Twasa Kulemesa Bati Njambi mu Ngila Yaibwa?

Ngwe mutunalilongeselele mu cilongesa cinahu, keti bulombelo bwoshe buli na kuzibisa Njambi kubwaha. Nameme ngoco, twasa kulemesa Ishamatanga mu ngila ije imuzibisa kubwaha. Twasa kulemesa bati Njambi mu ngila yaibwa? (Yakomba 1:27) Tumoneni biyendeka Mbimbiliya.

1. Kulemesa kwetu kunapande kwimana haka?

Kulemesa kwetu kunapande kwimana ha Mbimbiliya. Yesu wendekele kuli Njambi ngwendi: “Lijwi lyobe lyapwa busunga.” (Yowano 17:17) Bulombelo bumo kubwesi na kukabangeya busunga bwa mu Lijwi lya Njambi, Mbimbiliya. Buli na kukabangeya bilongesa na bisemwa bya banu. Oloni baje bakombwanesa mashiko a Yehova kubesi kumuzibisa kubwaha. (Tandeni Mako 7:9.) Nga tukabangeya biyendeka Mbimbiliya, co tuzibisa Njambi kubwaha.

2. Tunapande kulemesa bati Yehova?

Tunapande kulemesa lika Yehova mwafwa ikeye watutangele. (Kujombolola 4:11) Ngeci, tunapande kumuzema na kulemesa lika ikeye kwa kujeneka kupangesa tumponya.—Tandeni Isaya 42:8.

Kulemesa kwetu kunapande kupwa kwa kujela, kuje kwatambula Yehova. (Loma 12:1) Ngeci, tunapande kukabangeya mashiko endi. Cakumwenako, baje bazema Yehova bakakabangeya mashiko endi aje endeka bya bulo. Co lalo kubesi kulinga byuma bya kufwa ngwe kusipa makaya, kunwa bwala mu kutubakanesa nambe kupangesa bumbanda bwoshe-bwoshe mu ngila ya kuhenga.a

3. Bika bitunapande kulikwatasanena hamo na bakwetu mu kulemesa Yehova?

Ku biwano bitukakala nabyo calumingo na calumingo, ‘tukashangazala Yehova mu cikungulukilo.’ (Myaso 111:1, 2) Ngila imo itukashangazalelamo Njambi inapu kumwimbila myaso. (Tandeni Myaso 104:33.) Yehova ashaka ngwendi tukunguluke simbu yoshe mwafwa watuzema. Azibuka ngwendi kulinga ngoco kutukwasa tupwe ba kubwahelela myaka yoshe. Co lalo, ku biwano tukalitakamesa umo na mukwabo.

TONDESESENI

4. Kutwapandele kupangesa tumponya mu kulemesa Njambi

VIDIO: Kuma Njambi Watabesa Kupangesa Tumponya mu Kumulemesa Ndi? (3:26)

• Bika byalingiwile ku banu ba Njambi kusañulu mubashakele kumulemesa kupangesa kamponya?

Banu bamo bakapangesa tumponya mu kulemesa Njambi mwafwa bakasinganyeka ngwabo kulinga ngoco kubashwenyesa manene kuli ikeye. Kuma kupangesa kamponya kushwenyesa munu kuli Njambi ndi? Tandeni Kutuuka 20:4-6 na Myaso 106:35, 36. Kutundaho, simutwiyeni ha bihula binatako:

• Tumponya muka tubakapangesa banu mu kulemesa?

• Yehova akalizibi bati mwakamono banu bapangesa tumponya mu kumulemesa?

• Yeni mwamona bati kupangesa tumponya mu kulemesa?

5. Kulemesa lika Yehova kutupatula ku bilongesa bya makuli

VIDIO: Busunga Bunanjipatula (5:16)

Tandeni Myaso 91:14, na kusimutwiya ha cihula cinatako:

• Yehova natukulahesa ngwendi atulingila bika nga tumuzema na kulemesa lika ikeye?

6. Tukalemesa Njambi ku biwano bya cikungulukilo

Ku biwano, tukalemesa Yehova, co lalo tukalitakamesa umo na mukwabo mutukembi na kukumbulula. Tandeni Myaso 22:22, na kusimutwiya ha bihula binatako:

• Mukalikuu bikumbululo bimukazibi ku biwano ndi?

• Kuma neni mushaka kukakumbululako ndi?

7. Yehova abwahelela nga tulekako bakwetu bitunalilongesa

Twasa kupangesa bingila bya kuliseza-seza mangana tulekeko bakwetu busunga butunalilongesa mu Mbimbiliya. Tandeni Myaso 9:1 na 34:1. Kutundaho, simutwiyeni ha cihula cinatako:

• Byuma muka bimunalilongesa mu Mbimbiliya bimushaka kulekako bakweni?

SIMPI YAKAMA

Twasa kuzibisa Ishamatanga yetu kubwaha nga tulemesa lika ikeye na kumushangazala ku biwano bya cikungulukilo na kulekako bakwetu bitunalilongesa mu Mbimbiliya.

Kwitulukamo

• Twasa kuzibuka bati mwakulemesela Njambi mu ngila yaibwa?

• Bika bitunapande kulemesela lika Yehova?

• Bika bitunapande kulikwatasanena na bakwetu mu kulemesa Njambi?

WANENI BIKWABO

Tandeni ñanda ya “Njapatuka ku Bundungo bwa Kulemesa Tumponya” mangana mumone byakwasele munakazi umo ecele kulemesa tumponya.

“Mbimbiliya Ikatengulula Buyoye bwa Banu” (Kaposhi ka Kukengela ka July 1, 2011)

Bika bimikwasa mangana mukumbulule-kumbulule ku biwano?

“Shangazaleni Yehova mu Cikungulukilo” (Kaposhi ka Kukengela ka January 2019)

Biwano bya cikungulukilo byakwasele bati mukwenje umo nameme kwamukaluwilile kukunguluka?

Yehova Wanjakele Mbunge (3:07)

Banu babangi ngwabo cilindakano cimanena bulombelo bwa baka-Kilistu. Kuma tunapande kupangesa cilindakano mu kulemesa ndi?

“Mwafwa Bika Bakaleho ba Yehova Kubesi Kupangesa Cilindakano mu Kulemesa Njambi?” (Ñanda ya ha webusaiti)