Muchanuka Ndi?

Munatanda mwamuvwa mangazini a ololo a Kaposhi ka Kukengela ndi? Ethekeni indi mwatha kukumbulula evi vihula:

Vuvi muka vwendekele Yesu mu chinangulo chili ku Mateo 18:15-17?

Wakele na kwendeka ha viñanda vije vivatha kuthimutwiya vaje vanalithevuka mu vuvali vwavo. Oloni nga kuvathimutwiyiye mwamuvwa, ovwo vuvi vwatha kutundithitha munu mu chikungulukilo. Chakumwenako, vunatha kupwa vuvi vwa kwendeka vungungu nambe makuli.—w16.05, lipu. 11.

Vika vimwatha kulinga mangana muwane vukwathi mu kutanda Mbimbiliya?

Mwatha kulinga evi vyuma: Tandeni mu kushuvuluka na kutondethetha vilongetha vije vyatha kumikwatha. Lihuleni vihula vya kufwa ngwe ‘Njatha kupangetha vati echi chilongetha mu kukwatha vakwetu?’ Cho pangetheni vinoma viliko mu kutondethetha vyavingi ha ñanda imunatanda.—w16.05, lipu. 29-31.

Kuma Muka-kilisitu uje ali na lilavelelo lya kuthanguka kapandele kulithziva vuthiwa ndi?

Munu katha kwonwa kulithziva vuthiwa mwafwa ya kukala na lilavelelo lya kukathanguka. Avilahama walilile ha kuthsa kwa Sala. (Kusha. 23:2) Mu kwita kwa thimbu, vuthiwa vukahu.—w16.05, lipu. 4.

Munalume wambatele chithoneketho na vanalume vatanu na umo vaje vambatele vitwa vya vuthunga vavanendeka ku Ezekiyele kapetulu 9, vemanena veya?

Tuthzivithitha ngwetu vemanena vanu va mwilu vaje vavapangethele mu kunyongetha Yelusalema, cho vachikavapangetha mu kunyongetha kaye kakavi ha Alamangindone. Thimbu ino, Yesu Kilisitu ikeye emanena uje munalume wambatele chithoneketho. Ikeye akafundika chithzivukitho vaje vanapande kwovoka.—w16.06, lipu. 31-32.

Mbimbiliya yovokele ku vika?

Yovokele (1) ku mavoko a vanu vaje vashakele kunyongetha mavulu a kuithonekela a kufwa ngwe papyrus na parchment; (2) ku kulwitha kwa vantwama va mu vulombelo na vaka-vupolitiki vaje vashakele kuinyongetha (3) ku mavoko a vanu vaje vashakele kuthzimbaletha muthzimbu wamwo.—w16.07, lipu. 4-7.

Muka-kilisitu atha kwathiwitha vati kuyoya kwendi?

Thzivukeni vyuma vimutonda, cho kethi muviyithile vimbongo ku vyuma vya kujeneka theho. Thonekeni vyuma vimushaka kulanda. Landetheni nambe kwanetha nambe kumbila kuti vyuma vije kumwetha kupangetha, cho fweteni mikuli imuli nayo. Tepululeni ku thimbu imukakala ku vipangi, cho thinganyekeni mumwatha kupangela manene mu chipangi cha kwambulula.—w16.07, lipu. 12.

Mbimbiliya imwetha ngwavo chuma muka chapwa cha theho manene kutuvakana ngolinde nambe siliva?

Mukanda wa Yombi 28:12, 15 umwetha ngwavo mana a vunjambi apwa amavwa kutuvakana ngolinde nambe siliva. Pweni va kulikehetha na kukala na likulahelo lya kukanyama omwo muwashakethzeka.—w16.08, lipu. 18-19.

Kunapu kwakuvwa kuli ndolome kulela munjethzi ano matangwa ndi?

Mu vithemwa vimo, kukala na munjethzi wa kuteula mwamuvwa kukwaviyile, cho kukwatha kwonowetha vanu kutambula muthzimbu wa Vumwene. Oloni vandolome vamo, anga vanatha kulyangwila kujeneka kulela munjethzi. (1 Koli. 8:9) Mu vithemwa vimo na mafuti amo, kuvatavetha Muka-kilisitu kulela munjethzi.—w16.09, lipu. 21.

Kulithethza muka kuli mukati ka mangana na kuthzivithitha na mana?

Munu ali na mana akatondethetha viñanda nambe vuthunga. Cho muka-kuthzivithitha atha kumona vuthunga muvunalitombwelamo na vukwavo. Oloni munu ali na mana natha kukumbathana mangana na kuthzivithitha ngechi avipangethele hamo.—w16.10, lipu. 18.