Vinoma Vitukapangetha mu Kulongetha Vanu
1. Vaka-Kilisitu vanalifu vati na vangangula?
1 Vangangula vakapangetha vinoma vyavingi. Vinoma vimo kuvethi kuvipangetha kushwa kumo, oloni vinoma vikwavo vakavipangetha thimbu yoshe. Vangangula vakatulikila evi vinoma vyavo mu chikasha, cho vakavipangetha manene mu vutongwe. Mbimbiliya yakanyametha vaka-Kilisitu voshe kupanga mwamuvwa mu lihya na kupwa “ngwe muka-vipangi uje kethi na shwamwa ku vipangi vyendi.” (2 Tim. 2:15) Chinoma muka cha kulema cha mu chikasha chetu? Echi chinoma chinapu lijwi lya Njambi lije litukapangetha mu ‘kupwitha vanu kupwa vandongethi.’ (Mat. 28:19, 20) Ngechi, tunapande kupanga na ndthzili mangana tupwe na vutongwe ‘mu kulongetha mwamuvwa lijwi lya vuthunga.’ Oloni kuli lalo vinoma vikwavo vitukapangetha thimbu yoshe, vije vaka-Kilisitu vanapande kulilongetha mwakuvipangethela mu kulongetha vanu vuthunga mu vutongwe.—Vithimo 22:29
2. Vinoma muka vitukapangetha manene mu kulongetha vanu?
2 Vinoma Vyetu Vitukapangetha Manene: Vinoma muka vikwavo vya kuvwethzelela ku Mbimbiliya vitunapande kupangetha? Chinoma cha kulivanga chituli nacho mu kulongetha vanu vuthunga vwa mu Mbimbiliya chinapu livulu lya Bibele I Lutañi Luli? Omwo tumanetha kulilongetha eli livulu na munu, tukapangetha lalo livulu lya Mu Tiiseze Mwa Lilato La Mulimu, mangana tumulongethe mwakupangethela mashiko a mu Mbimbiliya mu kuyoya kwendi. Ngechi, tunapande kuthzivuka mwakupangethela awa mavulu avali mu vutongwe. Tunapande lalo kwaka mambuloshuwa amo mu chikasha chetu. Mbuloshuwa ya Muthzimbu Wauvwa wa Kutunda kuli Njambi! inapu chinoma chimo chitukapangetha manene mu kushangumuka vilongetha vya Mbimbiliya. Nga mu chitingitingi chetu muli vanu vaje kuvatha kutanda mwamuvwa, nambe vaje vendeka lilimi lije kulyethi na mavulu a mu lilimi lyavo, cho tunatha kupangetha mbuloshuwa ya Tolilileni kuli Njambi na Tolilileni Kuli Njambi Mangana Mukayoye Myaka Yoshe. Mbuloshuwa ya Veya Vali na Kulinga Chithzango cha Yehova Matangwa Ano? inapu chinoma cha kukwatha vanu vaje vatukalilongetha navo Mbimbiliya mangana vathzivuke munga yetu. Kuli vinoma vikwavo vitunapande kulilongetha vwino mwakuvipangethela mu chipangi cha kupwitha vanu kupwa vandongethi. Evi vinoma vikevyo mavindiyo akufwa ngwe Ki Kabakalañi Ha Lu Swanela Ku Ituta Bibele? na Kiñi ze Ezahalanga Kwa Ndu ya Mubuso?
3. Chipangi Chetu cha Vumwene chikatukwatha kulinga vika?
3 Chipangi Chetu cha Vumwene chikatukwatha kuthzivuka mwakupangethela mu vutongwe mavulu a mu chikasha chetu. Omwo tupangetha evi vinoma mwamuvwa, tukavangeya majwi a mu Mbimbiliya aje endeka ngwawo: “Linyunge yove vavenya, cho lalo ilula vilongetha vyove. Twalaho na kulinga vyuma evi, omwo nga yove ulinga vyuma evi, ukalyamena yove vavenya na vajevakakutolilila.”—1 Tim. 4:16.