Banu ba mu Mafuti Amangi Bapwa Baka-Kristu

Tupositolo bononokele lishiko lya Yesu lya kwambulula muzimbu waubwa hasi hoshe. Mu 47 C.E., bandolome ba mu Antioke batumine Paulu na Banabasi mu bungenzi bwa kwambulula muzimbu waubwa. Aba baka-kwambulula babali ba ntwima baile mu Asia mu mitambela ya kufwa ngwe Debe, Listra na mu Ikoniamu.

Paulu na Banabasi bambulwilile munu woshe ibawanene ipwe wa kufuka nambe kahutu, mwanike nambe mukulunu. Banu babangi batambwile muzimbu waubwa wa Kristu. Omwo Paulu na Banabasi bakele na kwambulwila Segiasi Paulasi uje wapwile ngubulu wa mu Saiprasi, muka-kupanda umo washangumukile kubalwisa mangana abonowese. Paulu walekele uje muka-kupanda ngwendi: ‘Liboko lya Yehova likulwisa.’ Co haje bene uje muka-kupanda wapwile kapuputwa. Ngubulu Paulasi mwamwene ngoco, haje bene wapwile muka-kutaba.

Paulu na Banabasi bambulwilile ku mitambela yoshe, ha njibo na njibo, mu mamaketi, mu bingila na mu masinagogi. Mubakangwisile munalume wa ciyanga mu Listra, baje babamwene basinganyekele ngwabo bapwile binjambi, ngeci bashakele kubalemesa. Oloni Paulu na Banabasi bababindikile na kubaleka ngwabo: ‘Munapande kulemesa lika Njambi! Netu tunapu lika banu.’ Co kwezile baJuda bamo baje bezile na kungumuna banu mangana batengulukile Paulu. Mbunga ya banu yamwashele mamanya na kumutwala hanja ya nganda mwafwa basinganyekele ngwabo natsi. Oloni Paulu katsile. Co haje bene bandolome bezile na kumwambata na kumwilwisa mu nganda. Mukwetile simbu, Paulu welukile ku Antioke.

Mu 49 C.E., Paulu waile bungenzi bukwabo lalo. Mwatundile na kumona bandolome bendi mu Asia, watwalele muzimbu waubwa na ku mitambela ya kulako ya mu Europe. Waile ku Atena, Efeso, Filipi, Tesalonika na ku mitambela ikwabo. Co Silasi na Luka na mukwenje wa lizina lya Timothi baile na Paulu. Bapangelele hamo mu kushimbika bikungulukilo na kubikanyamesa. Paulu wakele mu Korinte ha mwaka na bingonde 6 mangana akanyamese bandolome. Wambulwile muzimbu waubwa na kulongesa banu. Kutundaho, wasonekelele bikungulukilo byabingi mikanda. Co lalo wakele na kupanga cipangi ca kutunga bitenti. Mukwetile simbu welukile ku Antioke.

Mu 52 C.E., Paulu waile bungenzi bwamucitatu, co wabangele kuya mu Asia. Wakambulwilile ku mitambela ya kulako ya ku kunto ya Filipi kuketa na ku Korinte. Paulu wakakele myaka yaingi mu Efeso oku ali na kulongesa, kukangwisa na kukwasa cikungulukilo. Wakele na kwendeka biñanda bya mbunga ha litangwa na litangwa mu mutungo wa kukungulukila wa ha sikola. Banu babangi batolililile na kutengulula futisi yabo. Munima ya kwambulula muzimbu waubwa mu mitambela yaingi, Paulu waile ku Jelusalema.