Tuvavoshe Twashaka Kututhzembeleka

Mwanuka thimbu imwawile hathi muvwanike ndi? Hamo mwapokokele livoko nambe kupwethuka mu livuli. Mwanuka muvamithzembelekelelemo vanyoko ndi? Hamo vamikushile ha mbandu na kumikutaho nanga. Mwalilile, oloni omwo vamithzembelekele, mwalithzivile mwamuvwa. Nga munu achili mwanike, vakamuthzembeleka thimbu yoshe.

Oloni vuyoye vukatenguluka omwo tuya na kukola. Vukalu vukalivwethzelela, cho vanu vaka-kututhzembeleka vakapu vavandondo. Oloni vakulunu muvakaliwana mu vukalu vumo, kuthzembeleka chakufwa ngwe mukusha mwanike ha mbandu nambe kumukutaho nanga, kakangi kuchethi kupanga. Tuchimoneni vyakumwenako vimo.

• Vamitundithaho laja chipangi ndi? Julian ngwendi muvamutundithile vipangi, walishoshomwenene. Walihwile ngwendi: ‘Njilela vati nanga yange? Vatha kunjitunditha vati chipangi hanima ya kupanga na ndthzili myaka yaingi?’

• Hamo mwathzeyele mwafwa ya kuthsa kwa vulo vweni. Raquel ngwendi: “Munalume wange mwanjithethzele ha vingonde 18 kunima, njalithzivile manene kuvavala ku mbunge. Njalithzivile ngwe mbunge yange yatavuka hakati. Njavinjile mu vithinganyeka na mu muvila. Njakele mu vishoti vyakama.”

• Hamo mwavinja mushongo wakama wa kujeneka kukanguka. Thimbu imo munatha kulithziva mwalithzivilile chivendthzi Yombi uje wendekele ngwendi: “Njinonwa, omwo njajuka kuyoya.” (Yombi 7:16) Indi hamo munatha kulithziva mwalithzivilile Luis wa myaka 80, uje wendekele ngwendi: “Thimbu imo njikalithzivi ngwe njavandamena lika litangwa lya kuthsa.”

• Mpamo neni muli na kushaka kumithzembeleka mwafwa ya kuthsitha munu imwathzema. Robert ngwendi: “Munange mwathsile mu monde ya mu fulai, ha kulivanga kunjakulahelele ngwange nathsi. Hanima, athinoni njilithzive kuvavala ku mbunge, kuje kuyatumbula Mbimbiliya ngwavo mukwale wa kuvambuka uje utiva ku mbunge.”—Luka 2:35.

Robert na Luis na Raquel na Julian vaje valiwanene mu vukalu vwakama, vawanene munu wa kuvathzembeleka wa kutuvakana vanu voshe. Njambi Muka-ndthzili Yoshe ikeye wavathzembelekele. Akathzembeleka vati? Neni atha kumithzembeleka nga muliwana mu vukalu ndi?