Adama na Eva Kubononokele Njambi

Litangwa limo, Eva mwakele likalyendi linyoka wezile na kumwendekesa. Uje linyoka wehwile Eva ngwendi: “Kuma cili bene Njambi namibindika kulya ku miti yoshe ndi?” Co Eva wamukumbulwile ngwendi: ‘Twasa kulya ku miti yoshe kubanga lika ku muti umo. Mwafwa nga tulyako, tutsa.’ Linyoka wendekele ngwendi: ‘Kumutsi, oloni nga mulyako mupwa ngwe Njambi.’ Kuma awa majwi apwile a busunga ndi? Embwe. Apwile a makuli. Oloni Eva wakulahelele byendekele uje linyoka. Co Eva mwakele na kutwalelelaho kutala buje bushuka wakele na kubushungwiya manene. Walile buje bushuka, kutundaho waneneko na Adama mubakele hamo. Adama wazibukile ngwendi nga kubononoka Njambi batsa. Oloni nendi walile buje bushuka.

Co ku mangwezi a lije litangwa, Yehova wendekele na Adama na Eva. Wabehwile byabalingisile bajeneke kumwononoka. Eva wendekele ngwendi linyoka ikeye wamukwisile. Adama ikeye wendekele ngwendi Eva ikeye wamulekele ngwendi alyeko. Yehova washekele Adama na Eva muje mu lihya mubakele mwafwa kubamwononokele. Co wakele tungelo na moko ya mukwale ya tuhya ku bukobelelo mangana keti beluke mu lihya.

Yehova wendekele ngwendi uje wakwisile Eva bakamwana kashitiko. Keti linyoka mpundu wendekele na Eva. Yehova katangele manyoka baje basa kwendeka. Kangelo wamubi ikeye walingisile uje linyoka endeke. Walingile ngoco mangana ongumune Eva. Uje kangelo napu Satana Liyabolo. Kulutwe, Yehova akanyongesa Satana mangana keti atwaleleleho kungumuna banu balinge byuma byabibi.