Mukanda Utunda ku Cibunga ca Kutwamenena

Bandolome na Bandokazi Batwazema:

Ha kupwa bangamba ba Yehova, twazema Mbimbiliya ije yapwa Lijwi lyendi. Co twakulahela ngwetu muli biñanda bya kusungama bya kusañulu na biñanda bije byasa kututwamenena mu kuyoya kwetu na biñanda bije bimwesa ngwabyo Yehova wazema banu. (Samu 119:105; Luka 1:3; 1 Iwano 4:19) Tushaka kukwasa bakwetu balilongese busunga buli mu Lijwi lya Njambi. Ngeci, twabwahelela manene kutuhula lino libulu lya mutwe wa, “Bitulilongesa ku Mizimbu ya mu Mbimbiliya.” Tucisimutwiyeniko mu bwihi bili muno mu libulu.

Biñanda bili muno mu libulu banabibwahesela banike. Nameme ngoco, eli libulu lyasa kukwasa na bakulunu baje bashaka kulilongesa biñanda byabingi bya mu Mbimbiliya. Kulingila Mbimbiliya yapwa libulu lya banu boshe, yasa kutukwasa tupwe ba kubwahelela mona tulilongesa biñanda bilimo.

Eli libulu linendeka mizimbu ya mu Mbimbiliya ije ilumbununa mubashangumukilile kutanga byuma na banu na byuma byateleko. Biñanda bya mu Mbimbiliya bili omu mu libulu banabilumbununa mu ngila yayasi, co lalo banabisoneka kwesekesa nomu mubinalikabasanena.

Omu mu libulu muli lalo bikupulo byabibwa bije bibanasono mwamubwa. Biñanda na bikupulo bilimo banabibwahesa mu ngila ije itukwasa tusinganyekesese ha mizimbu ya mu Mbimbiliya itutanda na kuzibuka mubakele na kulizibila banu babanendeka muno mu libulu.

Eli libulu litukwasa kuzibuka banu babanendeka mu Mbimbiliya baje bononokele Yehova na baje kubamwononokele. Co lalo litukwasa kulilongesako bimo ku myanja yabo. (Loma 15:4; 1 Korinte 10:6) Eli libulu lili na mitamba 14. Kumashangumukilo a mutamba na mutamba, banasonekako bisimpi byakama bitulilongesa.

Nga mu bisemi, mwasa kutanda hamo na muneni biñanda bili mu cilongesa na kusimutwiya ha bikupulo bilimo. Co lalo mwasa kutanda na mikanda ya mu Mbimbiliya haje hanemana oco cilongesa. Kwaseni muneni amone mubinalitombwela biñanda byali na kutanda mu libulu nebi byatanda mu Mbimbiliya. Mwasa kupangesa ngila ya kulifwa omwo mukwasa munu wa kukola azibuke mizimbu ya mu Mbimbiliya.

Twakulahela ngwetu eli libulu likwasa banu ba bimbunge byabibwa, ipwe banike nambe bakulunu balilongese Lijwi lya Njambi na kupangesa bibalilongesamo mu kuyoya kwabo. Nga balinga ngoco, co basa kushangumuka kulemesa Yehova na kupwa banu ba mu naanga yendi baje bazema.