Munapande Kulombela Bati Mangana Njambi Amikumbulule?
Yehova Njambi wapwa ‘muka-kukumbulula malombelo.’ (Myaso 65:2) Twasa kusimutwiya nendi kwoshe-kwoshe kutuli na ha simbu yoshe-yoshe. Twasa lalo kulombela mu kutambeka nambe kulombelela mu mbunge. Yehova washaka tumutumbule ngwetu “Tate,” co wapwa bene Tate yetu wamubwa manene. (Mateo 6:9) Watuzema, co natulongesa mutunapande kulombelela mangana malombelo etu ete kuli ikeye.
LOMBELENI KULI YEHOVA MU LIZINA LYA YESU
“Nga mukalomba cuma coshe kuli Tate mu lizina lyange akamyanaco.”—Yowano 16:23.
Awa majwi a Yesu amwesa ngwawo Yehova ashaka ngwendi tulombele kuli ikeye mu lizina lya Yesu Kilistu keti kupangesa tumponya, tungelo nambe bakulu. Nga tulombela kuli Njambi mu lizina lya Yesu, co tumwesa ngwetu tuli na kukandelela ku byuma bya seho byali na kutulingila Kilistu. Yesu wendekele ngwendi: ‘Na umo wahi aya kuli Tate kubanga etile muli yange.’—Yowano 14:6.
ENDEKENI BILI KU MBUNGE YENI
“Mulekeni bukalu bweni bwoshe.”—Myaso 62:8.
Tunapande kusimutwiya na Yehova ngwe tuli na kusimutwiya na tate yetu uje watuzema. Malombelo etu kuapandele kupwa a kutanda mu mabulu nambe kwendeka majwi a kulifwa simbu yoshe, oloni tunapande kumuleka mu kasingimiko kutundilila kwisi ya mbunge.
LOMBELENI MU KULITOMBOLA NA CIZANGO CA NJAMBI
“Atuziba nga tumulomba cuma cimo ngwe ku cizango cendi.”—1 Yowano 5:14.
Mu Mbimbiliya, Yehova Njambi natuleke byuma byatulingila na bije byatonda ngwendi tulinge. Nga tushaka ngwetu akumbulule malombelo etu, co tunapande kumulomba mu kulitombola na “cizango cendi.” Twasa kulinga ngoco nga tulilongesa Mbimbiliya mangana tumuzibuke mwamubwa. Njambi washaka manene malombelo a cifwa eci.
BYUMA MUKA BITUNAPANDE KULOMBA?
Lombeni byuma bimutonda. Twasa kulomba Njambi byuma bitukatondo manene mu kuyoya bya kufwa ngwe bya kulya, bizalo na kwa kukala. Twasa lalo kumulomba mana mangana twangule bwino bya kulinga na kukolesa mu byeseko. Co lalo twasa kumulomba atukwase kukala na likulahelo lya kukanyama na kulomba ngwetu atukonekele ku bubi bwetu.—Luka 11:3, 4, 13; Yakomba 1:5, 17.
Lombeleleniko bakweni. Bisemi bababwa bakabwahelela nga bana babo balizema umo na mukwabo. Yehova nendi washaka ngwendi bana bendi hano hasi balizeme umo na mukwabo. Tunapande kwanukako baka-limbo lyetu, bana betu, babushoko bwetu na babusamba betu mu malombelo. Ndongesi Yakomba wasonekele ngwendi: “Lilombeleleni umo na mukwabo.”—Yakomba 5:16.
Kandeleleni kuli Njambi. Mbimbiliya inendeka hali Ishamatanga ngwayo: ‘Akalingi byuma byabibwa, akamyana nyonzi ya kutunda mwilu na bimbuto ha simbu yaibwa, akamyana byakulya na kushulisa bimbunge byeni na kubwahelela.’ (Vilinga 14:17) Nga tusinganyekesesa ha byuma byoshe byanatulingila Njambi, co tukandelela kuli ikeye mu lilombelo. Co lalo twasa kumwesa kukandelela kuli Njambi nga twononoka mashiko endi mu kuyoya kwetu.—Kolose 3:15.
KALENI NA MBUNGE YA KUBANDAMENA CO TWALELELENIHO KULOMBELA
Simbu imo tunasa kuzeya nga tumona ngwetu Njambi kesi na kukumbulula bwasi lilombelo lyetu. Nga Njambi kakumbulula bwasi malombelo etu, co kumwesa ngwabo katwakele mbunge ndi? Embwe. Tucisimutwiyeniko ha byuma bibaliwanene nabyo banu bamo mangana tumone seho ya kutwalelelaho kulombela.
Steve itunendeka mu ñanda ya kulibanga ngwendi: “Ngwe kunjatwaleleleho kulombela, ngwe kunjapwile wa kubwahelela.” Byuma muka byamukwasele atenguluke? Washangumukile kulilongesa Mbimbiliya, co wamwene seho ya kulombela na kutwalelelaho kulinga ngoco. Steve ngwendi: “Njikakandelela kuli Njambi mu lilombelo omwo walingisile babusamba bange banjikwase. Hano njinapu wa kubwahelela oni.”
Jenny nendi walizibile ngwendi Njambi kasa kutolilila ku lilombelo lyendi. Wendekele ngwendi: “Ha simbu injalizibile ngwange njiwangoco, njalambelelele Njambi mu lilombelo mangana anjikwase kuzibisisa byuma byakele na kunjilingisa njilizibe ngoco.” Kulombela kwakwasele bati Jenny? Wendekele ngwendi: “Kusimutwiya na Njambi kunanjikwasa kumona byuma mu ngila yaibwa. Kunanjikwasa njinanguke ngwange nameme njilimona ngwe njiwa ngoco, oloni kuli Njambi njiwa seho. Kunanjikwasa lalo njikale na mbunge ya kubandamena na kutwalelelaho kulombela.” Bubwa muka bwatundumo? Wendekele lalo ngwendi: “Kulombela kunanjikwasa njimone Yehova kupwa Njambi, Tate na Kabusamba wa cizemo uje wanjaka mbunge, co asa kunjikwasa simbu yoshe nga njitwalelelaho kulinga byabibwa.”
Isabel mwakamono munendi uje nabwahelela nameme wapwa ciyanga ngwendi, “Njikanuka mwanakumbulwila malombelo ange Yehova Njambi”
Tusimutwiyeniko lalo hali Isabel. Isabel mwakele na cikute, ndotolo wamulekele ngwendi munendi asemuka oku napu ciyanga. Wazibile manene kubabala ku mbunge. Bamo bamunangwile ngwabo atundise limo. Wendekele ngwendi: “Njalizibile ngwe njitse lika.” Walingile bati? Wendekele ngwendi: “Njalombelele lwalwingi kuli Njambi mangana anjikwase.” Mu kwita kwa simbu wakitile munendi Gerard, co wapwile ciyanga. Kuma Isabel aliziba ngwendi Njambi nakumbulula malombelo endi ndi? Eyo. Mu ngila muka? Isabel ngwendi: “Munjikamono munange uje ali na myaka 14 nabwahelela nameme wapwa ciyanga njikanuka mwanakumbulwila malombelo ange Yehova Njambi nomwo mwananjibezikisila.”
Awa majwi atwanukisa byasonekele mukakwimba umo ngwendi: “Yobe Shukulu Kalunga ukatolilila ku malombelo a baka-kulikehesa, co ukabatakamesa.” (Myaso 10:17) Awa majwi a muka-kwimba atushongangeya kutwalelelaho kulombela.
Kuli malombelo amangi a Yesu abanasoneka mu Mbimbiliya. Lilombelo lyatsimana manene linapu lije lyalongese bandongesi bendi. Bika bitwasa kulilongesako?