Kuvwethzelela ku Vutongwe Vwetu vwa mu Lihya?—Mwakwanenamo Livulu lya Bibele I Lutañi?

Vichapwila cha Kulema: Livulu lya Bibele I Lutañi? Lyapwa lyalivwa manene ku kulongetha. Oloni tunapande tahi kwana munu eli livulu ithinoni tushangumuka kulilongetha nendi. Ngechi tuvavoshe tunapande kukala na vutongwe vwa kwana eli livulu lya Bibele I Lutañi? Mu lihya. (Vithi. 22:29) Kuli vingila vyavingi vya kwanenamo eli livulu, cho vaka-kwambulula vanapande kupangetha vingila vije vipanga mu chitingitingi chavo.

Mwakulingila:

Ihuleni vavenya njuvo chihula chije chimukokela ku ñanda imo ya mu Bibele I Lutañi? Munatha kupangetha nambe vihula vije vili ku maputukilo a tupetulu tuli omu mu livulu. Omwo amikumbulula, cho tandeni chithoneka chije chinapande na kutanda nendi palangilafu imo mu Bibele I Lutañi? ije ili na viñanda vilitombola na chithoneka.
Mwatha lalo kupangetha viñanda vije vili ku maputukilo eli livulu, cho mumwetheni vikumbululo vya Mbimbiliya vilimo. Chakumwenako, mwatha kwendeka mithzimbu yaivi ivali na kuthoneka mu mapapelo a mithzimbu na kwendeka ngweni vanu vavangi vashaka kuthzivuka vikumbululo ku vihula vili ha liputa 3. Mwatha kwendeka lalo ngweni muli na kwendela vanu vamwatunga navo mangana muvaleke vyuma vyavivwa vikalingiwa kulutwe. Cho mumwetheni vikupulo vili ha liputa 4 na 5, na kumwihula ngweni: “Chikulahetho muka chimushaka kukamona muchikalishulithilila?” Ngila ikwavo lalo inapu ya kwendeka ngweni muli na kwendela vanu mangana muvakwathe kuwana vikumbululo ku vihula vyakama vya mu kuyoya. Cho mumwetheni vihula vili ha liputa 6, na kumuleka ngweni anguleho.
Pangetheni ngila ije imikwatha kushangumuka chilongetha cha Mbimbiliya. Munatha kwendeka ngweni: “Tuli na kumwetha vakwetu vatwatunga navo eli livulu likatukwatha kulilongetha Mbimbiliya. Mwalimonaho laja ndi? [Vandameneni akumbulule.] Nga chitava, ambateni Mbimbiliya yeni mangana njimimwethe mutukalilongethelalyo.”

Kavangeyeni Vyuma Vino mu Ngonde Ino:

Ethekeni kulinga evi vyuma vitunathimutwiya ha kulemetha kweni kwa nanga.
Nga muya mulihya, leketheniko munu imuli na kupanga nendi vimushaka kwendeka. (Vithi. 27:17) Nga ngila imushaka kupangetha kuipanga mu chitingitingi cheni, cho pangetheniko yeka.