Nove Ukathzivi Vuli na Lyova Ndi?

Achikenge ou mwanike ali ha chikupulo. Alinakumoneka vuli na lyova ndi vati? Nove wathzivaho laja ngechi?— Thimbu imo, vanu voshe vakalithzivi vuli na lyova. Mbimbiliya yendeka lalo ha vathamba va Yehova vaje vathzivile vuli na lyova. Umo wavo wapwile Elinja. Vandamena tulilongethe vyendi.

Elinja wayoyele mu Isalele mu myaka ya kunima, te Yesu kanda athemuke. Mwene wa Isalele Ahave, kakele na kulombela Njambi wa vusunga, Yehova. Ahave na munakathzi wendi Njezevele vakele na kulombela kalunga wa makuli Mbale. Vanu vavangi mu Isalele navo vaputukile kulombela Mbale. Lishano Njezevele wakele na vithinganyeka vyavyuvi. Washakele kuthsiya vanu voshe vaje vakele na kulombela Yehova, kwakelako na Elinja! Uthzivuka vyalingile Elinja?—

Elinja watewele! Waile kulako mu mambo nakukalishweka mu vwina. Uthinganyeka ngwove vika vyalingilile ngocho Elinja?— Mukemwo vene, wathzivile lyova manene. Oloni Elinja te kapandele kuthziva lyova. Mwafwa vika? Wathzivukile ngwendi Yehova amukwatha. Elinja wamweneho laja ndthzili ya Yehova. Thimbu imo, Yehova wakumbulwile lilombo lya Elinja hakutuma tuhya kutunda mwilu. Yehova napandele kukwatha lalo Elinja haje hathzivilile lyova!

Yehova wendekele kuli Elinja te ali mu vwina. Cho wamwihwile ngwendi: ‘Vika ulinga kuno?’ Elinja wakumbulwile ngwendi: ‘Yange lika njinathalaho njichili na kukulombela. Njilinakuthziva lyova mwafwa vanu vashaka kunjithsiya.’ Elinja wathinganyekele ngwendi vakwavo muvakele nakulombelela Yehova voshe vanavathsiyi. Oloni Yehova wamulekele ngwendi: ‘Kethi mukemwo embwe. Kuli vanu vakweta 7, 000 vaje vachilinakunjilombela. Kanyama, njichili na vipangi vyavingi vinjishaka ngwange upange! Uthinganyeka ngwove Elinja wavwahelelele omwo wathzivile awa majwi ndi?—

Vika ulilongetha kuvyuma vije vyasholokele kuli Elinja?— Kuwapandele kuthziva vuli nambe lyova embwe. Ulina vavuthamba vaje vathzema Yehova hamolika nove. Lalo, Yehova wakala na ndthzili yakama, cho atha kukukwatha thimbu yoshe! Wavwahelela oni kuthzivuka ngwove chili vene kuwethi likalyove indi vati?—