YOYESI YA BAKA-KILISTU
Shakezekeni Biyongola bya Njambi
Tushaka kuzibisa Yehova kubwaha ku mbunge mu byuma byoshe bitulinga. (Vis 27:11) Ngeci, tunapande kwangula byuma bije bilitombola na biyongola byendi, nameme kukwesi lishiko mpundu lyendeka ha byuma bitushaka kwangula. Bika bitukwasa kulinga ngoco?
Tandeni Mbimbiliya ha litangwa na litangwa. Simbu yoshe itutanda Mbimbiliya, kunapu ngwe tuli na kusimutwiya na Yehova. Twasa kuzibuka biyongola bya Yehova nga tusinganyekesesa mwalingilile banu bendi kunima, na kusinganyekesesa ha myanja ya banu baje balingile byuma byabibwa nambe byabibi. Nga tushaka kwangula byakulinga, sipilitu ya kujela yasa kutwanukisa bisimpi nambe binangulo bitwalilongesele mu Lijwi lya Njambi.—Yiw 14:26.
Tondeseseni. Nga mushaka kwangula byakulinga, lihuleni ngweni, ‘Cisoneka nambe muzimbu muka wa mu Mbimbiliya unjikwasa kunanguka biyongola bya Yehova ha byuma ebi?’ Lombeni Yehova amikwase, co pangeseni bikwata bitukapangesa mu kutondesesa mangana muwane binangulo bije bimikwasa mu bukalu bweni nomu mwakubipangesela.—Mya 25:4.
KENGENI VIDIO YA ‘KOLESENI OMWO MUSHATUKA’—LYENI BYAKULYA BIJE BIKANYAMESA MUBILA. KUTUNDAHO, KUMBULULENI BIHULA BINATAKO:
Bukalu muka bwanaliwanene nabwo ndokazi wa mwanike itunamono mu vidio?
Mwasa kupangesa bati bikwata bya kupangesa mu kutondesesa, nga mwaliwana na bukalu bwa kulifwa?
Bukwasi muka butuwana nga tutondesesa na kulinga cilongesa ca munu endilika mu ngila ije itukwasa kwangula mwamubwa byakulinga?—Heb 5:13, 14