YOYETHI YA VAKA-KILISITU

Mwatha Kutakametha Muka-Kilisitu Uje Nelukila Munima

Kanyungi elwitha manga ije yathzimbalele

Vaka-Kilisitu vavangi vaje vanelukila munima vakakala ku Chanukitho lya mu Chivali, April 11. Navo vashangumukile kushatuka mu ngila iya kukuyoya, oloni kukapwa muje, vanelukila munima mwafwa ya vyuma vya kulithethzathethza. Vimo vanavyendeka mu mbuloshuwa ya Ilukeni kuli Yehova. (Hev 12:1) Ava vanelukila munima vachinapu va theho kuli Yehova uje wavalandele na maninga a Munendi. (Vil 20:28; 1Pe 1:18, 19) Twatha kuvakwatha vati mangana veluke mu chikungulukilo?

Vakulunu va chikungulukilo vakashakethzeka na kukwatha vaka-Kilisitu vaje vanelukila munima ngwe mwakalingi kanyungi uje akashakethzeka manga ije inathzimbala mu vutanga. (Luk 15:4-7) Echi chimwetha ngwavo Yehova wavathzema. (Nje 23:3, 4) Tuvavoshe twatha kuvashongangeya, kethi vakulunu lika embwe. Nga tulifwita kuvamwetha chithzemo na ngothzi, cho tuthzivitha Yehova kuvwaha ku mbunge, cho naikeye lalo atuvethzikitha. (Vit 19:17; Vil 20:35) Thzivukeni munu imushaka kushongangeya, cho lingeni ngocho mu vwathi vwathi.

Laura ali na kukenga mu njanena, Abbey ali na kulombela, Abbey na Laura vanalivumbatela, cho lalo vali na kuvakupula chikupulo

KENGENI VINDIYO YA SHONGANGEYENI VAJE VANELUKILA MUNIMA, CHO THIMUTWIYENI HA VIHULA EVI:

Abbey walingile vika omwo wawanene Mukaleho uje kathzivukile?
Mwafwa vika tunapande kuleka vakulunu nga tuthinganyeka vya kukwatha munu uje nelukila munima?
Abbey wavwahethele vati vungendthzi vwendi vwa mu chivali vwa kuya kuli Laura?
Abbey wamwethele vati lukakateya na kukwata mbunge na chithzemo omwo wakele na kutakametha Laura?
Vika vitulilongetha ku chithimo cha Yesu chije chili ku Luka 15:8-10?
Vuvwa muka vwatundile mu kulifwita kukwatha Laura?