Yehova Amena Jehoshafati

Jehoshafati mwene wa Juda wasiwile mitula ya Bale na kutika tumponya mu lifuti. Washakele ngwendi banu bazibuke mashiko a Yehova. Ngeci, watumine bamyata na baLevi mu Juda mwoshe mangana bakalongese banu mashiko a Yehova.

Mafuti aje akele muyehi na Juda akele na kuziba lyoba kulwisa Juda mwafwa azibukile ngwawo Yehova wakele na banu bendi. Ngeci banenelele bwana Mwene Jehoshafati. Oloni baMowabi, baAmoni na banu ba ku mutambela wa Seya bezile na kulwisa Juda. Jehoshafati wazibukile ngwendi Yehova ikeye lika asa kumukwasa kuhyana baje bitozi bendi. Ngeci, walekele banu boshe, banalume, banakazi na banike ngwendi balikungulwile mu Jelusalema. Co walombelele ha mesho a mbunga ngwendi: ‘Obe Yehova, kwa kujeneka bukwasi bwobe kutwasa kuhyana bitozi betu. Ngeci, tukulomba utuleke bitunapande kulinga.’

Yehova wakumbulwile lilombelo lyendi, co wamulekele ngwendi: ‘Keti uzibe lyoba. Njikukwasa. Libwaheseleni, imaneni mu myela yeni, co mumona munjimyobwela.’ Yehova wabobwele bati?

Lyamukwabo mutondo, Jehoshafati wangwile baka-kwimba na kubaleka ngwendi bacaule kulutwe lwa maswalale ba Isalele. Bacawile kutunda ku Jelusalema kuketa ku Tekoa kuje kubakalwililile nzita.

Baka-kwimba mubakele na kushangazala Yehova mu kubwahelela na majwi a kutaluka, Yehova walwililile banu bendi. Watanganesele baAmoni na baMowabi, ngeci balitengulukilile na kushangumuka kulilwisa. Co baje bitozi ba baJuda batsile. Oloni Yehova wanyungililile baJuda na maswalale na tupilistu. Banu boshe ba mu mafuti aje alyatele na baIsalele bazibile byuma byalingile Yehova, co bazibukile ngwabo Yehova anga wacikele na kwamena banu bendi. Yehova akamena bati banu bendi? Akalingi ngoco mu bingila byabingi. Kesi kutonda bukwasi bwa banu.