Mwamona Theho ya Kulongetha Vakweni Ndi?

1, 2. Mwafwa vika tunapande kukwatha vakwetu valilongethe vipangi vya Njambi?

YESU wakele na chipangi chakama cha kwambulula muthzimbu wauvwa wa Vumwene. Oloni wakele na kuwanako thimbu ya kulongetha vakwavo vapwe tunyungi na valongethi. (Mateo 10:5-7) Nameme Filipu wathzethzamene mu chipangi cha kwambulula, oloni wakwathele vana vendi va vambanda vawana valeke vakwavo vuthunga vwa mu Vithoneka. (Vili. 21:8, 9) Mwafwa vika oku kulongetha kwapwa kwa theho matangwa ano?

² Vanu vaje vali na kutambula muthzimbu wauvwa mu kaye mwoshe vali na kutuma. Vanu vavaha vaje kanda vavambwitike vanapande kuthzivuka theho ya kulilongetha Mbimbiliya ha kapandi. Vanapande lalo kulilongetha kwambulula muthzimbu wauvwa na kulongetha vakwavo vuthunga. Tunapande kushongangeya vandolome vali mu vikungulukilo vyetu vapange na ndthzili mangana vapwe vaka-kupangela nambe vakulunu. Vaka-Kilisitu va kukola ku sipilitu vanapande kwana vavaha “vilongetha vyavivwa” mangana vaye kulutwe mu vipangi vya ku sipilitu.—Vithi. 4:2.

KWATHENI VAVAHA VAWANE NDTHZILI NA MANA MU LIJWI LYA NJAMBI

3, 4. (a) Paulu wendekele ngwendi kulilongetha Mbimbiliya kwatha kutukwatha vati mu chipangi cha kwambulula? (b) Vika vitunapande kulinga thimbu kanda tushongangeye vakwetu kulilongetha Mbimbiliya ha kapandi?

³ Kulilongetha Mbimbiliya ha kapandi kwapwa vati kwa theho? Tuwana chikumbululo mu majwi a kapositolo Paulu athonekelele vaka-Kilisitu va ku Kolose. Wathonekele ngwendi: “Thimbu yoshe tukamilombelela, . . . tulomba Njambi ngechi amishulithe na mana a chithzango chendi na mana oshe na kuthzivithitha kwoshe kuje kwanamyana mundthzindthzime wendi. Athinoni mukatha kuyoya ngwe ku chithzango cha Mwene [Yehova,] cho thimbu yoshe mukatha kulinga vije vimuvwaheleletha. Kuyoya kweni kukaima vushuka vwavungi manene vwa miyati yoshe ya vipangi vyavivwa, cho mukakola mu mana eni a kuthzivuka Njambi.” (Kolo. 1:9, 10) Awa mana akewo apandele kukwatha vaka-Kilisitu va ku Kolose ‘kuyoya ngwe ku chithzango cha Mwene [Yehova,] cho thimbu yoshe vakathe kulinga vije vimuvwaheleletha.’ Echi chapandele kuvakwatha vatwaleleho kwima “vushuka vwavungi manene vwa miyati yoshe ya vipangi vyavivwa,” maneneni mu kwambulula muthzimbu wauvwa. Muka-kulemetha Yehova napande kulilongetha Mbimbiliya thimbu yoshe mangana apange mwamuvwa. Tunapande kukwatha vanu vatukalongetha Mbimbiliya vathzivithithe ovu vuthunga.

⁴ Tunapande tayi kuthzivuka theho ya chilongetha cha Mbimbiliya cha ha kapandi, athina twatha kushongangeya vakwetu kuchilinga. Tunapande kushaka kulilongetha Mbimbiliya ha kapandi. Ngechi munatha kulihula ngweni: ‘Nga njiwana vanu mu lihya vaje vendeke vyuma vije kuvilitombola na Mbimbiliya nambe kwihula vihula vyavikalu, njatha kuvakumbulula kutundilila mu Mbimbiliya ndi? Omwo njikatanda vya kulikoletha kwa Yesu na Paulu na vakwavo mu chipangi cha kwambulula, njikathinganyeka vukwathi vunjatha kuwanaho omwo njipangela Yehova ndi?’ Mana na vinangulo vya mu Lijwi lya Njambi vyatha kutukwatha tuvavoshe. Nga tuleka vakwetu vuvwa vutunawana mu kulilongetha Mbimbiliya ha kapandi, cho navo twatha kuvashongangeya vashangumuke kulilongetha Mbimbiliya ha kapandi.

5. Endekeniko vingila vimo vyakukwathelamo vavaha kulilongetha Mbimbiliya ha kapandi.

⁵ Munatha kwihula ngweni: ‘Njatha kukwatha vati munu injikalongetha Mbimbiliya apwe muka-kulilongetha Mbimbiliya thimbu yoshe?’ Munapande kushangumuka tayi kumumwetha mwakulivwahethela thimbu kanda mulilongethe. Munatha kumushongangeya atande viñanda vikwavo vya mu livulu lya Bibele I Lutañi Luli? na vithoneka vivanamwethamo. Mukwatheni alivwahethele viwano mangana akakumbulule. Mushongangeyeni kutandatanda mangazini a Kaposhi ka Kukengela na Toneni! oshe aje atuhuka. Nga Watchtower Library nambe Watchtower ONLINE LIBRARY muili mu ndaka yendi, cho mumwetheni mwakuipangethela mu kukumbulula vihula vya mu Mbimbiliya. Nga mukwatha munu imukalongetha Mbimbiliya mu ngila eyi, cho atha kushaka manene kulilongetha Lijwi lya Njambi ha kapandi.

6. (a) Mwatha kukwatha vati munu imukalilongetha nendi athzeme Mbimbiliya? (b) Vika vyanatha kulinga muka-kulilongetha Mbimbiliya nga ashangumuka kuthzema Mbimbiliya na mbunge yendi yoshe?

⁶ Kutwapandele kuthindiya munu alilongethe Mbimbiliya. Oloni tunapande kupangetha vinoma vyanatwana Yehova mangana tukwathe munu itukalilongetha nendi athzeme manene Mbimbiliya. Mu kwita kwa thimbu, uje munu atha kulithziva mwalithzivilile muka-kwimba uje wembile ngwendi: “Oloni ngechi mwange ni, mwamuvwa kukala kuyehi na Njambi. Shukulu Kalunga wa hakamwa ya vyoshe, njinamupwitha chimpaka change.” (Myatho. 73:28) Sipilitu ya Yehova ikwatha ou muka-kulilongetha Mbimbiliya wa kulikehetha.

KWATHENI VAVAHA VATHZIVUKE KWAMBULULA NA KULONGETHA

7. Yesu walongethele vati vaka-kwambulula muthzimbu wauvwa? (Kengeni chikupulo ha liputa 25.)

⁷ Ku Mateo kapetulu 10, kuli mashiko anene Yesu kuli tupositolo vendi vakupwa 12. Yesu kendekele vyavingivingi, oloni wendekele vyuma vivapandele kulinga.^[1] Tupositolo vatolililile mwamuvwa omwo Yesu wakele na kuvalongetha mwakwambulwila mu vutongwe. Kutundoho, tupositolo vaile na kwambulula. Omwo vatembwininine Yesu, navo vapwile valongethi vavavwa va vuthunga vwa mu Mbimbiliya. (Mateo 11:1) Netu twatha kukwatha vanu vatukalongetha Mbimbliya mangana vakale na vutongwe mu kwambulula muthzimbu wauvwa. Tumoneni vingila vivali vyakuvakwathelamo.

8, 9. (a) Yesu wakele na kuthimutwiya vati na vanu mu lihya? (b) Twatha kulongetha vati vaka-kwambulula vavaha ngwe mwalingilile Yesu?

⁸ Thimutwiyeni na vanu. Kakangi Yesu wakele na kuthimutwiya na vanu vya Vumwene. Chakumwenako, wathimutwiyiye mwamuvwa na munakathzi umo ku lithima lya Yakomba lije lyakele kuyehi na nganda ya Sikale. (Yowa. 4:5-30) Wathimutwiyiye na Mateo Levi, muka kutambula lithimu. Eyi ñanda kuvayendekele manene mu Viñanda vyavivwa, oloni Mateo watambwile muthzimbu wa Yesu, cho wapwile muka-kumukavangeya. Mateo na vakwavo vathzivile Yesu mwakele na kwendeka ha chiwano chakele ku Njuvo ya Mateo.—Mateo 9:9; Luka 5:27-39.

⁹ Thimbu ikwavo lalo, Yesu wathimutwiyiye mu chithzemo na Natanele uje wakele na viyongola vyavivi hali vanu va ku Nazaleta. Walingithile Natanele atengulule viyongola vyendi. Washakele kulilongetha vyavingi kuli Yesu uje wapwile kaNazaleta. (Yowa. 1:46-51) Ngechi netu tunapande kulongetha vaka-kwambulula vavaha mwakwendekela na vanu mu chithzemo.^[2] Vaje vatulongetha evi vyuma, vavwahelela manene omwo vamona vanu muvali na kutambwilamo muthzimbu mwafwa ya kwendeka navo mu chithzemo.

10-12. (a) Yesu wakelele vati mana ku vanu vaje vashakele kuthziva muthzimbu wauvwa? (b) Twatha kukwatha vati vaka-kwambulula vavaha vakale na vutongwe mu kulongetha vuthunga vwa mu Mbimbiliya?

¹⁰ Thzemeni chipangi cheni. Yesu wakele na thimbu yaindondo ya kulinga chipangi cha kwambulula. Oloni wakele na kuwanako thimbu ya kuthimutwiya na vanu vaje vashakele kuthziva muthzimbu wauvwa. Chakumwenako, Yesu walongethele vanu oku ali mu vwato. Ha thimbu oyo, wakwathele Petulu kuwana vithi vavangi, cho wamulekele ngwendi: “Tunde hano ukajevela vanu.” Majwi na vilinga vya Yesu vyakwathele vati? Petulu na vakwavo “vatutikile mato avo ku nunda, vathethzele vyoshe, cho vakavele Yesu.”—Luka 5:1-11.

¹¹ Nikondemo uje wakele na kupanga mu nkuta ya vaka-munga, nendi washakele vilongetha vya Yesu. Washakele kulilongetha vyavingi, oloni kashakele vanu vamumone oku athimutwiya na Yesu. Yesu wapwile wa kwononoka, cho lalo wakele na kwana vanu thimbu ya kuthimutwiya nendi, mukemwo wathimutwiyiye na Nikondemo vuthsiki—kwalikalyavo. (Yowa. 3:1, 2) Vika vitulilongetha ku viñanda evi? Yesu wakele na kuwanako thimbu ya kukanyametha likulahelo lya vanu. Kuma netu kutwapandele kwilukilailukila ku vanu vatukathimutwiya navo mangana tukashangumuke kulilongetha navo Mbimbiliya ndi?

¹² Nga tupanga na vaka-kwambulula vavaha mu lihya, cho vatha kukala na vutongwe mu kulongetha vuthunga vwa mu Mbimbiliya. Twatha kuvashongangeya kwilukila nameme ku vanu vaje vamwetha kuvwahelela kamandondo. Twatha kuvalanya vapange netu omwo tulinga mangendthzi a kwilukila nambe omwo tuya na kutwamenena vilongetha vya Mbimbiliya. Nga tulongetha vaka-kwambulula vavaha mu ngila eyi, cho vatha kwakela manene mana ku vanu vaje vamwetha kuvwahelela na kuvalongetha Mbimbiliya. Kutundoho, valilongetha kujeneka kuthzeya vwathi, oloni vapwa vaka-kukakateya nameme vanu kuvamwetha kuvwahelela.—Ngala. 5:22; kengeni chipalo cha “Kukakateya Kwapwa kwa Theho.”

LONGETHENI VAVAHA KUPANGELA VAKWAVO

13, 14. (a) Vika vimunalilongetha ku myanja ya vanu va mu Mbimbiliya vaje valyanene kupangela vakwavo? (b) Mwatha kulongetha vati vanike na vaka-kwambulula vavaha kumwetha chithzemo kuli vandolome na vandokathzi vavo?

¹³ Viñanda vya mu Mbimbiliya vimwetha kuvethzika chituli nacho cha kumwetha ‘chithzemo chachivwa kuli vathamba vetu vaka-kukulahela’ na kuvapangela. (Tandeni 1 Petulu 1:22; Luka 22:24-27.) Muna Njambi walyanene vyuma vyoshe, hamo lika na mwonyo wendi mangana apangele vakwavo. (Mateo. 20:28) Ndokasi nendi “thimbu yendi yoshe wakele na kulinga vyavivwa na kukwatha tuhutu.” (Vili. 9:36, 39) Maliya, ndokathzi wa ku Loma, ‘wapangelele manene’ vanu mu chikungulukilo. (Loma. 16:6) Twatha kukwatha vati vavaha vathzivuke theho ya kukwatha vandolome na vandokathzi vavo?

¹⁴ Vakaleho va kukola ku sipilitu vatha kulanya vavaha omwo vaya na kumenekela vaka-kuvinja na tukulukathzi. Nga chitava, vithemi vatha kuya na vana vavo ku mangendthzi a chifwa echi. Vakulunu vanapande kupangela hamo na vakwavo mu kuvwahethela tukulukathzi vinjuvo vyavo na kuvawanena vyakulya. Nga valingamo, cho vanike na vaje vavaha mu chikungulukilo valilongetha kuthzema vakwavo. Mukulunu umo mwakele na kwambulula, wakele na kuwanako thimbu ya kuthikametha Vakaleho vakele ku mutambela kwakele na kwambulwila. Ndolome wa mwanike uje wakele na kwenda nendi walilongethele ngwendi vanu voshe mu chikungulukilo vashaka kuvamwetha chithzemo.—Loma. 12:10.

15. Mwafwa vika vakulunu vanapande kwakela mana ku kukwatha vandolome vaye kulutwe mu chikungulukilo?

¹⁵ Vandolome vanapande kukala na chashu cha kwendeka mwafwa vakevo vakapangetha Yehova ku kulongetha mu chikungulukilo. Ha kupwa muvakulunu, mwatha kutolilila kuli muka-kupangela omwo alivwahethela ñanda yendi ndi? Nga mumukwatha, atha kukala na vutongwe mu kulongetha Lijwi lya Njambi.—Nehe. 8:8.^[3]

16, 17. (a) Paulu wakwathele vati Timateo aye kulutwe mu chipangi cha Njambi? (b) Vakulunu vatha kukwatha vati vanu mangana vakapwe tunyungi va chikungulukilo kulutwe?

¹⁶ Tunyungi mu chikungulukilo cha vaka-Kilisitu vavandondo, cho chipangi cha kulongetha vanu vaje vatha kukapwa tunyungi chinapande kutwalelelaho. Paulu wamwethele omwo vanu vanapande kulongethela vakwavo omwo walekele Timateo ngwendi: “Munange, koletha mu kutetela kuje kuli muli Kilisitu Yesu. Tambula vilongetha vije wathzivile kuli yange omwo njambulwile ku mesho a vakaleho vavangi, Cho likundike ku vanu vavavwa, vaje vatha kulongetha vakwavo.” (2 Tima. 2:1, 2) Timateo walilongethele vyavingi mu kupanga na Paulu, uje wapwile mukulunu kuli ikeye. Timateo wapangethele vyamulongethele Paulu mu chipangi chendi cha kwambulula na mu vipangi vikwavo vya ku sipilitu.—2 Tima. 3:10-12.

¹⁷ Paulu kechelele Timateo alilongethe ikeye vavenya. Wapangele hamo nendi. (Vili. 16:1-5) Vakulunu navo vatha kutembwinina Paulu ha kulanya vaka-kupangela va kukola ku sipilitu vaye navo ku mangendthzi a vunyungi nga chitava. Nga valingamo, cho vakwatha ava vandolome vamone chithzemo na likulahelo na kuthimpa kwanapande kukala nakwo ntwama. Eyi inapu ngila ya kukwatha vanu vaje vatha kukapwa tunyungi va “vutanga vwa . . . Njambi” kulutwe.—1 Petu. 5:2.

THEHO YA KULONGETHA VAKWETU

18. Mwafwa vika tunapande kwakela manene mana ku kulongetha vakwetu kupangela Yehova?

¹⁸ Kulongetha vakwetu vipangi kwapwa kwa theho manene mwafwa Yehova ashaka vanu vavangi vamupangele. Mwanja wa Yesu na Paulu watha kutukwatha mu kulongetha vakwetu. Yehova ashaka vangamba vendi va matangwa ano valilongethe kupanga mwamuvwa vipangi vya ku sipilitu. Njambi natwana chipangi cha kukwatha vavaha mangana vavwethzelele ku vutongwe vwavo mu kupanga vipangi vya mu chikungulukilo. Oku kunangula kunapu kwa theho, cho lalo kunapande kulingiwa vwathivwathi, mwafwa vyuma mu kaye vili na kuvihya manene, cho lalo vanu vaje vashaka kuthziva muthzimbu vanatumu.

19. Mwafwa vika mukulahela ngweni mwatha kukwatha vakweni vathzivuke vipangi vya Yehova?

¹⁹ Kulongetha vanu kukatondo thimbu na kulifwita. Oloni Yehova na Munendi yathzema vatukwatha na kutwana mana a kulongetha vakwetu. Tuvwahelela omwo tumona vanu vatunakwatha vali na “kundangana na kupanga manene na ndthzili.” (1 Tima. 4:10) Netu vaka-kulongetha, tutwaleleniho kupanga na ndthzili mangana tuye kulutwe mu vipangi vya Yehova.