Mwasa Kuzibuka Bati Baka-Kilistu ba Busunga?

Banu babangi bakendeka ngwabo bapwa baka-Kilistu. Oloni byuma bibakulahela byaliseza-seza, co lalo futisi yabo nayo yaliseza-seza. Twasa kuzibuka bationi baka-Kilistu ba busunga?

1. Baka-Kilistu bapwa beya?

Baka-Kilistu bapwa bandongesi ba Yesu Kilistu nambe baka-kumukabangeya. (Tandeni Vilinga 11:26.) Twasa kuzibuka bati bandongesi ba Yesu? Yesu wendekele ngwendi: “Nga mwononoka bilongesa byange, mwa busunga munapu mu bandongesi bange.” (Yowano 8:31) Ngeci, baka-Kilistu ba busunga banapande kwononoka bilongesa bya Yesu. Bilongesa bya Yesu byemanene ha Mbimbiliya. Mu ngila imolika, bilongesa bya baka-Kilistu nabyo binapande kwimana ha Mbimbiliya.—Tandeni Luka 24:27.

2. Baka-Kilistu ba busunga bakamwesa bati cizemo?

Yesu walekele baka-kumukabangeya ngwendi: “Lizemeni umo na mukwabo, ngwe omwo njamizema.” (Yowano 15:12) Yesu wamwesele bati ngwendi wazemene bandongesi bendi? Wakele na kuwana simbu ya kusikama nabo na kubatakamesa na kubakwasa. Yesu watsililile baka-kumukabangeya. (1 Yowano 3:16) Mu ngila imolika, cizemo ca baka-Kilistu ba busunga keti ca ha kanwa lika embwe. Bakamwesa ngwabo balizema umo na mukwabo mu bilinga byabo.

3. Cipangi muka cibanapande kulinga baka-Kilistu ba busunga?

Yesu wanene bandongesi bendi cipangi. “Wabatumine kuya na kwambulula Bumwene bwa Njambi.” (Luka 9:2) Baka-Kilistu ba kulibanga kubakele na kwambulwila lika mu myela ya kulemesela. Bakele na kwambulwila ku mbunga na ku binjibo bya banu. (Tandeni Vilinga 5:42; 17:17.) Baka-Kilistu ba busunga ano matangwa nabo bali na kwambulula busunga bwa mu Mbimbiliya kwoshe-kwoshe kubawana banu. Bazema bakwabo mukemwo bakapangesa simbu yabo na nzili yabo mangana babambulwile muzimbu wa mu Mbimbiliya uje uzembeleka.—Mako 12:31.

TONDESESENI

4. Bakatondesesa busunga bwa mu Mbimbiliya

Banu bamo baje bakendeka ngwabo bapwa baka-Kilistu kubesi kukabangeya biyendeka Mbimbiliya. Kengeni VIDIO na kusimutwiya ha cihula cinatako.

VIDIO: Bulombelo bwa Baka-Kilistu Babujwalesele Bati? (5:11)

• Baka-Kilistu ba makuli banonowesa bati banu kulilongesa busunga bwalongesele Yesu?

Yesu walongesele busunga bwa mu Lijwi lya Njambi. Tandeni Yowano 18:37, na kusimutwiya ha cihula cinatako:

• Kwesekesa na majwi a Yesu, twasa kuzibuka bati ‘baje banakundama ku busunga’?

5. Bakambulula busunga bwa mu Mbimbiliya

Simbu kanda Yesu eluke mwilu, wanene bandongesi bendi cipangi cije cibali na kupanga na matangwa ano. Tandeni Mateo 28:19, 20, na Vilinga 1:8. Kutundaho, simutwiyeni ha cihula cinatako:

• Yesu wendekele ngwendi cipangi ca kwambulula cikahwa litangwa muka? Wendekele lalo ngwendi ciketa kuli?

6. Bakapangesa bibakalongesa

Bika byalingisile munalume umo wa lizina lya Tom endeke ngwendi nawana baka-Kilistu ba busunga? Kengeni VIDIO na kusimutwiya ha bihula binatako.

VIDIO: Njecelele Kukulahela Bulombelo Bwoshe-Bwoshe (5:20)

• Kwesekesa na vidio, bika byalingisile Tom ecele kukulahela bulombelo bwoshe-bwoshe?

• Bika byamulingisile akulahele ngwendi nawana busunga?

Bilinga byakala na nzili kutubakana majwi. Tandeni Mateo 7:21, na kusimutwiya ha cihula cinatako:

• Kwesekesa na majwi a Yesu, byuma muka bya seho manene, bitukendeka indi bitukalingi?

7. Balizema umo na mukwabo

Kuma baka-Kilistu basa kwaka buyoye bwabo mu bushonde mwafwa ya bakwabo ndi? Kengeni VIDIO na kusimutwiya ha bihula binatako.

VIDIO: Washakele Kutsila Mukwabo (2:55)

• Bika byalingisile Ndolome Likhwide ake mwonyo wendi mu bushonde omwo bashakele kutsiya Ndolome Johansson?

• Kuma omu keti mukemwo mwanapande kulinga muka-Kilistu ndi?

• Bandongesi ba Yesu nambe ngwetu baka-Kilistu ba busunga bamona bati banu ba muyati weka nambe baje batunda ku lifuti lyeka?

• Basa kumwesa bati ngwabo balizema umo na mukwabo nga kunakatuka nzita?

SIMPI YAKAMA

Baka-Kilistu ba busunga bakala na cizemo ca busunga, co lalo bakambulula busunga bwa mu Mbimbiliya.

Kwitulukamo

• Byuma bibakulahela baka-Kilistu byemana haka?

• Cifwa muka cibakala naco baka-Kilistu ba busunga cije citulingisa tubazibuke?

• Cipangi muka cibakalingi baka-Kilistu ba busunga?

WANENI BIKWABO

Beya bali na kulinga mwoshe mubasela mangana bakabangeye bilongesa bya Yesu na mwanja wendi?

Yetu Bakaleho ba Yehova Twapwa Beya? (1:13)

Bika byakwasele sisita umo wa Katolika awane busunga?

“Bakumbulwile Bihula Byoshe Binjakele Nabyo Kupangesa Mbimbiliya” (Kaposhi ka Kukengela ka April 1, 2014)

Kengeni ei vidio imwesa baka-Kilistu ba busunga mubakamwesela cizemo kuli bakwabo baje bali mu bukalu.

Kukwasa Bandolome Betu Baje Banaliwana na Bukalu bwa Cishitukila—Mutamba wa Vidio (3:57)

Byuma muka byendekele Yesu bije bibali na kulinga baka-Kilistu ba busunga ano matangwa bije bibalingile lalo na baka-Kilistu ba kulibanga?

“Twasa Kuzibuka Bati Baka-Kilistu ba Busunga?” (Kaposhi ka Kukengela ka March 1, 2012)