Njambi Watangele Munalume na Munakazi Bakulibanga

Yehova wakunine lihya mu mutambela wa Edeni. Muje mu lihya mwakele bintemo, miti na tusitu babangi. Co Yehova Njambi watangele munu wakulibanga Adama kutunda ha likungu, co wamuhwiminine muku wa kuyoya mu majulu endi. Kuma muzibuka byuma byateleko ndi? Uje munu washangumukile kuyoya. Co Yehova wamulekele anyunge byuma byoshe byakele muje mu lihya na kuluka mazina tusitu boshe.

Yehova wanene Adama lishiko lya seho. Wamulekele ngwendi: “Wasa kulya ku miti yoshe ili omu mu lihya, oloni keti ukalye ku muti wa kuzibuka bubwa na bubi mwafwa litangwa liukalyako ukatsa.”

Co Yehova wendekele ngwendi: ‘Njitangela Adama mukwasi.’ Walingisile Adama alale tulo twakama. Simbu wacikele mu tulo, Njambi wambatele mati imo ya Adama, co wamutangelele munakazi. Lizina lyendi lyapwile Eva. Adama na Eva bapwile naanga yakulibanga. Adama walizibile bati mubamunenelele munakazi wendi? Wabwahelelele manene, co wendekele ngwendi: ‘Taleni byanatanga Yehova ha mati yange. Hanwoni njili na munu uje nalifu nange.’

Yehova walekele Adama na Eva bakite bana na kushulisa lifuti-libu. Washakele ngwendi balikuwe kupangela hamo mu kupwisa lifuti-libu paradaisi nambe lihya lyalibwa ngwe mwa lihya lya Edeni. Oloni byuma kubyafwile ngoco. Mwafwa bika? Tuziba byabingi mu capita inatako.