Bubi Bwalingile Mwene Devidi

Saulu mwatsile, Devidi wapwile mwene. Ha simbu ije wakele na myaka 30. Munima ya myaka, litangwa limo mangwezi, Devidi wakele na kwendangana ha ciluli ca lipela, co wamwene munakazi wamubwa. Devidi wawanene ngwabo lizina lyendi Bati-sheba uje washombokele kuli liswalale wa lizina lya Uliya. Devidi watumine banu bakasane Bati-sheba. Walilalele nendi, co wakele na cikute. Devidi wesekele kushweka buje bubi bwalingile. Walekele ntwama wa maswalale bendi ngwendi ake Uliya kulutwe lya nzita, co eluka munima na maswalale boshe mangana Uliya asale likalyendi. Uliya mubamutsiile mu nzita, Devidi wambatele Bati-sheba.

Oloni Yehova wamwene ebi byuma byabibi byoshe byalingiwile. Co walingile bika? Yehova watumine kapolofweto Nathani kuli Devidi. Nathani walekele Devidi ngwendi: ‘Munalume umo wa kufuka wakele na bimanga babangi, co munalume wa kahutu wakele na manga umo wamundondo yazemene manene. Uje munalume wa kufuka wanyekele munalume wa kahutu manga yendi yakele nendi.’ Devidi walubalele na kwendeka ngwendi: ‘Owo munalume wa kufuka napande kutsa!’ Co Nathani walekele Devidi ngwendi: ‘Yobe bene munalume wa kufuka!’ Devidi wapokokele mbunge na kulitabela kuli Nathani ngwendi: ‘Njabiisila Yehova.’ Obu bubi bwanenele tuyando kuli Devidi na naanga yendi. Yehova wanene Devidi kashitiko, oloni wamutabesele atwaleleleho kuyoya mwafwa walitabelele bubi bwendi, co lalo walikehesele.

Devidi washakele kutungila Yehova tempele, oloni Yehova wangwile munendi Solomoni mangana aitunge. Devidi washangumukileko kubwahesela Solomoni byuma, co wendekele ngwendi: ‘Tempele ya Yehova inapande kupwa ya bumpau. Solomoni acili mwanike, oloni njimubwahesela byuma mangana njimukwase.’ Devidi walambwile bimbongo byendi byabingi ku cipangi ca kutunga. Watondele na baka-kutunga ba bitongwe. Co wakungulwile goudi na siuva na kunena miti ya sida kutunda ku Tile na ku Sidoni. Ku mamaneselelo a buyoye bwendi, Devidi wanene Solomoni lipapelo lije lyamwesele muyapandele kusholokela tempele na kumuleka ngwendi: ‘Yehova ikeye nanjileke binjinasoneka aha ha lipapelo mangana njikwanelyo. Yehova akukwasa. Keti uzibe lyoba. Kolesa na kupanga cipangi.’