Pangetheni Mwamuvwa Thimbu Ije Muli Nayo mu Kwambulula
Vakaleho va Yehova vanapangele maola mu lihya akupwa 1,945,487,604 mu mwaka wa chipangi wa 2014. Ovu vukaleho vumwetha ngwavo tunalyana kupanga na ndthzili mu chipangi cha Yehova. (Mya. 110:3; 1 Koli. 15:58) Hakuwana ngwe “kukwesi simbu yakama yasalako,” kutala twatha kupangetha thimbu yetu mangana twambulwile vanu vavangi ndi?—1 Koli. 7:29.
Kupangetha mwamuvwa thimbu yetu mu kwambulula kushakahala kutengululako vimo. Chakumwenako, nga ngila imo ya kwambulwilamo ikamilingitha mwambate thimbu yailaja kwakujeneka kwendeka na munu, tondeni ngila yeka mangana muwane vanu vakwendeka navo. Vitingitingi vya kwambulwila vyalithethzathethza. Evi vingila vinakavangeyaho vyatha kumikwatha kupangetha thimbu yeni mwamuvwa kutewetha ‘mupupa ngocho mu lihundthzi.’—1 Koli. 9:26.
Kwambulwila ku njuvo na njuvo: Ha myaka yaingi, vaka-kwambulula vanapangetha ngila ya kwambulwila ku njuvo na njuvo. Hakuwana ngwe vanu vavangi vakapanga vipangi vyavo ku thimbu ya mutondo, chivwaha nga mwetheka kwambulwila ku njuvo na njuvo thimbu ya mutanya nambe mangwethzi omwo vanu vavangi vali ha vinjuvo vyavo, vali na kuhwima. Thimbu ya mutanya yapwa yaivwa kwambulwila mu vitapalo nambe ku vitanda.
Kwambulwila ku Mbunga: Vimetha na tutambo twa kuthindumuna munapande kuvyaka mu myela ya mu chitingitingi cha chikungulukilo cheni muje muketi vanu vavangi. (Kengeni Chipangi Chetu cha Vumwene cha September 2013 lipu. 5 mu Silozi) Nga mu mwela umwangula kukwethi na kwita vanu vavangi, cho Komiti ya Vipangi ya Chikungulukilo inatha kujalwitha katambo kakuthindumuna nambe metha ku mwela weka uje uli na vanu vavangi.
Mangendthzi a Kwilukila na Vilongetha vya Mbimbiliya: Chivwaha kunoneka mangendthzi a kwilukila na vilongetha vya Mbimbiliya ha thimbu munamono ngweni vingila vikwavo vya kwambulwilamo kuvipanga vwino. Chakumwenako, nga lya Sapalalo mutondo inapu thimbu yaivwa kwambulula ku njuvo na njuvo, chipwa chachivwa kutwamenena chilongetha cha Mbimbiliya mutanya nambe mangwethzi.
Omwo tukayi na kwambulula, tukalava maola atukapanga mu lihya, oloni tukavwahelela manene nga tuli na kupanga vwino. Nga muwana ngweni kupangetha ngila imo mu lihya kukukwatha manene, cho ethekeniko ngila ikwavo. Lombeni Yehova “Vavenya vimbuto,” mangana amitwamenene mu kupangetha mwamuvwa thimbu muli nayo mu kwambulula.—Mat. 9:38.