Kwatheni Tupuputwa Valilongethe vya Yehova

1. Yesu wamwethele vati ngothzi kuli vaje tupuputwa?

¹ Yesu wathalele na matangwa amandondo mangana athse. Litangwa limo, omu watundile mu nganda ya Yeliko, vanalume vavali va tupuputwa vatambekele manene ngwavo: “Tuzivileko mema ku mbunge Shukulu!” Nambe Yesu wakele na kuthinganyeka ha vyetheko vije vya muvandamenene, oloni wemanene na kuthana vaje tutuputwa, cho wavakangwile. (Mat. 20:​29-​34) Twatha kutembwinina vati ngothzi yamwethele Yesu kuli vaje tupuputwa?

2. Tunatha kwambulwila vati kapuputwa ituwana mu mbunga?

² Vakwatheni: Nga muwana kapuputwa, nambe mu mbunga, lithzimbuleni kuli ikeye na kumukwatha. Tupuputwa vakathzi lyova mwafwa vavamona vulema. Oloni nga muvendeketha mwamuvwa, mu chithzemo, cho vathzituka kwendeka neni. Thzivukeni ngweni vupuputwa vwalithethzathethza, ngechi oku kumikwatha mutanekeye mwa kuvakwathela. Hanima ya kukwatha kapuputwa, munatha kumuleka ngweni muli mu chipangi cha kulongetha Mbimbiliya. Mutandeleni Vithoneka vya kufwa ngwe Myaso 146:8 nambe Isaya 35:​5, 6. Mwihuleni nga atha kutanda mavulu a tupuputwa [Braille] aje amukwatha kulilongetha vyavingi vya mu Mbimbiliya. Munatha lalo kumukwatha mwakwambatela mithzimbu ya majwi avanatanda mwamuvwa ha jw.org. Nga kompyuta yendi ili na pulongilamu ije yatha kutanda majwi ha kompyuta, cho natha kutolilila ku viñanda vili ha jw.org, na mikanda ije ili mu chifwa cha RTF (Rich Text Format).​—Kengeni chipalo chije chili na mutwe wa “Nga Mukwatha Kapuputwa . . . ”

3. Twatha kuthetela vati tupuputwa mu chitingitingi chetu?

³ Theteleni Tupuputwa: Kakangi mutukayi na kwambulwila ku njuvo na njuvo, kutwethi kuwana tupuputwa, mwafwa vakathzivi lyova lya kwendeka na vangendthzi. Ngechi, tunapande kupanga na ndthzili mu ‘kuthetela’ tupuputwa mangana tuvambulwile. (Mat. 10:11) Kuli kapuputwa imukapanga nendi, nambe kukovela nendi sikola ndi? Waneni ngila ya kwendeka nendi. Nga mu chitingitingi cheni muli sikola ya tupuputwa, cho vaneni mavulu etu a tupuputwa [Braille] vawake mu layimbulali ya sikola yavo. Munatanekeyako umo munu wakala na kavushoko kendi wa kapuputwa ndi? Mu chitingitingi cheni mwakala munga ya ku kaye ije ikakwatha tupuputwa nambe kuvana vinjuvo vya kukala ndi? Endekeni na kavushoko kendi, na mukulunu wa munga oyo ngweni Vakaleho va Yehova vashaka manene kukwatha tupuputwa. Vakulahetheni ngweni mukavanenela mikanda ya tupuputwa nambe mithzimbu ya majwi avanatanda mwamuvwa. Mumwetheni vikulahetho vya Njambi vya mu Mbimbiliya vya kumanetha vupuputwa vwoshe. Munatha lalo kumumwetha vindiyo ya ha jw.org ya “Without It, I Would Feel Lost,” ije imwetha vuvwa vwanawana kapuputwa umo mu kukala na Mbimbiliya ya tupuputwa. Nga mulumbununa mwamuvwa vimunendela, cho mushokolola ngila ya kuthimutwiya na tupuputwa.

4. Vika vitulilongetha ku vyuma vyaliwanene navyo Janet?

⁴ Janet, ndokathzi wa kapuputwa waile kumwela uvakanyungila tupuputwa. Washangumukile kuthimutwiya na mumbanda umo. Janet wamulekele ngwendi, “Yesu wakangwile tupuputwa, kumwetha vyuma vyakalinga ku tupuputwa voshe.” Vathimutwiyiye hamo lika mukanda wa Kujombolola 21:​3, 4, cho Janet walumbunwine omwo Vumwene vwa Njambi vukashulithilila echi chikulahetho. Uje mumbanda wolokele kulu, cho wendekele ngwendi: “Kanda njithziveho kapuputwa endeka majwi a chifwa echi. Vanu vavangi vaje vali na mesho, vathinganyeka ngwavo vanu vakapu tupuputwa mwafwa ya vyuma vimo vivaviyithile nambe vivalingile va kukulwila vavo.” Janet watuminine uje mumbanda keyala ya jw.org ya kumutwala ha livulu lya Bibele I Lutañi Luli? hano twendeka ngachize vali na kulilongetha Mbimbiliya luvali mu thimano.

5. Nambe nga kutwatha kukangula tupuputwa ngwe muje mwalingile Yesu, oloni kuvathzivila ngothzi kuvakwatha vati?

⁵ Kutwatha kukangula tupuputwa ngwe muje mwalingile Yesu. Oloni twatha kukwatha vanu vaje vavanakoveletha mu lithuthulungu kuli njambi wa kano kaye, na kukwatha tupuputwa va ku muvila vathzivuke vuthunga vwa Lijwi lya Njambi. (2 Koli. 4:⁠4) Yesu wakangwile vaje vanalume vavali vawanene ku Yeliko mwafwa “wavazivilile mema ku mbunge.” (Mat. 20:34) Netu nga tuthzivila tupuputwa ngothzi, cho twatha kukwathako vamo valilongethe vya Yehova uje akamanetha vupuputwa haya myaka yoshe.