Njambi Watangele Lilu na Lifuti-Libu

Yehova Njambi ikeye Ishamatanga yetu. Ikeye watangele byuma byoshe bitwasa kumona nebi kutwasa kumona. Simbu kanda atange byuma bitukamono, wabangele kutanga tungelo babangi-bangi. Muzibuka ngweni tungelo bapwa beya? Tungelo bapwa bangamba ba Yehova baje bapwa ngwe ikeye. Kutwasa kubamona mwafwa nabo bakala na mibila ya sipilitu ngwe Yehova. Kangelo wakulibanga yatangele Yehova wapwile mukwasi wendi. Ou kangelo wakwasele Yehova mwakele na kutanga bingongonosi, mapulaneti na byuma bikwabo byeka. Lifuti libu, limbo lyetu banu, lyapwa limo lya mapulaneti atangele Yehova nou kangelo.

Yehova mwamanesele kutanga lifuti-libu, walibwahesele mwamubwa mangana tusitu na banu base kuyoyaho. Walingisile ceke ca litangwa cishangumuke kutwilaho. Watangele minkinda, tulunga-ndonga na bindonga.

Bika byateleko? Yehova wendekele ngwendi: ‘Njitanga mwila, bimena na miti.’ Miyati ya kuliseza-seza ya bushuka, bisapasapa na bintemo, byashangumukile kukola. Kutundaho, Yehova watangele tusitu boshe na byakutanga bije bikapulula, bya mu ndonga, bije bikakalaba na bije bikalikoko hasi. Watanengele tusitu babandondo ba kufwa ngwe tulumba na tusitu bakama ba kufwa ngwe binjamba. Kasitu muka imwashaka manene?

Yehova mwamanesele kutanga tusitu, walekele kangelo yabangele kutanga ngwendi: “Tuye tutange munu.” Yehova washakele ngwendi banu baliseze na tusitu. Wabatangele na cashu ca kupanga byuma byabiha, kwendeka, kujola na kulombela. Wabanene cipangi ca kunyunga mwamubwa lifuti-libu na tusitu. Muzibuka munu wakulibanga ibatangele ndi? Ololo mumuzibuka.