Bumwene bwa Njambi Bukalinga Bika?

BYUMA BIBUNALINGI LAJA BUMWENE BWA NJAMBI

Mu cilongesa cinahu, twasimutwiiye ha cizibukiso cendekele Yesu. Cije cizibukiso cimwesa ngwaco, Bumwene bwa Njambi banabushimbika mwilu, co Yesu Kilistu ikeye Mwene.

Mbimbiliya ngwayo Yesu mwashangumukile kuyula, washekele Satana na bandemone bendi mwilu. Ha simbu ino, kubasa lalo kwiluka mwilu mukemwo byuma binabihya manene mu kaye kushwa lika mu 1914, mwafwa bakebo bali na kunena ebi byuma byabibi.—Kujombolola 12:7, 9.

Nameme byuma bili na kubihya manene mu kaye, Yesu uje napu Mwene wa Bumwene bwa Njambi nalingiko byuma bimo mangana akwase banu hano hasi. Cipangi ca mu kaye koshe ca kulongesa banu Mbimbiliya capolofwetele Yesu, cili na kukwasa banu babangi mwafwa bali na kulilongesa binangulo bya mu Mbimbiliya na kubipangesa mu kuyoya kwabo. (Isaya 2:2-4) Banu babangi banalilongesa mwakupangela mwamubwa bipangi, mwakuyoyela mwamubwa mu naanga, na kujeneka kupwa bindungo ba bufuko. Aba banu bali na kulilongesa mubasa kuyoyela mwamubwa ha simbu ino, co bali na kulinga byatonda Njambi mangana bakayoye mu Bumwene bwendi.

BYUMA BIBULINGA BUMWENE BWA NJAMBI

Nameme Yesu nashangumuka laja kuyula mwilu, banu anga bacili na kuyula hano hasi. Oloni Njambi nashiki Yesu ngwendi: ‘Yakaswane hakati ka bitozi bobe.’ (Myaso 110:2) Ololo Yesu anyongesa bitozi bendi na kwobola banu boshe baje banalyangwila kwononoka Njambi.

Bumwene bwa Njambi ololo

• Bunyongesa bulombelo bwa makuli. Bulombelo buje buli na kwendeka makuli hali Njambi na kuyandesa banu bakabunyongesa. Mbimbiliya inesekesa bulombelo bwa makuli ku cikwizi. Banu babangi bakalikomokela manene mubakabunyongesa.—Kujombolola 17:15, 16.

• Bunyongesa biyulo bya banu. Bumwene bwa Njambi bukanyongesa biyulo byoshe bya banu.—Kujombolola 19:15, 17, 18.

• Bunyongesa banu bababi. Bika bikalingiwa ku banu baje kubashaka kwecela kulinga byuma byabibi, co kubesi na kwononoka Njambi? ‘Akatundisa baka-bubi mu lifuti.’—Visimo 2:22.

• Butundisako Satana na bandemone bendi. Satana na bandemone bendi kubakasa ‘kukwisa banu.’—Kujombolola 20:3, 10.

Ebi byuma byoshe bikakwasa bati baje banalyangwila kulikwatasana na Bumwene bwa Njambi?

BUMWENE BWA NJAMBI BUKALINGILA BIKA BANU?

Ha kupwa Mwene mwilu, Yesu akalinga byuma bije kubasele kulinga banu baje banayulu, bije kubasa kulinga banu bali na kuyula nambe baje bashaka kuyula. Akayula hamo lika na banu babanangula hasi ba kupwa 144,000. (Kujombolola 5:9, 10; 14:1, 3) Akamona ngwendi cizango ca Njambi cilingiwa hano hasi. Bumwene bwa Njambi bukalingila bika banu hano hasi?

• Bukamanesa mishongo, kukulubala na kutsa. ‘Na umo wahi lalo akayoya mu lifuti akalinyenga ha kubinja,’ co “kukukakala kutsa.”—Isaya 33:24; Kujombolola 21:4.

• Bukalingisa banu bakayoye mu kwoloka. ‘Banu bobe bakabezika na kukala mu kwoloka,’ co lalo “bakakala mu kwoloka hakati ka mikolobozi ya bushuka bwa binyu yabo na miti ya mikuyu yabo, co naumo wahi akabazibisa lyoba.”—Isaya 54:13; Mika 4:4.

• Bukalingisa banu bakakale na bipangi byabibwa. ‘Banu bange banjangwile bakajolela na bipangi byabo. Bipangi byabo kubikai mwangoco.’—Isaya 65:22, 23.

• Bukabwahesa hasi. “Mambo na lifuti lya kuma bikajolela, na bishani bikashamwina mu mambo.”—Isaya 35:1.

• Bukalongesa banu bibanapande kulinga mangana bakayoye myaka yoshe. “Co mwonyo wa myaka yoshe ukewo ou, ngeci bakuzibuke yobe Njambi umo lika wa busunga, co na kuzibuka Yesu Kilistu, uje iwatumine.”—Yowano 17:3.

Njambi ashaka ngwendi mukalikuwe ebi bibezikiso. (Isaya 48:18) Cilongesa cinatako cikamwesa bimunapande kulinga ha simbu ino mangana mukalikuwe ebi bibezikiso.