CILONGESA 52
Bika Bitunapande Kwakela Mbunge ku Zalesi na Sholwesi Yetu?
Munu na munu ali nomu mwashaka kuzalela na kusholokela. Nga mukabangeya binangulo bya mu Mbimbiliya omwo mwangula bimuzala nomu mumusholokela, co muzibisa Yehova kubwaha. Tusimutwiyeni ha binangulo bimo bya mu Mbimbiliya bije byendeka ha zalesi na sholwesi.
1. Binangulo muka bitunapande kukabangeya omwo twangula bituzala nomu mutusholokela?
Tunapande ‘kuzala buzalo bunapande na kuzala mu kasingimiko na mana.’ Co lalo tunapande kupwa ba kujela mangana tumwese ngwetu ‘tunalyana kuli Njambi.’ (1 Timateo 2:9, 10) Tusimutwiyeni ha binangulo biwana binatako: (1) Tunapande kuzala ‘buzalo bunapande.’ Ngwe mumunanangukila ku biwano byetu, bangamba ba Yehova bakala na zalesi ya kuliseza-seza. Oloni zalesi yetu na sholwesi ya biñambu byetu ikamwesa kasingimiko kuli Njambi. (2) Kuzala ‘mu kasingimiko’ kulumbununa ngwabo kutwapandele kuzala mu ngila ije ikatula mashungu a kulilala, nambe kuzala mu kulyalesa. (3) Tumwesa “mana” mu kuzala nga kutulingi bizalo byoshe byabiha bijako kubanga netu tukale nabyo. (4) Sholwesi yetu inapande kumwesa ngwayo ‘tunalyana kuli Njambi,’ co na banu banapande kumona ngwabo tuli na kulemesa Njambi wa busunga.—1 Kolinte 10:31.
2. Bika bitunapande kwakela bandolome na bandokazi mu bisinganyeka omwo twangula byakuzala?
Tunasa kulyangwila bitushaka kuzala. Oloni simbu kanda twangule byakuzala, tunapande kusinganyekesesa mubalizibila bakwetu mubamona mutusholokela. Ngeci, tukalingi mwoshe mutwasela mangana keti tutanwise bakwetu. Tukashaka ‘kulinga byuma bije bizibisa bakwetu kubwaha mangana tubatunge.’—Tandeni Loma 15:1, 2.
3. Sholwesi yetu yasa kulingisa bati bakwetu bashake kulemesa Yehova?
Tunapande kuzala mwamubwa simbu yoshe. Oloni tunapande kwaka manene mbunge ku sholwesi yetu nga tuya ku biwano nambe mu kwambulula. Kutushaka kwonowesa banu kutambula muzimbu wa seho utubambulwila. Ngeci, sholwesi yetu inapande kulingisa banu bashake kulilongesa busunga na kumwesa ‘bubwa bwa bilongesa bya Njambi, Mwobole wetu.’—Tito 2:10.
TONDESESENI
Mwasa kuzibuka bati indi zalesi na sholwesi yeni inapande ha kupwa muka-Kilistu?
Sholwesi yetu yasa kumwesa indi twasingimika baje bali na moko. Nameme Yehova akamono bili mu mbunge yetu, oloni sholwesi yetu nayo inapande kumwesa ngwayo twamusingimika
4. Sholwesi yaibwa imwesa kasingimiko kuli Yehova
Cuma muka cakama cinapande kutulingisa twake mbunge ku zalesi na sholwesi yetu? Tandeni Myaso 47:2, na kusimutwiya ha bihula binatako:
Kuzibuka ngwetu tukemanena Yehova kunapande kutulingisa tuzale bizalo bya kufwa bati?
Mumona bati, kuma tunapande kwaka bene mbunge ku zalesi na sholwesi yetu omwo tuya na kukunguluka nambe mu kwambulula ndi? Mwafwa bika?
5. Bika bitukwasa twangule mwamubwa byakuzala nomu mutusholokela?
Bizalo byetu, ipwe bya ndando ya helu nambe ya kwisi, binapande kupwa bya kujela. Co lalo binapande kwendelela na byuma bitulinga ha simbu oyo. Tandeni 1 Kolinte 10:24 na 1 Timateo 2:9, 10. Kutundaho, simutwiyeni ha byuma bitulingisa tujeneke kuzala . . .
bizalo bya mazilo nambe bije kubyapandele ha simbu oyo.
bizalo bya kukwata manene, bya kuhwalala, nambe bije byasa kwindula mashungu a kulilala.
Nameme baka-Kilistu kubesi mwisi ya mashiko a Mosesa, oloni abakwasa kumona byuma mwakabimwena Yehova. Tandeni Kwituluka mu Mashiko 22:5, na kusimutwiya ha cihula cinatako:
Mwafwa bika banalume kubapandele kuzala mu ngila ije ibalingisa basholoke ngwe banakazi, nambe banakazi basholoke ngwe banalume?
Tandeni 1 Kolinte 10:32, 33 na 1 Yowano 2:15, 16. Kutundaho, simutwiyeni ha bihula binatako:
Mwafwa bika tunapande kwaka mu biyongola batwatunga nabo nambe bandolome na bandokazi betu mu cikungulukilo, omwo twangula byakuzala nomu mutusholokela?
Zalesi na sholwesi muka yalisala kumwakala?
Mumona bati, kuma muka-Kilistu napande kuzala nambe kusholoka ngoco ndi? Mwafwa bika?
Twasa kuzibisa Yehova kubwaha ku mbunge nameme tuzala na kusholoka mu bingila bya kuliseza-seza
BAMO BAKENDEKA NGWABO: “Njasa kulizalela byoshe-byoshe binjishaka.”
Yeni mumona bati? Mwafwa bika?
SIMPI YAKAMA
Nga tusholoka mu ngila inapande, co tumwesa kasingimiko kuli Yehova na ku bakwetu.
Kwitulukamo
Mwafwa bika Yehova ashaka ngwendi tuzale mu ngila inapande na kusholoka mwamubwa?
Binangulo muka bitukwasa omwo twangula byakuzala nomu mutusholokela?
Sholwesi yetu yasa kulingisa banu bamone bati kulemesa kwetu?
WANENI BIKWABO
Bizalo bimuzala bilingisa banu bamimone bati?
Singanyekeseseni ha bukalu butundamo nga mulisona ha mubila.
“Mbimbiliya Yendeka Bika ha Kulisona ha Mubila?” (Ñanda ya ha webusaiti)
Binangulo muka bikwabo bya mu Mbimbiliya bije bitukwasa omwo twangula byakuzala?
“Zalesi Yeni Ikana Bumpau Kuli Njambi Ndi?” (Kaposhi ka Kukengela ka September 2016)
Bika byakwasele munakazi umo akale na biyongola byabibwa ha sholwesi ya bakwabo?
“Zalesi na Sholwesi ya Bamo Yakele na Kunjitanwisa” (Toneni! ya December 22, 2003)