Njambi Amizibuka Ndi?

BITULILONGESA KU BYUMA BYA KUTANGA

Acisinganyekeni ha likwatasano lyakala mukati ka bampasa bakulifwa manene. Bakalizeme manene umo na mukwabo. Nancy Segal, uje wapwa mukulunu wa cibunga ca Twin Studies Center uje wapwa lalo mpasa, wendekele ngwendi: “Bampasa bamo bakazibisisa mwamubwa byendeka mukwabo nameme kamulumbunwininebyo.” Munakazi umo uje wapwa mpasa wendekele ha likwatasano lyakala mukati kendi na mukwabo ngwendi: “Tubaboshe tulizibuka mwamubwa.”

Bika bikalingisa bampasa balikwatasane manene? Baka-kutondesesa ngwabo, lelesi ya bisemi nambe mwela ubanakolela unasa kulingisa ngoco, oloni maseluzi a kusemuka nawo a kulifwa, akewo akalingisa manene ngoco.

ACISINGANYEKENI HA ÑANDA EYI: Ishamatanga yetu uje watangele maseluzi, atuzibuka mu ngila ya kulitila kutubakana munu woshe-woshe. Mukemwo muka-kwimba, Ndabiti wendekele ngwendi: “Yobe wanjimungile mwimo lya banana. Omwo batangele bitsiya byange, na kubyaka hamo mwamubwa mwimo lya banana, omwo njakolele muje mu bushweke, yobe wanjimwene. . . . Yobe wanjimwene simbu kanda njisemuke.” (Myaso 139:13, 15, 16) Njambi ikeye lika azibuka mwamubwa maseluzi etu na byuma byoshe bitunaliwana nabyo mu buyoye bwetu bije binamungu bunu bwetu. Twakulahela ngwetu Njambi atuzibuka mwamubwa mwafwa ikeye watutangele.

BIYITULONGESA MBIMBILIYA HA MANA A NJAMBI

Ndabiti walombelele ngwendi: “Unanjilula yobe Shukulu Kalunga, co unanjizibuka. Yobe uzibuka byuma byoshe binjikalingi, nambe uli ku lyala, oloni uzibuka biyongola byange byoshe. Nameme omwo kanda njicendeke, yobe wazibuka laja bika njendeka.” (Myaso 139:1, 2, 4) Kutundoho, Yehova azibuka mwamubwa mutukalizibila mu bimbunge byetu, co azibuka lalo “biyongola byetu byoshe na mashungu abyo.” (1 Mizimbu 28:9; 1 Samwele 16:6, 7) Awa mavesi atulongesa bika hali Njambi?

Nameme kutwendeka byuma byoshe bili mu mbunge yetu omwo tulomba kuli Njambi, oloni Ishamatanga yetu akamono byuma bitukalingi na kuzibuka binatulingisa ngoco. Kutundoho, akazibuka byuma byabibwa bitushaka kulinga nameme kuli byuma bimo bije bitwonowesa kulinga ngoco. Njambi watutangele na cizemo, co washaka kutumona mutucimwesa nebi bitushongangeya tucimwese.—1 Yowano 4:7-10.

Bisoneka bituzembeleka ngwabyo

• “Omwo Mwene [Yehova] akakenge hali baka-busunga, co akazibi malombelo abo.”—1 PETULU 3:12.

• Njambi nakulahesa ngwendi: “Njikakulongesa ngila ije iwunapande kwendelamo, co njikakulongesa na kukunangula.”—MYASO 32:8.

NJAMBI WAKALA NA MEMA KU MBUNGE

Kuma kuzibuka ngwetu Njambi azibuka mutukalizibila na byuma bitukaliwana nabyo kutukwasa tukolesele bukalu ndi? Tucisimutwiyeni ha byuma byalingiwile kuli Anna, wa ku Nigeria. Wendekele ngwendi: “Njamwene ngwange kuyoya kukwesi na seho mwafwa ya tuyando tunjakele natwo. Njapwile njifwile, co lalo njakele na kunyunga munange mu cipatela mwafwa wakele na kubinja mushongo wa hydrocephalus (Mushongo wa kukala na mema amangi ku bwongo). Kutundoho, banjiwanene na kansa ya ku mabele, co banjitabwile, na kunjana bumbanda bwa kansa na kunjisaka kupangesa X-ray. Kwanjikaluwilile manene kutala bya kubinja kwange na kubinjisa lalo munange mu cipatela ha simbu imo lika.”

Bika byatakamesele Anna? Wendekele ngwendi: “Njasinganyekesesele manene ha cisoneka ca Filipu 4:6, 7, cije cendeka ngwaco: ‘Kwoloka kwa Njambi, kuje munu na umo wahi asa kuzibisisa, kukanyunga bimbunge byeni na biyongola byeni.’ Simbu injakele na kwanuka eci cisoneka, njalizibile ngwange Yehova ali muyehi nange, co njazibukile ngwange anjizibuka mwamubwa kutubakana munjilizibukila yange babenya. Kutundoho lalo, bandolome na bandokazi ba mu cikungulukilo nabo banjitakamesele manene.”

“Nameme njicibinja, oloni mushongo wange nou wa munange unatepuluka. Twalilongesa ngwetu kutwapandele kwaka manene mbunge ku bukalu bwetu mwafwa Yehova ali na kutukwasa. Ku Yakomba 5:11 ngwabo: ‘Tuli na kubatumbula baka-kubwahelela omwo bakebo bakele na likakateya. Mwaziba laja ha kusimpa kwa Yombi, co mwazibuka bika Mwene [Yehova] wanene kuli Yombi ha kukotoka. Omwo Mwene muka-kutetela na mema ku mbunge.’” Yehova wazibisisile bukalu bwakele nabwo Yombi, co twakulahela ngwetu akamono bukalu bwoshe butukaliwana nabwo.