Yesu Alisholola Kuli Baka-kutsiya Bisi

Mukwetile simbu kutunda hasholokelele Yesu kuli tupositolo, Pita waile na kutsiya bisi ku Kalunga-ndonga wa Galileya. Tomasi, Jemusi, Iwano na bandongesi bakwabo baile hamo nendi. Bazwamene butsiki bwoshe, oloni kubatsiile nameme isi umo.

Lyamukwabo mutondo, bamwene munalume nemana ha nunda. Co uje munalume watambekele ngwendi: ‘Munatsiiko bisi bamo ndi?’ Bamukumbulwile ngwabo: ‘Embwe!’ Uje munalume wabalekele ngwendi: “Asheleni bwanda bweni ku mutambela wa cilyo wa bwato.” Mubalingile ngoco, bwanda bwabo bwashulile na bisi, co kubasele kubukoka. Haje bene Iwano wanangukile ngwendi uje munalume wapwile Yesu, co wendekele ngwendi: “Mwata uje!” Co haje bene, Pita wajombokelele mu ndonga na kulapa kuketa ha nunda. Bandongesi bakwabo nabo bamukabele mu bwato.

Mubetele ha nunda, bawanene likende na bisi ha liko. Yesu wabalekele ngwendi bambateko bisi babakwatele mangana babwezelele ku bisi bakele nabo. Kutundoho, wabalekele ngwendi: ‘Ijeni mulye byakulya bya mutondo.’

Mubamanesele kulya, Yesu wehwile Pita ngwendi: ‘Wanjizema kutubakana kutsiya bisi ndi?’ Pita wakumbulwile ngwendi: ‘Mukemwo Mwata, uzibuka ngwobe njakuzema.’ Yesu wamulekele ngwendi: ‘Lisa bimanga bange.’ Yesu wamwihwile lalo ngwendi: ‘Pita, wanjizema ndi?’ Pita wakumbulwile ngwendi: “Mwata, uzibuka ngwobe njakuzema.” Yesu wamulekele ngwendi: “Nyunga bimanga bange babandondo.” Co Yesu wamwihwile lalo lwamucitatu. Pita walizibile manene kubihya ku mbunge. Co wamukumbulwile ngwendi: “Mwata, uzibuka byuma byoshe. Uzibuka ngwobe njakuzema.” Yesu wamulekele ngwendi: “Lisa bimanga bange babandondo.” Kutundaho, walekele Pita ngwendi: “Twalelelaho kunjikabangeya.”