KUSHANGUMUKA KUSIMUTWIYA NA BANU
CILONGESA 6
Kusimpa
Cinangulo: “Njambi yetu watukwasele tusimpe mangana tumileke muzimbu waubwa.”—1 Tesa 2:2.
Bika Byalingile Yesu?
1. Kengeni VIDIO, nambe kutanda Luka 19:1-7. Kutundaho, singanyekeseseni ha bihula binatako:
Bika byesi kulingisile banu bamo bayengule Zakeyasi?
Oloni bika byalingisile Yesu amwambulwile muzimbu waubwa?
Bika Bitulilongesa Kuli Yesu?
2. Tunapande kupwa ba kusimpa asina twasa kwambulula muzimbu wa Bumwene ku banu boshe.
Tembwinineni Yesu
3. Kulaheleni Yehova. Sipilitu ya Njambi yakwasele Yesu ambulule. Neni yasa kumikwasa. (Mate 10:19, 20; Luka 4:18) Lombeni Yehova amikwase kupwa ba kusimpa mangana mwase kwambulwila banu bamutewa.—Bili 4:29.
4. Keti musompe banu. Hamo twasa kukwata-kwata ku masinde kwambulwila banu bamo mwafwa ya sholwesi yabo, mubabazibukila mu citingitingi, byuma bibali nabyo, futisi yabo nambe mwafwa ya byuma bibakulahela. Oloni anukeni ngweni:
Yehova na Yesu bakamono bili mu bimbunge bya banu, oloni yetu kutwasa.
Yehova asa kukwasa munu woshe-woshe.
5. Pweni ba kusimpa, oloni kaleni na kasingimiko na kupwa ba kunyanyama. (Mate 10:16) Keti mulinge bimata. Nga shendi kutambula muzimbu waubwa nambe nga munanguka ngweni mwasa kukala mu bushonde, co waneni ngila yaibwa ya kumaneselamo kusimutwiya nendi.—Visi 17:14.