Mbimbiliya Ikatengulula Buyoye Bwa Banu

Bika byamwene munalume umo wa ku Scotland kupwa bya seho manene kutubakana mingoso ya bimbongo byabingi? Bika byakwasele munalume umo wa ku Brazil ecele futisi ya bupangala na kusipa cocaine? Bika byakwasele munalume umo wa ku Slovenia ecela kunwa manene bwala? Tandeni bibanendeka aba banu.

“Buyoye bwange bwamonekele ngwe bwapwile bwabubwa.”—JOHN RICKETTS

MWAKA WA KUSEMUKA: 1958

LIFUTI MWANASEMUKILA: SCOTLAND

YOYESI YENDI YA LAJA: MUNALUME WA MINGOSO YA BIMBONGO BYABINGI

BUYOYE BWANGE BWA KUNIMA: Njasemukilile mu naanga ya kufuka. Batate bapwile maswalale ba Britain, ngeci twakele na kujalozoka manene. Mutwatundile ku Scotland twajalukilile ku England, ku Germany, ku Kenya, ku Malaysia, ku Ireland, na ku Cyprus. Munjakele na myaka 8, njaile mu bodiñi mu Scotland. Mu kwita kwa simbu, njakamanesele sikola yange ha Yuniveziti ya Cambridge.

Munjakele na myaka 20, njashangumukile mingoso yange ya kulandesa mazi (petroleum) ije injalingile ha myaka 8. Hakulibanga njalingilile eci cipangi ku South America, co mu kwita kwa simbu njakacilingile ku Africa na ku Australia. Munjajalukilile ku Australia, njakashangumukile kampani, oloni mu kwita kwa simbu njailandesele.

Bimbongo binjawanene munima ya kulandesa ije kampani byanjilingisile njecele cipangi oku njili na myaka 40. Njapangesele ei simbu mu kwendangana. Njazengulukile Australia na honda lubali, co njalizengele mu kaye koshe. Buyoye bwange bwamonekele ngwe bwakele mwamubwa.

MBIMBILIYA MUYATENGULWILILE BUYOYE BWANGE: Nameme simbu kanda njecele cipangi, njakele na kutonda ngila ya kukandelelelamo Njambi mwafwa ya buyoye bunjakele na kulikuwa. Njashangumukile kuya ku ceci ya Anglican muje munjakolelele. Oloni bwingi bwa bilongesa bya muje mu ceci kubyemanene ha Mbimbiliya. Ngeci njashangumukile kulikwatasana na bulombelo bwa Mormons, oloni njafutukile ku mbunge mwafwa kubakulahelele manene Mbimbiliya.

Litangwa limo, Bakaleho ba Yehova bakutotele ha cikolo cange. Mubasimutwiiye nange, njamwene ngwange bilongesa byabo byemana ha Mbimbiliya. Banjitandeleleko mukanda wa 1 Timothi 2:3, 4. Awa mavesi endeka ngwawo Njambi “ashaka ngwendi banu ba miyati yoshe boboke na kweta ha kukala na mangana a busunga a kuzibuka busunga.” Njabwahelelele manene omwo baje Bakaleho basindakanene manene ha simpi ya kwendeka ngwayo keti mangana lika oloni mangana a busunga a mu Mbimbiliya.

Kulilongesa Mbimbiliya na Bakaleho ba Yehova kwanjikwasele njikale na awa mangana a busunga. Cakumwenako, njalilongesele ngwange Njambi na Yesu kubapwile mutamba wa binjambi batatu, oloni munu na munu walimanena. (Iwano 14:28; 1 Korinte 11:3) Njabwahelele manene munjalilongesele obu busunga. Njalubalele munjasinganyekele ngwange kunima njakele na kubiisa simbu yaingi kushaka kuzibisisa byuma bije kubibwaha kubizibisisa.

Kukwetile na simbu, njashangumukile kukunguluka na Bakaleho ba Yehova. Njazibile kubwaha kumona cizemo cili mukati kabo na futisi yabo yaibwa. Cizemo cabo ca busunga canjilingisile njikulahele ngwange njinawana bulombelo bwa busunga.—Iwano 13:35.

BUBWA BUNATUNDUMO: Munima ya kunjimbwitika, njawanene munakazi wamubwa wa lizina lya Diane. Wapwile Mukaleho wa Yehova kushwa ku bwanike bwendi, co wakele na bifwa byabibwa bije binjashakele manene. Mu kwita kwa simbu, twalyambatele. Kunapu kubezika kwa kutunda kuli Yehova kuwana Diane uje napu kabusamba wamubwa, co lalo ali na kunjikwasa manene.

Nange na Diane twashangumukile kukala na lishungu lya kukapangela kuje kuli bujene bwa baka-kwambulula muzimbu waubwa wa mu Mbimbiliya. Mu 2010 twajalukilile kuno ku Belize ku Central America. Tunawana banu baje bazema manene Njambi, co lalo bashaka kulilongesa byendi.

Kulilongesa busunga hali Njambi na Lijwi lyendi Mbimbiliya kunanjilingisa njikale mu kwoloka. Ha kupwa muka-kwambulula muzimbu wa simbu yoshe, njabwahelela mwafwa njalongesa banu babangi Mbimbiliya. Kukwesi cuma cikazibisa kubwaha ku mbunge ngwe kumona busunga bwa mu Mbimbiliya butengulula kuyoya kwa munu ngwe mubunatengulwila yange. Hanoni njinawana ngila yaibwa ya kukandelelelamo Njambi mwafwa ya buyoye bunjili na kulikuwa.

“Banjimwesele manene ngozi”—MAURÍCIO ARAÚJO

MWAKA WA KUSEMUKA: 1967

LIFUTI MWANASEMUKILA: BRAZIL

YOYESI YENDI YA LAJA: FUTISI YA BUPANGALA

BUYOYE BWANGE BWA KUNIMA: Njakolelele mu Avaré, mu mbongi yaindondo ije yakala mu São Paulo. Bwingi bwa baje bakalamo bapanga.

Batate batsile simbu kanda njisemuke. Ku bwanike, njakele na kuzala mu bizalo bya banana ha simbu ibakele na kutunda ha njibo. Njashangumukile kulinga byuma ngwe munakazi, co banu bashangumukile kunjimona ngwabo njikalilala na bakwetu banalume. Mu kwita kwa simbu, njashangumukile kulilala na bakwetu banike na banalume ba kukola.

Munjakele na myaka ya kukokela ku 20, njashangumukile kutonda banalume na banakazi ba kulilala nabo. Njakele na kubawana ku myela ya kunwila bwala, ku myela ya kukinina butsiki na ku maceci. Ha simbu ikwakele na kukala bilika, njakele na kuzala ngwe munakazi, co njiya na kukina ku sikola. Njatsimanene manene.

Babusamba bange bapwile banalume baje bakalilala na bakwabo banalume, mahule na baje bakapangesa mambanda a kupendesa. Bamo banjikokweyeye ngwabo njishangumuke kusipa cocaine, co kukapwa muje kunjasele kukala kwa kujeneka kusipa. Simbu imo twakele na kusipa butsiki bwoshe. Simbu imo njakele na kukala kwa likalyange na kusipa litangwa lyoshe lya mutunu. Njayondwele manene, co banu bashangumukile kwendeka ngwabo njili na mushongo wa AIDS.

MBIMBILIYA MUYATENGULWILILE BUYOYE BWANGE: Ha simbu ei, njaliwanene na Bakaleho ba Yehova. Banjimwesele manene ngozi. Banjitandelele mukanda wa Loma 10:13, uje wendeka ngwawo: “Woshe asana ha lizina lya Yehova akoboka.” Awa majwi anjikwasele kumona seho ya kusana ha lizina lya Yehova. Kakangi munjakele na kusipa cocaine butsiki bwoshe, njakele na kushokolola njanena yange na kutala mwilu na kulombela kuli Yehova oku njili na kulila ngwange anjikwase.

Munjasinganyekele hali banana baje bakele na kuziba kubabala ku mbunge mwafwa ya kunjimona njilibiisa yange babenya na mambanda a kupendesa, njalyangwilile ngwange njecela kupangesa mambanda a kupendesa. Kukwetile simbu yailaha, njatabele kulilongesa Mbimbiliya na Mukaleho. Wanjilekele ngwendi cilongesa cange ca Mbimbiliya cinjikwasa njilikele kupangesa mambanda a kupendesa, co cili bene canjikwasele.

Munjatwaleleleho kulilongesa Mbimbiliya, njanangukile ngwange njapandele kutengulula futisi yange. Cuma canjikaluwilile manene kucecela capwile futisi ya kulilala na bakwetu banalume, mwafwa njaishwile laja. Oloni cuma cimo canjikwasele capwile kwecele kulikwatasana na banu ba bilinga bya ngoco. Njecelele kulikwatasana na babusamba bange ba laja na kwecela kuya ku myela ya kunwila bwala na ku myela ya kukinina butsiki.

Nameme kukwapwile kwakwasi kwecela futisi yange ya laja, oloni kuzibuka ngwange Yehova wanjaka mbunge, co lalo azibuka kulifwita kwange, kwanjizembelekele. (1 Iwano 3:19, 20) Mu twetele mu 2002, te njalikele laja futisi yange ya kulilala na bakwetu banalume, co mu mwaka wa kulifwa banjimbwitikile na kupwa Mukaleho wa Yehova.

BUBWA BUNATUNDUMO: Banana babwahelele manene munjashangumukile kutenguluka, ngeci nabo bashangumukile kulilongesa Mbimbiliya. Calubinda, kutunda haje bene banabinji mushongo wa kalepa. Nameme ngoco, banatwalelelaho kuzema Yehova na kulilongesa busunga bwa mu Mbimbiliya.

Ha myaka 8 ineti, bwingi bwa simbu yange njinaipangesa mu cipangi ca simbu yoshe ca kulongesa bakwetu Mbimbiliya. Kwendeka lika busunga, simbu imo njikalifwiti kulwisa mashungu amabi. Oloni kukanjisimpisa manene kuzibuka ngwange njasa kuzibisa Yehova kubwaha nga kunjilingi binjishungwiya.

Kulikuta busamba bwa kukanyama na Yehova na kuyoya mu ngila ije imuzibisa kubwaha kunanjilingisa njilizibe ngwange nange nji munu wa seho. Ha simbu ino njinapu wa kubwahelela.

“Njampwile mungomo wa kutubika.”—LUKA ŠUC

MWAKA WA KUSEMUKA:1975

LIFUTI MWANASEMUKILA: SLOVENIA

YOYESI YENDI YA LAJA: MUKA-KUNWA MANENE BWALA

BUYOYE BWANGE BWA KUNIMA: Njasemukilile mu nganda yakama ya mu Slovenia ya Ljubljana. Kushwa ku bumbututu bwange, buyoye bwakele mwamubwa. Oloni byuma byatengulukile munjakele na myaka iwana. Batate balitsiile. Munima yobu bukalu, banana bakeboni bakele na kupanga na nzili mangana bawane byakulya bya kutushuka nabyo, yange na yayange.

Munjakele na myaka 15, njakakele na bakuku. Njashakeleko manene mwafwa babusamba bange babangi twalyatele nabo. Co lalo njakele na kulinga byuma munjashakelele kutubakana munjakele kuli banana. Munjakele na myaka 16, njashangumukile kulikwatasana na banu baje bakele na kunwa bwala ku mamaneselelo a calumingo. Njalelele binkambu byabilaha, njashangumukile kuzala mu bushaki na kusipa.

Nameme njapangesele mambanda a kupendesa a kuliseza-seza, oloni njashakele manene kunwa bwala mwafwa njakele na kulikuwabwo. Hakulibanga, njakele na kunwa tu binganja twakutanda lika, oloni kukapwa muje njashangumukile kunwa mitumwa yaingi ha simbu imolika. Njazibukile mwakulikolesela mangana banu keti bananguke ngwabo njinapende manene. Kakangi munu kasele kuzibuka ngwendi njinanu kubanga mwaziba cuku citunda mukanwa. Nameme ngoco, wahi wakele na kuzibuka ngwendi njinanu binyu na bwala bwabwingi manene, bukeboni obu bwa kukumbasana na bwala bwa kupendesa manene.

Bisimbu byabingi yange njakele na kukwasa bakwetu base kwenda nga tutunda ku myela ya kunwila, oloni kakangi yange njakele na kunwa manene bwala kubatubakala. Litangwa limo njazibile kabusamba kange anjendeka ngwendi njapwile mungomo wa kutubika. Ei endekesi ya kushaula bakaipangesa mu ndaka ya Slovenia kutalesa ku munu uje akanu manene kutubakana bakwabo. Awa majwi anjizibisile manene kubaba ku mbunge.

Njashangumukile kusinganyekesesa ha byuma binjakele na kulinga mu kuyoya kwange. Njalizibile ngwange nji wangoco. Kwasholokele ngwe byoshe binjakele na kulinga kubyakele na seho.

MBIMBILIYA MUYATENGULWILILE BUYOYE BWANGE: Ha simbu ei, njanangukile ngwange umo wa banu banjakele na kukobela nabo sikola watengulukile na kupwa munu wamubwa. Njashakele kuzibuka byuma byamulingisile atenguluke, co njamulanyele ngwange tukanwe kofi. Mutwakele na kusimutwiya, wanjilekele ngwendi washangumukile kulilongesa Mbimbiliya na Bakaleho ba Yehova. Wanjilekeleko byuma bimo byakele na kulilongesa. Byoshe byapwile byabiha kuli yange mwafwa kunjakolelele mu bulombelo bwoshe-bwoshe. Njashangumukile kukunguluka na Bakaleho na kulilongesa nabo Mbimbiliya.

Kulilongesa Mbimbiliya kwanjikwasele njizibuke biñanda bya seho byabingi bya busunga bije byanjishongangeyeye. Cakumwenako, njalilongesele ngwange tuli na kuyoya mu matangwa abanendeka mu Mbimbiliya ngwabo “matangwa a mamaneselelo.” (2 Timothi 3:1-5, NWT.) Njalilongesele lalo ngwange Njambi ololo anyongesa banu bababi ha lifuti-libu na kutabesa banu bababwa balikuwe kuyoya myaka yoshe mu Paradaisi. (Myaso 37:29) Njakele na lishungu lyakama lya kutengulula futisi yange mangana nange njikaliwane mukati ka banu bababwa.

Njashangumukile kulekako babusamba bange busunga bwa mu Mbimbiliya bunjakele na kulilongesa. Bwingi bwabo banjishendumwine munjabalekele binjalilongesele, oloni oku kwanjikwasele mu ngila ije kunjasinganyekele. Bibakele na kunjilinga byanjikwasele njimone ngwange kubapwile babusamba bababwa. Njanangukile ngwange njakele na futisi ya kunwa manene bwala mwafwa ya banu banjakele na kulikwatasana nabo. Bakebo bakele na kubandamena lika ngwabo bete kumamaneselelo a calumingo mangana baye na kunwa.

Njecelele kulikwatasana nabo, co njashangumuka kulikwatasana na Bakaleho ba Yehova baje bakele na kunjishongangeya kulinga byabibwa. Kukala mukati kabo kwakele na kunjitakamesa manene. Bazema Njambi mu busunga, co bakeseka mwoshe mubasela kukabangeya mashiko endi. Kamandondo-kamandondo, njecelele futisi yange yaibi ya kunwa manene bwala.

BUBWA BUNATUNDUMO: Njili na kukandelela manene kuli Yehova mwafwa hano njasa kupwa wa kubwahela kwa kujeneka kunwa bwala. Yanini munjinesi kufwila hano ngwe njatwaleleleleho na futisi yange yalaja. Oloni hano buyoye bwange buli oni mwamubwa.

Ha myaka 7 ineti, njabezika kupangela ha ofisi ya munango ya Bakaleho ba Yehova ya mu Slovenia. Kuzibuka Yehova na kumupangela kunanjikwasa njizibuke binjili na kuyoyela.