“Paulu Wakandelelele Kuli Njambi na Kupwa wa Kusimpa”

Bandolome ba ku cikungulukilo ca Loma mubazibile ngwabo Paulu ali na kwija, bendele makilomita a kupwa 64 mangana bakaliwane nendi. Paulu walizibile bati ha kumona kulifwita kwa bandolome bendi omwo bamusheshele? ‘Omwo Paulu wabamwene, wakandelelele kuli Njambi co wasimpile.’ (Vil 28:15) Nameme bazibukile ngwabo Paulu wapwile muka-kutakamesa bikungulukilo, oloni ha simbu eyi ikeye ibatakamesele ha kupwa cinzinda.—2Ko 13:10.

Matangwa ano, bantwama ba kuzenguluka bakendela bikungulukilo mu kutakamesa bandolome na bandokazi. Ngwe mwa banu ba Njambi boshe, nabo bakajuka na kukala na bishoti na kuzeya. Nga ntwama wa kuzenguluka na mwebwendi bendela cikungulukilo ceni, bika munapande kulinga mangana mubakwase bapwe ba kusimpa omwo ‘mwakulitakamesa umo na mukwabo’?—Lom 1:11, 12.

• 

  Kalakaleni ku ciwano ca kuya mu lihya. Ntwama wa kuzenguluka akalizibi kubwaha nga baka-kwambulula balifwita kuwaniwa ku biwano byoshe mu calumingo ca kulitila. (1 Tesa 1:2, 3; 2:20) Lingeniko bupainiya mu ngonde ya myendela. Pangeni hamo na ntwama wa kuzenguluka na mwebwendi mu lihya nambe kuya na umo wabo ku cilongesa ceni ca Mbimbiliya. Bakalikuwu kupangela hamo na baka-kwambulula ba kulisezaseza, kwambateselela na babaha na baje kubesi na butongwe mu kwambulula.

• 

  Batambuleni. Mwasa kubawanenako mulili mwakulala nambe kubalanya kwakulya nabo. Nga mulinga ngoco mumwesa ngweni mwabazema. Kubesi kubandamena kubalingila byuma mu ngila ya kulitila.—Luk 10:38-42.

• 

  Mwononokeni. Ntwama wa kuzenguluka akatunangula mutwasa kupangela Yehova mwamubwa. Bisimbu bimo nasa kutwana cinangulo ca nzili. (1Kr 5:1-5) Akabwaelela nga tumwononoka.—Hev 13:17.

• 

  Endekeni majwi a kukandelela. Lekeni ntwama wa kuzenguluka na munakazi wendi bukwasi bumunawana ha kufwitangana kwabo. Mwasa kwendeka nabo citona mesho, kubasonekela mukanda nambe kubatumina kadi.—Kolo 3:15.