Kuma Kano Kaye Kakanyonga Ndi?

Hamo muzibuka ngweni Mbimbiliya inendeka bya kukotoka kwa kaye. (1 Yowano 2:17) Kuma Mbimbiliya imwesa ngwayo banu boshe bakanyonga ndi? Kuma bakanyongesa lifuti-libu indi bakanyongesa lika byuma byoshe bya kuyoya biliho?

MBIMBILIYA NGWAYO NA CIMO CAHI CIBAKALINGA

Byuma Muka Bije Kubikanyongo?

BANU

Biyendeka Mbimbiliya: Njambi “katangele kaye ngeci kapwe ngwe mambo embwe, oloni hapwe hakuyoyela banu.”—ISAYA 45:18.

Lishali lili mukati ka shwata ya malundu.

LIFUTI-LIBU

Biyendeka Mbimbiliya: “Bisemwa bija, co bisemwa biya, oloni kaye hanga bene kakala myaka yoshe.”—MUKA-KWAMBULULA 1:4.

AWA MAJWI ALUMBUNUNA BIKA? Mbimbiliya imwesa ngwayo kaye kukakanyongo, co simbu yoshe hakakala banu. Co kunyonga kwa kaye kulumbununa bika?

SINGANYEKESESENI HA ÑANDA EYI: Mbimbiliya inesekesa kukotoka kwa kaye ku byuma byalingiwile mu simbu ya Nowa. Ha simbu ije mu kaye mwashulile “bilinga byabibi.” (Kushangumuka 6:13) Oloni Nowa wapwile wa kulongwa. Ngeci Njambi wobwele Nowa na naanga yendi, oloni wanyongesele banu boshe bababi na libazi. Mbimbiliya yendeka byuma byalingiwile ha simbu ije ngwayo: “Mema aje a libazi akewo aje anyongesele hasi ha ku sañulu.” (2 Petulu 3:6) Omwo mukemwo mukanyongelele kaye mu simbu ya Nowa. Oloni bika mpundu bibanyongesele? Njambi kanyongesele lifuti-libu, oloni wanyongesele banu bababi. Ngeci Mbimbiliya muikendeka ngwayo kaye kakanyonga kuyesi kulumbununa lifuti-libu embwe. Oloni ikalumbununa kunyonga kwa banu bababi na byuma byabo byoshe.

Byuma Muka Bije Bikanyonga?

BUKALU NA BUBI

Biyendeka Mbimbiliya: “Mu kasimbu kakandondo lika, baka-bubi bakahwa boshe njwa, ukabashakezeka, oloni kuukabawana. Baka-kulikehesa bakaswana mu lifuti, co bakajolela na kukala mu kwoloka.”—MYASO 37:10, 11.

Bikupulo: 1. Bezi banazala byuma bya kushweka cihanga bali na kutunda mu cintolo oku banambata byuma bibanebi. 2. Munalume ali na kwana munalume mukwabo ngonga ya kushula ya bimbongo.

AWA MAJWI ALUMBUNUNA BIKA? Libazi lya Nowa kulyamanesele bubi. Munima ya libazi, banu bababi bashangumukile lalo kuyandesa manene bakwabo. Oloni ololo Njambi atundisako bubi bwoshe. Ngwe mutunamwena, muka-kwimba wendekele ngwendi: “Baka-bubi bakahwa boshe njwa.” Njambi akapangesa Bumwene bwendi buje bwapwa fulumende ya mwilu mu kumanesa bubi.

SINGANYEKESESENI HA ÑANDA EYI: Kuma baje bali na kuyula hano hasi bakakundwiya Bumwene bwa Njambi ndi? Mbimbiliya imwesa ngwayo kubakalingi ngoco. Oloni imwesa ngwayo bakalwisa Bumwene bwa Njambi. (Myaso 2:2) Bika bikatundamo? Bumwene bwa Njambi bukanyongesa bumwene bwoshe, co “bukebwo bukakala myaka yoshe.” (Ndanyele 2:44) Bika bakanyongesela bumwene bwa hano ha kaye?

BITUTONDA—Tutonda Ngwetu Bifulumende Bili Hano Hasi Binyonge

Biyendeka Mbimbiliya: “Munu ikeye babenya na mana endi kasa kwangula ngila yaibwa ngeci endemo.”—NJELEMIYA 10:23.

Banu bali na kwita ku mutambela kubanalamazeka mapapelo a bupolitiki.

AWA MAJWI ALUMBUNUNA BIKA? Banu kubabatangele na cashu ca kuliyula bakebo babenya. Kubasa kuyula mwamubwa bakwabo banu na kumanesa bukalu bubali na kuliwana nabwo.

SINGANYEKESESENI HA ÑANDA EYI: Libulu limo ngwalyo, bifulumende bya banu binonowa “kumanesa bukalu bubali na kuliwana nabwo banu bwa kufwa ngwe buhutu, njala, mishongo, bukalu bwa kulizila na binzita.” Lyendeka lalo ngwalyo: “Banu bamo bakulahela ngwabo ngwe fulumende imo lika iyula kaye koshe ngwe obu bukalu bwoshe buhwa.” Oloni nameme kukale fulumende imo ya banu ba kujeneka kulumbunuka, kuyasa kumanesa bukalu butunasimutwiya. Bumwene bwa Njambi bukebwo lika bwasa kumanesa bukalu bwoshe njwa.

Ngeci, banu bababwa kubapandele kulishoshomwena mubaziba ngwabo kano kaye kakanyonga. Oloni banapande kubwahelela mwafwa kano kaye kakabi mukakanyonga kukaija kaye kakaha ka Njambi.

Ebi byuma bikalishulisilila tangwa lika? Mu ñanda inatako tusimutwiya muinakumbulwila Mbimbiliya eci cihula.