Lizina Lya Njambi Lyapwa Lika?

Nga mushaka kuzibuka munu, cuma ca kulibanga cimunapande kulinga cinapu kumwihula lizina lyendi. Nga mwihula Njambi lizina lyendi asa kumikumbulula ngwendi bati?

“Yange Yehova. Eli likelyo lizina lyange.”—Isaya 42:8, NWT.

Lukelwo lwa kulibanga kuziba eli lizina ndi? Hamo mukemwo mwafwa baka-kunungulula Mbimbiliya babangi kubapangesele manene lizina lya Njambi, bamo na kulipangesa kubalipangesele. Haje hanapandele kukala lizina lyendi banengisaho “SHUKULU.” Oloni mu bisoneka bya ku sañulu bya kulibanga bya Mbimbiliya balisonekele ha mitamba ya kweta ku 7,000. Eli lizina lyapwa lya masona awana a Cihebelu aje emanena YHWH nambe JHVH, co mu Mbunda tukalitumbula ngwetu Yehova.

Lizina lya Njambi mu Cihebelu mu libulu lya kuzenga libawanene ku Dead Sea — Mu libulu lya Dead Sea Psalms Scroll lya CIHEBELU, lya mu mwaka wa 30 kutwala 50

Lizina lya Njambi mu Mbimbiliya ya Bundele yanungulwile William Tyndale — Mbimbiliya yanungulwile Tyndale mu 1530 ya INGILISHI

Lizina lya Njambi mu Mbimbiliya ya Reina-Valera Version mu ndaka ya Spanish — Mu Mbimbiliya ya Reina-Valera ya mu 1602 ya SPANISH

Lizina lya Njambi mu Mbimbiliya ya Union Version mu ndaka ya Chinese — Mu Mbimbiliya ya *Union Version* ya mu 1919 ya CHINESE

Lizina lya Njambi lyasholoka mu bisoneka bya Cihebelu byoshe na mu bimbimbiliya byabingi bibananungulula.

MWAFWA BIKA LIZINA LYA NJAMBI LYAPWA LYA SEO?

Eli lizina lyapwa lya seo kuli Njambi. Wai walukile Njambi lizina, oloni ikeye babenya walyangwile. Yehova wendekele ngwendi: ‘Eli likelyo lizina lyange ku myaka yoshe, omu mukemwo mubakanjitumbula ku bisemwa byoshe bikaija kulutwe.’ (Kutuuka 3:15) Lizina lya Njambi likelyo lyatuma mu Mbimbiliya kutubakana majwi aje abakamusanesa a kufwa ngwe, Muka-nzili Yoshe, Tate, Shukulu, nambe Njambi. Co lalo banalitumbula lwalwingi kutubakana mubanatumbwila lizina lya Abilahama, Mosesa, Ndabiti na Yesu. Yehova washaka ngwendi banu bazibuke lizina lyendi. Mbimbiliya ngwayo: “Bazibuke ngeci yobe lika wapwa Shukulu Kalunga, [Yehova] muka-kushwana kaye koshe.”—Myaso 83:18.

Eli lizina lyapwa lya seo kuli Yesu. Mu lilombelo lije litukatumbula ngwetu lilombelo lya Tate yetu nambe ngwetu Lilombelo lya Mwene, Yesu walongesele baka-kumukabengeya ngwendi omwo balombela bendeke ngwabo: “Balemese lizina lyobe.” (Mateo 6:9) Yesu nendi walombelele kuli Njambi ngwendi: “Tate shangala lizina lyobe.” (Yowano 12:28) Kulemesa lizina lya Njambi kwapwile kwa seo manene mu buyoye bwa Yesu mukemwo mu lilombelo lyendi wendekele ngwendi: “Njasholwele lizina lyobe kuli bakebo, co anga njikalisholola.”—Yowano 17:26.

Lizina lya Njambi lyapwa lya seo kuli baje bamuzibuka. Banu ba Njambi ba ku sañulu bazibukile ngwabo lizina lya Njambi lya kulitila lyasa kubobola nambe kubamena. Lizina lya ‘Yehova lyapwa cimpaka ca nzili, muka-busunga atewelako, co akoboka.’ (Visimo 18:10) “Woshe akatambakana lizina lya Shukulu Kalunga, [Yehova] akoboka.” (Njwele 2:32) Mbimbiliya imwesa ngwayo lizina lya Njambi likelyo likamwesa kuliseza kuli mukati ka banu bendi na banu beka. Yendeka ngwayo: ‘Muyati woshe wa banu balemesa na kwononoka Njambi yabo wa kamponya, oloni yetu tukalemesa na kwononoka [Yehova] Njambi yetu ku myaka yoshe.’—Mika 4:5; Vilinga 15:14.

LIZINA LYA NJAMBI LIMWESA BIKA?

Lizina lya Njambi limwesa bukama bwendi. Baka-kulilongesa babangi ngwabo lizina lya Yehova lilumbununa ngwalyo “Akalingisa Byuma Bikaleko.” Yehova Njambi wamwesele bililumbununa lizina lyendi omwo walekele Mosesa ngwendi: “Njipwa Mwoshe Munjishakela Kupwila.” (Kutuuka 3:14, NWT) Lizina lya Njambi kulimwesa lika ngwalyo ikeye Ishamatanga wa byuma byoshe. Oloni lilumbununa lalo ngwalyo asa kupwa mwoshe mwashakela nambe kupwisa byuma byanatanga bipwe mwoshe mwoshe mangana ashulisilile biyongola byendi. Nameme majwi abakasanesa Njambi amwesa bukama, moko nambe nzili yendi, oloni lizina lyendi lya Yehova likelyo lika lilumbununa mu kushula mwafwila nomwo mwanasa kupwila.

Lizina lya Njambi limwesa ngwalyo watwaka Mbunge. Bililumbununa lizina lya Njambi bimwesa ngwabyo wazema manene byuma byanatanga kwambateselela na banu. Co lalo, Njambi mwanatuleke lizina lyendi namwesa ngwendi ashaka tumuzibuke. Wayongwele bya kutuleka lizina lyendi nameme kutwamulombele ngwetu atulekelyo. Twalimwena ngwetu Njambi kashaka tumumone ngwe sipilitu yangoco ije yakala kulako manene netu ije lalo kutwasa kulikuta busamba nayo. Oloni washaka tumumone kupwa munu hendi uje isa kupwa kabusamba ketu.

Nga tupangesa lizina lya Njambi tumwesa ngwetu tushaka kushwenya muyehi nendi. Cakumwenako, hamo mwasa kuleka munu imushaka kulikuta nendi busamba ngweni nga amisana napande kutumbula lizina lyeni lya cisemwa. Muliziba bati nga owo munu atwalelelaho kumisanesa mazina eka? Mu kwita kwa simbu mwasa kuliziba ngweni kashaka kupwa kabusamba keni. Omwo mukemwo mwakalizibila Njambi. Yehova natulekesa lizina lyendi, co akatushongangeya ngwendi tulipangese. Nga tulipangesa, co amona ngwendi tushaka kulikuta busamba nendi. Yehova kakebala ‘baje basingimika’ lizina lyendi.—Malakiya 3:16.

Kuzibuka lizina lya Njambi, cikeco Cuma ca kulibanga citukwasa tumuzibuke. Oloni kesi lizina lika litunapande kuzibuka. Tunapande kuzibuka byabingi hali babenya lizina. Tunapande kuzibuka mwafwila.

LIZINA LYA NJAMBI LYAPWA LIKA? Njambi ikeye Yehova. Eli lizina limwesa ngwalyo Njambi wapwa Munu uje asa kushulisilila biyongola byendi byoshe.

NJAMBI WATUNDA KULI?

Banu babangi banalihula eci cihula. Hamo neni mwalihulaho laja eci cihula: Nga melu na byuma byoshe bilimo kuli umo wabitangele, co Njambi ikeye watunda kuli?

Baka-sayansi bakulaela ngwabo melu kuli hawashangumukilile kukalako. Vesi ya kulibanga ya mu Mbimbiliya inendeka byuma bilitombola nawa majwi. Mbimbiliya ngwayo: “Ha kulibanga Njambi watangele lilu na kaye.”—Kushangumuka 1:1.

Melu kuwalitangele akewo abenya, kuli umo waatangele. Kukwesi cuma casa kulitanga cibenya. Ngwe wai byakeleko simbu kanda melu akaleko, ngwe na lelo lino melu ahi. Kuli umo wakeleko myaka yoshe simbu kanda melu akaleko. Ou bene ikeye walingisile melu akaleko. Yehova Njambi muka-nzili uje nakalako myaka yoshe uje lalo wakala na mubila wa sipilitu ikeye watangele melu na byuma byoshe.—Yowano 4:24.

Mbimbiliya inendeka hali Njambi ngwayo: “Simbu kanda utange malundu, simbu kanda utange kaye, yobe wapwa u Njambi ku myaka yoshe. (Myaso 90:2) Ngechi, Njambi kwakala myaka yoshe. Co “ha kulibanga” nambe ngwetu ku maputukilo watangele melu.—Kujombolola 4:11.