Njambi Necelela Bika Tuyando?

NJAMBI AKALIZIBI BATI MWAKATUMONO TUYANDA?

Kashimbi: Ba Chipango, mulibati? Njabwahelela kumiwana ha njibo.

Chipango: Njili mwamubwa. Nange njabwahelela kumimona.

Kashimbi : Munjezile, twasimutwiiye mwakalizibila Njambi mwakatumono tuyanda.a Co mwanjilekele ngweni mwakele na kutonda manene kuzibuka byei ñanda, maneneni kutunda hababulumukilile banoko mu monde ya ha tapalo. Hano baliko bati?

Chipango: Simbu imo inaho ngano, simbu imo ngoco bene. Ikeyeni lelo baliko bwino.

Kashimbi: Chabwaha kuziba ngoco. Keti kwakwasi kukolesa mu bukalu bwa cifweci.

Chipango: Mukemwo bene. Bisimbu bimo njikalihula indi tuyando twabo tanga tukahwa.

Kashimbi: Mukemwo bene, kukwabihile kulihula ngoco. Nga mucanuka, munjezile njamisezelele cihula cimwesa ngwaco, ‘Mwafwa bika Njambi necelela tuyando tutwaleleleho kukalako nga ali na nzili ya kutumanesa?’

Chipango: Eyo, njicanuka.

Kashimbi: Simbu kanda tumone muinakumbulwila Mbimbiliya eci cihula, tucitulukeni tahi mu byuma bitunasimutwiiye.

Chipango: Emwane.

Kashimbi: Twalilongesele ngwetu munalume umo wa kulongwa wa mu simbu ibasonekele Mbimbiliya nendi walihwile byanecelela Njambi tuyando. Oloni Njambi kamupayele nambe kumuleka ngwendi wakele na likulahelo lyalindondo.

Chipango: Kunjazibukile ngoco.

Kashimbi: Twalilongesele lalo ngwetu Yehova Njambi wazinda kutumona oku tuyanda. Cakumwenako, Mbimbiliya ngwayo bangamba bendi mubaliwanene na tuyando, “walizibile kubihya.”b Kuzibuka ngwetu Njambi akatuzibila mema ku mbunge mutukaliwana na tuyando kutuzembeleka, indi bati?

Chipango: Manene bene.

Kashimbi: Kutundaho, twasimutwiiye ngwetu ha kuwana ngwe Ishamatanga yetu ali na nzili yakama, asa kumanesa tuyando simbu yoshe-yoshe.

Chipango: Ohoni hakeho kunjizibisisa mwamubwa. Nga Njambi ali na nzili ya kumanesa byuma byoshe ebi byabibi, mwafwa bika nabyecelela bitwaleleleho kukalako?

IYA WENDEKELE BUSUNGA?

Kashimbi: Ha kulinga tuwane cikumbululo ku cihula ceni, tusimutwiyeni tahi ha ñanda imo ili mu mukanda wa kulibanga mu Mbimbiliya, mukanda wa Kushangumuka. Mwazibaho laja muzimbu wa Adama na Eva na muti ubababindikile kulya ndi?

Chipango: Eyo, njalilongeselewo ku ceci. Ngwabo Njambi wababindikile kulya bushuka bwa muti umo, oloni bakebo balile.

Kashimbi: Mukemwo bene. Co tusimutwiyeni ha byuma byalingiwile simbu kanda Adama na Eva balinge bubi. Obyo byuma bitukwasa kuzibuka bituli na kuyandela. Yanini indi mwasa kutanda mukanda wa Kushangumuka capita 3 vesi 1 kutwala ha 5?

Chipango: Emwane. Ngwawo: “Oloni linyoka wapwile wa kunyanyama manene kutubakana tusitu boshe baje Shukulu Kalunga Njambi watangele, co wehwile munakazi ngwendi, ‘Kuma mwa busunga bene Njambi namileka ngwendi kesi mulye ku bushuka bwa ku muti woshe-woshe wa muno mu lihya ndi?’ Munakazi wamukumbulwile ngwendi, ‘Tunasa kulya ku bushuka bwa muti woshe-woshe wa mu lihya. Oloni ku bushuka bwa muti wa mukati ka lihya, Njambi watulekele ngwendi kesi tukalyeko, nameme kukwatako lika, nga tulingamo, co tutsa.’ Oloni linyoka wamukumbulwile ngwendi, ‘Omwo kesi mwa busunga, kumukatsi embwe! Njambi nendeka ngacije omwo nazibuka ngeci ku litangwa lije mukalyako mesho eni akatona, co mukalifwa na Njambi, mukazibuka bubwa na bubi.’”

Kashimbi: Njakandelela. Tusimutwiyeniko tahi aha ha mavesi. Cakulibanga, nangukeni ngweni linyoka wasimutwiiye na munakazi, Eva. Cisoneka cikwabo ca mu Mbimbiliya cimwesa ngwaco Satana Liyabolo ikeye wasimutwiiye nendi kupangesa linyoka.c Satana wehwile Eva bya lishiko lyabanene Njambi kutalesa ku muti umo. Kuma munananguka kashitiko kalekele Njambi ba Adama na Eva ngwendi batambula nga balya kuje ku muti?

Chipango: Wabalekele ngwendi batsa.

Kashimbi: Mukemwo bene. Co Satana mwamanesele kwihula Eva byowo muti, wendekeleko majwi amo a kubangeya Njambi. Wendekele ngwendi: “Kumukatsi embwe.” Aha Satana walumbunwine ngwendi Njambi wapwa muka-makuli.

Chipango: Ebi kanda njibizibeho.

Kashimbi: Satana mwatumbwile Njambi ngwendi muka-makuli, wakatwile ñanda ije yatondekele simbu yailaha kuimanesa. Musinganyeka ngweni bika kwatondekelele simbu yailaha?

Chipango: Hmm. Yanini.

Kashimbi: Oke, hamo njimyaneko cakumwenako. Acisinganyekeni ngweni litangwa limo njija na kumileka ngwange njili manene na nzili kumitubakana. Mulinga bati mangana mumwese ngweni muli manene na nzili kunjitubakana?

Chipango: Njimona kubanga tulingeko bimo.

Kashimbi: Mukemwo bene. Hamo tunesi kuwanako cuma cimo ca kulema na kumona indi iya asa kucikakula. Kumwesa indi iya ali na nzili kwakwasi, indi bati?

Chipango: Manene bene.

Kashimbi: Indi bati ngwe kunjimileke ngwange njili manene na nzili kumitubakana, oloni ngwange yange nji wa kulongwa, oloni yeni keti mu ba kulongwa? Kunesi kutukaluwila kuwana iya wa kulongwa mukati ketu, indi bati?

Chipango: Eyo, mukemwo.

Kashimbi: Kulongwa kukwapwile ngwe nzili yanasa kumwesa munu ngwendi ali nayo bwasi-bwasi, indi bati?

Chipango: Mukemwo.

Kashimbi: Ngeci, ngila lika ya kumaneselamo ei ñanda inapu kwecelela simbu ite mangana banu bamone ngwabo iya wa kulongwa mukati ketu.

Chipango: Omwo ngwe mukemwo.

Kashimbi: Co tumoneni lalo bibanendeka mu muzimbu utunatanda ku mukanda wa Kushangumuka. Kuma Satana walishashele ngwendi wakala manene na nzili kutubakana Njambi?

Chipango: Embwe.

Kashimbi: Ngwe mukemwo, ngwe kwapwile kwakwasi kuli Njambi kumwesa ngwendi Satana wakwisile. Oloni Satana wamwesele ngwe ikeye wa kulongwa, oloni Njambi keti wa kulongwa. Mu ngila imo, walekele Eva ngwendi, ‘Njambi namikwisi, binjikuleka yange bikebyo bya busunga.’

Chipango: Kuma!

Kashimbi: Ngeci, Njambi wamwene ngwendi ha kulinga ei ñanda ihwe, kubanga kwite simbu yailaha. Co mu kwita kwa simbu, kunesi kumoneka indi iya wendekele busunga na uje wakwisile.

ÑANDA YA SEHO

Chipango: Kuma butsi bwa Eva kubwamwesele ngwabwo Njambi wendekele busunga ndi?

Kashimbi: Eyo, bwamwesele ngoco. Oloni kuli bikwabo byalibungilile mu majwi endekele Satana. Taleni lalo ha vesi 5. Kuma munananguka byuma bikwabo byalekele Eva?

Chipango: Wendekele ngwendi nga alya buje bushuka, co mesho endi atona.

Kashimbi: Mukemwo. Co lalo ngwendi ‘alifwa na Njambi na kuzibuka bubwa na bubi.’ Ngeci, Satana wamwesele ngwendi Njambi wakele na kumina banu byuma bimo byabibwa.

Chipango: Kuma!

Kashimbi: Ei nayo yapwile ñanda yakama.

Chipango: Mu ngila muka?

Kashimbi: Satana mwendekele awa majwi wamwesele ngwendi Eva, na banu boshe bayoya mwamubwa manene kwa kujeneka Njambi kubatwamenena. Nei ñanda nayo, Yehova wazibukile ngwendi ngila yaibwa ya kuimaneselamo yapwile kwecelela Satana amwese indi byanendeka bya busunga. Ngeci, Njambi natabesa Satana ayule kano kaye ha simbu ya kupwamo. Mukemwo mu kaye munashulu tuyando, mwafwa Satana ikeye ali na kuyula kano kaye, keti Njambi.d Oloni kuli muzimbu waubwa.

Chipango: Muzimbu muka bene owo?

Kashimbi: Mbimbiliya inendekako ebi byuma bibali byabibwa manene hali Njambi. Cakulibanga, Yehova akatukwasa mutukaliwana na tuyando. Cakumwenako, zibeni majwi endekele Mwene Ndabiti abanasoneka ku mukanda wa Myaso 31:7. Ndabiti waliwanene na tuyando twatwingi. Oloni nangukeni byalekele Njambi mu lilombelo. Yanini indi mwasa kutanda ou mukanda?

Chipango: Emwane. Ngwawo: “Njikabwahelela na kujolela, omwo cizemo cobe cije kucesi kutenguluka. Unamono tuyando twange, yobe uzibuka ñababa yange.”

Kashimbi: Nameme Ndabiti waliwanene na tuyando, kuzibuka ngwendi Yehova wakele na kumona tuyando twoshe twakele na kuliwana natwo kwamuzembelekele. Kuma kuzibuka ngweni Yehova azibuka byoshe bitukaliwana nabyo na kubabala ku mbunge kutukazibi kuje kubesi kuzibuka bakwetu banu kumizembeleka ndi?

Chipango: Eyo mwane.

Kashimbi: Cuma cikwabo cacibwa eci, Njambi katwecelela tutwaleleleho kuyanda myaka yoshe. Mbimbiliya imwesa ngwayo ololo Njambi atundisako ciyulo cacibi ca Satana. Akamanesa byuma byabibi byoshe binalingiwa, kwambateselela na tuyando tumunaliwana natwo notu tubanaliwana natwo banoko. Yanini indi njasa kwija calumingo cijaho mangana njakumimwese bitulingisa tukulahele ngwetu ololo Njambi amanesa tuyando twoshe?e

Chipango: Cibwaha manene nga mulinga ngoco.