Lahave Wakulahelele Yehova

Tuye tuthimutwiye vyalingiwile mu nganda ya Yeliko. Eyi nganda, yakala mu lifuti lya Kanana, muje vanu kuvakulahelele Yehova. Mwakele munakathzi, lithzina lyendi ikeye Lahave.

Lahave te achili mwanike wamundondo, wathzivile viñanda vya Mosesa, omwo watwamenenene vanu vaIsalele kujavuka Lishali Lyakuvenga kutunda mu Ingito. Wathzivile omwo Yehova wavakwathelelemo kuhyana vitothzi vavo mu vindthzita. Wathzivile lalo ngwavo vanu vaIsalele vetelele kuyehi na Yeliko!

Litangwa limo mangwethzi, vaIsalele vavali vaile ku Yeliko kukanenga nganda. Vethzile ku njuvo ya Lahave cho wavalanyene kukovela mu njuvo yendi na kukala navo. Cho ovwo vuthsiki, mwene wamu Yeliko wathzivile ngwavo kuli vaIsalele vamo vanaija na kunenga nganda cho nawa, ava vanu vali mu njuvo ya Lahave. Ngechi mwene watumine vanalume mu nganda vakakwate ava vaIsalele. Oloni Lahave wavashwekele helu ya chiluli cha njuvo yendi cha kuthivama. Walekethele vaje vanalume vanatumine mwene ngwendi: ‘Vaje vanalume vanethzile kuli yange oloni vanayi, nga muvathzambwila munatha kuvawana!’ Mwafwa vika Lahave wavingilikiyile ava vaka-kunenga?— Mwafwa wakulahelele Yehova cho nawa wathzivukile ngwendi Njambi akana vaIsalele lifuti lya Kanana.

Thimbu kanda vaka-kunenga vachituuke mu njuvo ya Lahave, vamukulahethele na vavushoko vwendi ngwavo vakakala mwamuvwa omwo nganda ya Yeliko vakayinyongetha. Uthzivuka viva muleketha ngwavo alinge ndi?— Vamulekele ngwavo: ‘Ambata ou mukole wakuvenga, uukutilile na kuunyengeletha ha Njanena yove. Nga ulinga ngocho, vavushoko vwove voshe vakakala mwamuvwa.’ Cho Lahave walingile ngechi muvamulekethelele vaka-kunenga. Uthzivuka vyalingiwile kutunda oho ndi?—

Kwetile matangwa amandondo vaIsalele vathzengulukile nganda mukwoloka, valingile ngocho ha matangwa 6, lumolika ha litangwa. Oloni litangwa lyavu 7 likelyo lije vathzengulukile nganda lutanu na luvali. Cho voshe vatambakanene manene. Yehova wapujwile vinjuvo vyoshe vyamu nganda. Oloni njuvo ije yakele na mukole wa kuvenga ha njanena ikeyo kuyapujukile! Chilikuli chikupulo cha njuvo ya Lahave?— Lahave na vavushoko vwendi vovokele!

Vika viwatha kulilongetha kuli Lahave?— Lahave wakulahelele Yehova mwafwa ya vyuma vyendi vyakukomowetha vyalilongethele. Nove ulinakulilongetha vyuma vyavingi vyakukomowetha vya Yehova. Nove ukulahela Njambi ngwe Lahave, ndi vati?— Tuthzivuka ngwetu nove wakulahela!