Muka-kunyunga Kamenga Alilongesa Busunga

Mu Filipi mwakele ngamba umo wa mumbanda uje wakele na dimona. Dimona wapangesele uje mumbanda mu kupolofweta byuma bya kulutwe, co wapangelele bashukulu bendi bimbongo byabingi. Paulu na Silasi mubezile mu Filipi, uje mumbanda wabakabangeyeye ha matangwa amangi. Dimona walingisile uje mumbanda atambeke ngwendi: “Aba banalume banapu bindungo ba Njambi Wahakamwa Manene.” Co Paulu walekele uje dimona ngwendi: ‘Njikushika mu lizina lya Yesu ngwange mutunde!’ Uje dimona wamutundile.

Bashukulu ba uje mumbanda mubanangukile ngwabo uje mumbanda kasoni kubapangela bimbongo, balubalele manene. Bakwatele Paulu na Silasi na kubatwala kuli baka-kuyula na kukendeka ngwabo: ‘Aba banalume bali na kupokola lishiko na kunena mpindangano mu nganda yoshe!’ Baka-kuyula bashikile ngwabo bapupe Paulu na Silasi na kubaka mu kamenga. Muka-kunyunga kamenga wabakele mu mulili wa lisusulungu manene wa kamenga na kubaka mu tukunju.

Paulu na Silasi bembile myaso ya kushangazala Yehova oku mapanditi bakwabo bali na kubatolilila. Hakati ka butsiki, kwakatukile lindunduma lyakama lije lyaningangesele kamenga koshe. Bikolo bya kamenga byashokolokele, co malyenge na tukunju twa mapanditi byazitukile. Muka-kunyunga kamenga washatukilile ku kamenga, co wakawanene bikolo byashokoloka. Wasinganyekele ngwendi mapanditi boshe banatewe, ngeci washomwene moko yendi ya mukwale ngwendi alitsiye.

Haje bene Paulu watambekele ngwendi, “Keti ulibulumune! Tubaboshe mutuli muno!” Muka-kunyunga kamenga washatukile na kukawila ku mendi a Paulu na Silasi. Wabehwile ngwendi: “Bika binjinapande kulinga mananga njoboke?” Bamukumbulwile ngwabo, ‘Yobe na bakunjibo yobe munapande kukulahela Yesu.’ Ngeci, Paulu na Silasi balongesele baje banu lijwi lya Yehova, co uje muka-kunyunga kamenga na bakunjibo yendi babambwitikile.