Njilinga Vati Nga Vakwetu Vanjipaketha?

ULINGA VATI?

Achithinganyeke ha chakumwenako echi: Thomas shendi kuya ku sikola. Shendi kuya mwafwa ya vukalu vumo vuje vwashangumukile vingonde vitatu vineti munima. Vakwavo vaka-sikola vamuvangeyeye vyuma vimo vyavivi, cho vamuluka mathzina a kumushendumuna. Vithimbu vimo, vakwavo vakambolo ku mikanda yendi na kuiwithila hathi. Indi hamo munu umo mu chivunga alivemba na kunakwila Thomas hathi. Ithzau, Thomas natambwile majwi amavi ha foni a kumupaketha kutundilila kuli vakwavo vaka-sikola . . .

Ngwe yove Thomas, ngwe ulinga vati?

THINGANYEKAHO MWAMUVWA

Echi kuchilumbununa ngwavo kuwethi na ndthzili embwe. Watha kulwitha uje akupaketha kujeneka kupangetha mavoko. Watha kulinga vati ngocho?

• KETHI UTENUKE. Mbimbiliya ngwayo: “Vilema vakasholola vukalu vwavo vwoshe, oloni vaka-mana vakathimpi navwo.” (Vithimo 29:11) Nga uthimpa, cho vaje va kupaketha vanatha kukujenjuka.

• KETHI UVELWITHILE VUVI. Mbimbiliya ngwayo: “Nga umo na kuviyithila, kethi umwilwithile vuvi vwendi lalo embwe.” (Loma 12:17) Kwilwithila vuvi ku vuvi kwatha kuvwethzelela ku vukalu.

• KETHI ULIKOVELETHE MU VUKALU. Mbimbiliya ngwayo: “Omwo vaka-mana vamona vukalu vwija, cho vatewa.” (Vithimo 22:3) Jenjuka ku vanu vaje vatha kukunenela vukalu na kujenjuka ku vyuma vije vilingitha ngwavo va kupakethe.

• KUMBULULA MWAMUVWA. Mbimbiliya ngwayo: “Kukumbulula kwakuvwa kwolwetha vukalu.” (Vithimo 15:1) Kumbulula mwamuvwa. Chakumwenako, nga uje akupaketha akuleka ngwendi unama manene, cho watha kumukumbulula ngwove, “Nange njayongola kutepula ku muvila wange”

• VATHETHZE. Nora wa myaka 19 wendekele ngwendi: “Kwoloka kulu kumwetha ngwavo unakolo, cho unakanyama kutuvakana uje a kupaketha. Kumwetha lalo ngwavo uli na mbunge ya kulivindika, ije vanonowa kukala nayo vaka-kupaketha.”—2 Timateo 2:24.

• KOLETHA. Vaka-kupaketha vakamono vaje vasholoka kupwa va kwoloka na kujeneka kulyamena vakevo vavenya. Oloni vaka-kupaketha vakutewa nga vamona ngwavo kuwethi na kuvathzivila lyova.

• LEKAKO MUKWENI. Mulongethi umo wendekele ngwendi: “Njishongangeya voshe vaje vavali na kupaketha ngwange valekeko vakwavo. Kunapu kwakuvwa manene kulinga ngocho, mwafwa kwatha kuvakwatha vajeneke kuvapaketha.”