‘Kulipwitha Umo mu Vyoshe Kuli Vanu Voshe’

HA THIMBU oyo, te njili laja na lishungu lya kushaka kuthzivuka vuthunga vwa mu Mbimbiliya. Vanana vakele na mikanda ya kukundama ku Mbimbiliya, cho njalikuwile vyuma vinjatandelemo, maneneni vyakumwenako vije vyakelemo. Vatate kuvashakele ngwavo vanana vanjileke vyuma vivakele na kulilongetha. Oloni njashakele manene kulilongetha, cho njakele na kwihula vanana vihula, ngechi vakele na kunjilongetha nga vatate vanatundu ha njuvo. Ngechi, nange njalyangwilile kulikundika kuli Yehova. Vanjimbwitikile mu Blackpool ku England mu 1943 te njili na myaka 10.

NJISHANGUMUKA KUPANGELA YEHOVA

Kutunda ha kunjimbwitika, njashangumukile kupanga hamo na vanana mu lihya thimbu yoshe. Twapangethele makina a fonongilafi mu kwambulula muthzimbu wauvwa. Awa makina akele na kulema manene kuwajundula ( makilo 4.5 ). Njakele na kuwajundula nameme njapwile njimwanike.

Njashakele kupwa painiya wa thimbu yoshe omwo njakele na myaka 14. Oloni vanana vanjilekele ngwavo njithimutwiye tayi na ngamba ya vandolome na vandokathzi (itutumbula ano matangwa ngwetu ntwama wa kuthzenguluka). Wanjilekele ngwendi njililongethe tayi vipangi vimo vya kunjikwatha mu vupainiya. Njalingile vyanjilekele. Munima ya kupanga myaka ivali, njehwile lalo ntwama wa kuthzenguluka weka vya chipangi cha vupainiya, cho wanjilekele ngwendi: “Linga munayongwela.”

Ngechi mu April 1949, nange na vanana twalandethele vitenga vyetu vya laja vije vyakele mu njuvo yetu ya kufwetela, cho twajalukilile ku Middleton, kuyehi na Manchester, kuje kutwakashangumukilile vupainiya. Munima ya vingonde viwana, njangwileko ndolome wa painiya mangana njipange nendi. Ofisi ya munango yatutumine kukapangela mu chikungulukilo chachiha ku Irlam. Vanana vapangele na ndokathzi wa painiya wa mu chikungulukilo cheka.

Mu chikungulukilo chachiha mutwakele na mukwetu, vatwanene chipangi cha kutwamenena viwano mwafwa mwakele vandolome vavandondo vaka-kutwamenena, nameme ngwavo ha thimbu oyo te njili lika na myaka 17. Kutundoho, vanjitumine ku chikungulukilo cha ku Buxton kuje kukwakele vaka-kwambulula vavangi. Evi vyakuliwana navyo vyoshe, vyapwile vya kunjilongetha vipangi vije vyanjivandamenene kulutwe.

Mu 1951, njashulithilile fomu ya kuya ku Sikola ya Ngilyande ya kulilongetha Mbimbiliya. Oloni mu December 1952, vanjithanene kukakovela chipangi cha vushwalale. Njalumbunwine kuli vaka-nkuta ngwange yange njapwa nji ngamba ya Njambi wa thimbu yoshe, oloni vanjivyanenene, cho vanjikutile mu kamenga ha vingonde 6. Njatambwile mukanda wa kunjilanya ku Ngilyande mu kilasi ya vu 22 oku njichili mu kamenga. Vungendthzi vwange vwahile mu July 1953. Njalondele mbopolo ya lithzina lya Georgic na kushangumuka kuya ku New York.

Munjaketele, njakakele ku Chiwano cha New World Society chije chalingiwile mu 1953. Kutundoho, njalondele kumboyo na kuya ku South Lansing, mu New York kuje kwakele eyi Sikola ya Ngilyande. Ha thimbu oyo njakele na vimbongo vyavindondo lika, mwafwa ya kukala mu kamenga. Munjashulukile mu kumboyo, vanjambatele lalo mu kambasi kakandondo, kaje katutwalele ku South Lansing, njalombele mukwetu injendele nendi vimbongo [25-cent] vya kufweta ku munyau.

KUPANGELA MU LIFUTI LYEKA

Sikola ya Ngilyande yatulongethele vyuma vyavingi vije vyatukwathele ‘tulipwithe umo mu vyoshe kuli vanu voshe’ mu chipangi cha vumishinali. (1 Koli. 9:22) Nange na Paul Bruun na Raymond Leach vatutumine ku Philippines mu vutatu vwetu. Twavandamenene ha vingonde vyavingi mangana vatwane lithetha lya kuya oku ku lifuti lyeka. Vyuma muvyavwahele, twalondele mbopolo na kwita mu Rotterdam na ku Mediterranean Sea na ku Suez Canal na ku Indian Ocean na ku Malaysia na ku Hong Kong. Twendele matangwa 47 mu kalunga ndonga. Twaketele ku Manila ha November 19, 1954.

Njashangumukile kulikwatathana na vanu veka na kwithzilila lifuti lyaliha na kulilongetha ndaka yaiha. Oloni mu vutatu vwetu vatutwalele mu chikungulukilo chimo cha mu Mbonge ya Quezon, kuje vakele na kupangetha Vundele. Oku kwanenethele ngwavo tuthzivuke lika majwi amandondo a mu Chitagalog munima ya vingonde 6. Chipangi chikwavo chije chivatwanene, chatukwathele tuthzivuke vyuma vyavingi.

Litangwa limo mu May 1955, nange na Ndolome Leach twawanene mikanda mu mulili wetu omwo twatundile mu lihya. Eyi mikanda yapwile ya kutulanya kupwa vantwama va kuthzenguluka. Ha thimbu oyo njakele lika na myaka 22, oloni echi chipangi chanjilongethele ‘kulipwitha umo mu vyoshe kuli vanu voshe’ mu vingila vyaviha.

Chakumwenako, ha kupwa ntwama wa kuthzenguluka, njendekelele ñanda yange ya kulivanga mwimbo mushandangala. Njamwene ngwange vanu va mu Philippines ha thimbu oyo, vathzivukile ngwavo ñanda ya mbunga inapandele kuyendekela mushandangala. Omwo njendelele vikungulukilo vya mu chitingitingi, njakele na kwendekela lalo viñanda vyange ku myela ya mbunga na ku myela ya kulandethela na mu vinjuvo vya fulumende vya kulikungulwila na mu myela ya kwashela mbola na mu myela ya kukundikila minyau na mu myela yeka ya ku vitanda. Thimbu imo, mu Mbonge ya San Pablo mwanyokele nyondthzi yakama, cho njonwene kwendekela ñanda yange ku mwela wa kulandethela. Njalombele vandolome vaje vakele na moko ngwange njikayendekele mu Njuvo ya Vumwene. Hanima, vandolome vanjihwile indi vanapandele kuyithoneka kupwa ñanda ya mbunga mwafwa kunjayendekelele ku mwela wa mbunga.

Njakele na kulala mu vinjuvo vya vandolome. Nameme vinjuvo vyacho vyapwile vya kujeneka kukomoketha, oloni vyapwile vya kujela thimbu yoshe. Njakele na kulala ha linala lya kujala ha mavaya. Njalilongethele kujwelela hanja mu kathingimiko mwafwa kukwakele mwela wa vushweke kwa kujwelela. Mu mangendthzi ange, njapangethele munyau uvatumbula ngwavo jeepney na mbasi, thimbu imo njakele na kulonda mu vwato, maneneni nga njendela mañanda akwavo. Kanda njilandeho munyau ha myaka yoshe injinapanga.

Kupanga mu lihya na kwendela vikungulukilo kwanjikwathele kulilongetha ndaka ya Chitagalog. Njalilongethele eyi ndaka kwitila mu kutolilila kuli vandolome mu lihya na ku viwano. Vandolome valyanene kunjilongetha, cho njakandelelele manene ku lukakateya lwavo na kunjishongangeya kwavo.

Mu kwita kwa thimbu, vanjanene lalo chipangi chije chanenethele ngwavo njilithzilithe vyavingi mu kuyoya kwange. Mu 1956, omwo Ndolome Nathan Knorr watwendelele, vanjangwile kutala viñanda vya ha chiwano cha lifuti lyoshe. Na vimo vyayi vinjathzivukile ha chipangi echi, oloni vakwetu vanjilongethele mwakuchilingila. Mu kwetile lika thimbu yaindondo, vavwaethele chiwano cha lifuti lyoshe chikwavo lalo omwo Ndolome Frederick Franz wethzile ku Philippines kutunda ku ofesi yakama. Ha kupwa ntwama wa chiwano, njalilongethele kuli Ndolome Franz ha kukavangeya chithemwa cha vanu. Vandolome vavangi vavwahelelele omwo vamwene Ndolome Franz nathzala vuthzalo vwa mu lifuti lyavo vuje vatumbula ngwavo barong Tagalog, omwo wakele na kwendeka ñanda yendi ya mbunga.

Njapandele kulithzilitha lalo vyuma vyavingi mu kuyoya kwange omwo vanjangwile kupwa ntwama wa mbongi. Ha thimbu oyo twakele na kukengetha vanu filimu ya The Happiness of the New World Society mu myela ya mbunga. Thimbu Imo, tulongolo vakele na kutwaka mu chikela. Vakele na kukavangeya cheke cha likina lya kumwetha vikupulo [projector], cho vakele na kwonwa kutuhuka omu mu likina. Njakele na chipangi chakama cha kuvachokovola mu likina na kulijeletha. Kwapwile kwakukalu kukala na viwano vya kumwetha vanu vifilimu, oloni njavwahelelele kumona omwo vanu vaija na kuyongola vifilimu vije vimwetha muyafwila munga ya Yehova.

Tupilisitu va mu Katolika vashongangeyeye vantwama vamo va fulumende vajeneke kutwana lithetha lya kulikungulula. Vakele na kutanganetha viwano vyetu mu kunjengula manene vingenjo vya ku vichachi vyavo, maneneni ha thimbu ije itwakele na kulikungulwila kuyehi na vichachi vyavo. Oloni twatwaleleleho kupanga, cho vanu vavangi mu mitambela ije vanapu vaka-kulemetha Yehova.

VIPANGI VIKWAVO VIJE VYANENETHELE NJILITHZILITHE YOYETHI YAIHA

Mu 1959, njatambwile mukanda wa kunjilanya kukapangela ha ofesi ya munango. Echi chanenethele ngwavo njililongethe vyuma vyavingi. Omwo kwetile thimbu, vanjanene chipangi cha kwendela minango mu mafuti eka. Vungendthzi vumo vwanenethele njilithzivuke na Janet Dumond uje wapwile kamishinali ku Thailand. Twalithzivathanene, cho kukapwa muje twalyambata. Tunalikuwu kupangela hamo lika Yehova mu vulo vwetu ha myaka 51.

Njalikuwu kwendela vanu va Yehova mu mafuti a kupwa 33. Njikandelela ku vipangi vyange vya kulivanga, mwafwa vyanjilongethele mwa kupangela na vanu va kulithethzathethza. Kwendela mafuti eka kwanjilongethele vyavingi na kumona omwo Yehova mu chithzemo chendi natavetha vanu va kulithethzathethza kumupangela.—Vili. 10:34, 35.

NJICHILI NA KULITHZILITHA YOYETHI YAIHA

Tunawana kuvwahelela kwakama mu kupanga na vandolome na vandokathzi vetu va ku Philippines. Nambala ya vaka-kwambulula inalivwethzelela manene kutuvakana muyakele kunima te njichishangumuka kupanga. Nange na Janet, tuchili na kupangela hamo lika ha ofisi ya munango ya mu Philippines mu Mbongi ya Quezon. Nameme njinapangela mu lifuti lyeka ha myaka 60, oloni anga njichilithziva ngwange njatha kulithzilitha chipangi choshe choshe chanjana Yehova. Kutenguluka kunalingiwa ololo mu munga, kunalingitha ngwavo njitambule chipangi choshe choshe chanjana Yehova na kupanga mu kushuvuluka na vandolome vetu.

Tukatambula chipangi choshe choshe mangana tulinge chithzango cha Yehova, cho echi chikatunenela kuvwahelela mu kuyoya kwetu. Tunetheka lalo kulithzilitha yoyethi ya kulithethzathethza mangana tupange na vandolome vetu mwamuvwa. Twalyangwila ‘kupwa umo mu vyoshe kuli vanu voshe,’ nga Yehova atutavetha.