Bihula Bya Baka-kutanda

Kuma bifwa bibanatumbula ku Ngalatiya 5:22, 23, bikebyo lika byapwa ‘bushuka bwa sipilitu’ ndi?

Ku Ngalatiya 5:22, 23, banatumbulako bifwa bya kupwa 9 ngwabo: ‘Bushuka bwa sipilitu bunapu cizemo, kujolela, kwoloka, likakateya, ngozi, bubwa, likulahelo, kuwa mbunge na kukwata mbunge.’ Oloni kutwapandele kusinganyeka ngwetu ebi bifwa bikebyo lika byapwa ‘bushuka bwa sipilitu.’

Tuzibuka bati? Tuzibuka ngoco mwafwa ya byuma byasonekele Paulu simbu kanda asoneke ebi bifwa. Wasonekele ngwendi: ‘Bilinga bya ku situ byapwa bupangala, kulijwalesa, bilinga bya kukezima, kulemesa tumponya, bulozi, cizindo, kulwa, cipululu, matoto, kulyangununa mu bibunga, lifuwa, kupenda, bilika bya miyoyo na byuma byeka bya kufwa ngwe ebi.’ (Ngala 5:19-21) Paulu mwendekele ngwendi ‘na byuma byeka bya kufwa ngwe ebi,’ wamwesele ngwendi kuli bikwabo bije katumbwile. Ebi byuma binambateselela na bifwa byanatumbula ku Kolose 3:5. Wapangesele endekesi ya kulifwa mwamanesele kwendeka bifwa byabibwa bya kupwa 9. Wendekele ngwendi: “Kukwesi lishiko libindika byuma bya cifwa eci.” Oku kumwesa ngwabo Paulu kendekele bifwa byoshe bya bushuka bwa sipilitu.

Twasa kuzibisisa mwamubwa eyi ñanda nga twesekesa bushuka bwa sipilitu ku bushuka bwa ceke buje bwendekele Paulu mwasonekelele cingulukilo ca Efeso. Wabasonekelele ngwendi bushuka bwa ceke bunapu ‘muyati woshe wa bubwa na kusungama na busunga.’ (Efeso 5:8, 9) ‘Bubwa’ na kusungama na busunga byapwa bushuka bwa ceke, co lalo byapwa ‘bushuka bwa sipilitu.’

Twasa kuzibisisa lalo eyi ñanda nga twesekesa ‘bushuka bwa sipilitu’ ku bifwa bya kupwa 6, bije byendekele Paulu kuli Timateo ngwendi abimwese. Wamulekele ngwendi, ‘kabangeya busunga na kulongwa kuli Njambi na likulahelo na cizemo na kukolesa na kuwa mbunge.’ (1 Tima 6:11) Likulahelo na cizemo na kuwa mbunge bikebyo lika bibanatumbula ha mukana wa ‘bushuka bwa sipilitu.’ Oloni Timateo wapandele kulomba sipilitu asina akale na bifwa bikwabo bya kufwa ngwe busunga, kulongwa kuli Njambi na kukolesa.—Esekeseni Kolose 3:12; 2 Petulu 1:5-7.

Oku kumwesa ngwabo kuli bifwa bimo byanapande kukala nabyo muka-Kilistu bije kubyesi ku Ngalatiya 5:22, 23. Sipilitu ya Njambi yasa kutukwasa kukala na bifwa byoshe bya kupwa 9 bije byapwa ‘bushuka bwa sipilitu.’ Oloni kuli bifwa bikwabo bitunapande kukala nabyo omwo tuya na kukola ku sipilitu, nomwo tuzala bunu bwabuha bubanatanga mu cifwa ca Njambi mu busunga na mu kulongwa.—Efeso 4:24.