Pangetheni Mwamuvwa Viñanda Vili mu Bibele I Lutañi?

Omwo munu atwalelelaho kuthzivuka viyalongetha Mbimbiliya na kuvipangetha, akola ku sipilitu cho ema vushuka vwa ku sipilitu. (Myatho. 1:1-3) Nga tupangetha mwamuvwa viñanda vili mu Bibele I Lutañi?, cho twatha kukwatha manene vanu vatukalongetha kukola ku sipilitu.

Vihula vya ku Maputukilo: Kapetulu na kapetulu kakala na vihula ku maputukilo vije vivanakumbulula mukati ka chilongetha. Mwatha kwihula evi vihula mu ngila imo mangana munu imukalilongetha nendi akale na chashu cha kulilongetha viñanda vinakavangeyaho. Mwatha lalo kumulomba ngweni endekeko kamandondo ha chihula na chihula. Oloni nga kakumbulula mwamuvwa, kumwapandele kumuleka vikumbululo oho vene. Vyakumbulula vimikwatha lika kuthzivuka vithimpi vimunapande kwakela manene mana na kuvikanyametha omwo mulilongetha nendi.—Vithi. 16:23; 18:13.

Viñanda vya Kuvwethzelela: Nga munu nathzivithitha na kutava vyanalilongetha mu kapetulu, cho mwatha kumushongangeya ngweni atande viñanda vya kuvwethzelela omwo awana thimbu. Thimbu kanda mushangumuke chilongetha cheka, vangeni kumulomba endeke vyuma vyanalilongethele mu kutanda kwendi mangana mumone indi navithzivithithile. Oloni nga mumona ngweni viñanda vya kuvwethzelela vinamukundama, cho ha thimbu ya kulilongetha, mwatha kulilongethavyo mu kutanda mapalangilafu na kwihula vihula vimunalivwaethela.

Viñanda vya Kwitulukamo: Viñanda vya kwitulukamo vije vili ku mamanethelelo a kapetulu vikevyo vikumbulula vihula vili ku maputukilo. Mwatha kupangetha evi viñanda mangana mumone indi munu imukalongetha ali na kuthzivithitha cho atha kulumbununa vithimpi vyakama. Tandeleni hamo nendi thimpi na thimpi na vithoneka viliho. Cho mulombeni ngweni apangethe chithoneka chiliho kulumbununa vuthunga vwa ñanda.—Vili. 17:2, 3.