Pangetheni ‘Moko ya Mukwale ya Sipilitu’ mu Vutongwe
1. Tunapande kupangetha vati Mbimbiliya mu lihya?
1 Kupangetha vwino Mbimbiliya mu lihya, kuchilumbununa kutanda lika vithoneka embwe. Ha Pentekosita mu mwaka wa 33, kapositolo Petulu wanene ñanda ku mbunga yakama mu Yelusalema. Watandele mikanda yayingi ya Vithoneka vya Hevelu. Oloni vanu muvathzivile Petulu alumbununa evi vithoneka, vavangi vathzivile ku vimbunge vyavo longoto omwo ya vyuma vyavivi vivalingile. Vatengulukile ku vivi vyavo na kulomba Njambi avathambethe. Ha litangwa lije vanu vakweta ku 3,000 vatengulukile na kupwa vaka-Kilisitu. (Vil. 2:37-41) Netu tunapande kukwatha vanu vamone ngwavo vyuma vituli na kwendeka vya vuthunga. Twatha kulinga ngocho mu vingila evi:
2. Mwatha kupangetha vati Mbimbiliya mungila ije ilingitha vanu vayithingimike?
2 Pangetheni Lijwi lya Njambi mu ngila ije ilingitha vanu valithingimike. Omwo mutumbula chithoneka, endekeni vuvwa vwa kuthzivuka vithinganyeka vya Njambi ha ñanda imwendeka. Nga munu imuli na kwendeka nendi na kumbulula chihula cheni, munatha kwendeka ngweni, ‘Tuchimoneni vithinganyeka vya Njambi ha ñanda eyi.’ Nambe mwatha kumwihula ngweni, ‘Vika vyanendeka Njambi ha ñanda eyi?’ Kutumbula vithoneka mu ngila eyi, kumwetha ngwavo Mbimbiliya yatunda kuli Njambi. Kukwatha lalo munu imuli na kwendeka nendi athingimike manene Mbimbiliya. Chachivwa kulinga ngocho nga muli na kwambulula ku munu uje wakulahela Njambi, oloni kathzivuka vwino vyuma viyalongetha Mbimbiliya.—Mya. 19:7-10.
3. Vika vitunapande kulinga mangana tukwathe vanu vatuli na kuthimutwiya navo vathzivithithe vitutanda mu Mbimbiliya?
3 Kethi mutande lika vithoneka, oloni vilumbununeni. Omwo Paulu walongethele, ‘walumbunwine vithoneka na kumwetha vukaleho.’ (Vil.17:3) Ha vesi imo hanatha kupwa vinimbu vyavingi, ngechi anguleniho nimbu ije ilitombola na ñanda imuli na kuthimutwiya. Munatha kulinga ngocho nga mutumbula majwi aje analitombola na ñanda, nambe kwihula chihula chije chimukwatha athzivuke owo majwi. Kutundaho, mulumbunwineni owo majwi. Nga munamanetha kulinga ngocho, cho kwatheni munu imuli na kwendeka nendi amone omwo majwi atha kumukwathela.
4. Twatha kuthimutwiya vati na munu ha Vithoneka mu ngila ije imukwatha athizivithithe?
4 Thimutwiyeni ha Vithoneka mu ngila ije ikwatha vanu vathizivithithe. Paulu ‘wathimutwiyiye na vanu’ ha vithoneka mu ngila ije yavakwathele vathizivithithe. (Vil. 17:2, 4) Neni eteni vanu ku vimbunge ngwe mwalingile Paulu. Ihuleni vihula vije vimikwatha ‘mutekule’ vili mu mbunge ya munu. (Vis. 20:5) Kethi mumutatokethe. Oloni thimutwiyeni nendi mu ngila yayivwa, ije imukwatha athzivithithe. Majwi eni anapande kukundamena ha Lijwi lya Njambi. Chachivwa kutanda chithoneka chimo na kuchilumbununa vwino kutuvakana kutanda vithoneka vivali nambe vitatu kwakujeneka kuvilumbununa.
5. Mwafwa vika tunapande kukulahela ngwetu twatha kukwatha vanu vatuwana mu lihya?
5 Twavwahelela kukala na Mbimbiliya, Lijwi lya Njambi na kulipangetha vwino tukwathe vaka-vimbunge vyavivwa. Tupangetheni ‘moko ya mukwale ya sipilitu’ mu vutongwe mu chipangi chanatwana Njambi cha kwambulula Vumwene.