungilila ku bilinga byabibi bije bibonowesa kupwa ba kubwahelela. (Visimo 22:15) Oloni keti mubanyanyanese mu bukenya nambe mu bukalu.​—Tandeni Kolose 3:21.

Bakaleho ba Yehova banasoneka mabulu amangi aje akwasa bisemi na bana. Awa mabulu anemana ha Mbimbiliya.​—Tandeni Myaso 19:7, 11.