“Baje Balemesa Shukulu Kalunga Kubakajeneka Cuma Cacibwa na Cimo Cahi”

1. Bukalu muka bwaliwanene nabwo Ndabiti?

SAULU uje wapwile mwene wa Isalele washakele kutsiya Ndabiti, co Ndabiti watewele. Byakulya mubyahwile Ndabiti waile ku nganda ya Nombe mangana akalombe mikasha ya makende itanu. ( 1 Samwe 21:1, 3) Ikeye na banu bendi batewelele mu bwina bwa mu limanya. (1 Samwe 22:1) Ndabiti waliwanene bati na bukalu bwa cifwa eci?

2. Saulu wakele bati buyoye bwendi mu bushonde? (1 Samwele 23:16, 17)

² Saulu wazibilile manene Ndabiti cipululu, mwafwa banu babangi bamushakele, co bakele na kumushangazala mwafwa wahyanene mu binzita byabingi. Saulu wazibukile lalo ngwendi Yehova wamubyanene, mwafwa kamwononokele, co Yehova wangwile Ndabiti mangana apwe mwene wa Isalele. (Tandeni 1 Samwele 23:16, 17.) Nameme ngoco, ha kupwa mwene wa Isalele Saulu wakele na maswalale babangi na baka-kumukundwiya babangi. Ngeci, Ndabiti walyunukwile kutewa bamutsiya. Kuma Saulu wasinganyekele ngwendi asa kwonowesa Njambi apwise Ndabiti mwene ndi? (Isaya 55:11) Mbimbiliya kuyendekeleho, oloni tuzibuka ngwetu Saulu wakele buyoye bwendi mu bushonde. Baje bakalwisa Njambi bakonwa simbu yoshe.

3. Ndabiti walizibile bati nameme waliwanene na bukalu?

³ Ndabiti wapwile wa kulikehesa. Keti ikeye walyangwile kupwa mwene wa Isalele. Yehova ikeye wamwangwile. (1 Samwe 16:1, 12, 13) Oloni Saulu wazindile manene Ndabiti. Nameme ngoco, Ndabiti kanene Yehova mulonga, nambe kuyayabala, mwakele na byakulya byabindondo nambe mwakele mu bwina bwa mu limanya. Cisholoka ngwe ha simbu yalishwekele muje mu bwina bwa mu limanya hakeho hasonekelele mwaso waubwa wa kushangazala Njambi uje uli na majwi haje hanemana cisoneka cetu ca mwaka aje endeka ngwawo: “Baje balemesa Shukulu Kalunga kubajeneka cuma cacibwa na cimo cahi.”—Myaso 34:10.

4. Bihula muka bitukumbulula, co mwafwa bika binapu bya seho?

⁴ Bangamba ba Yehova babangi kubesi na byakulya byakupwamo na byuma bikwabo bya kulikwasesa mu kuyoya.b Ebi binalingiwa ku Bakaleho ba Yehova babangi maneneni ha simbu ya mushongo wa Corona. Omwo tushwenya ku ñababa yakama tuliwana na bukalu bwakama manene. (Mateo 24:21) Ngeci, tusimutwiyeni ha bihula bino biwana: Bika twendekela ngwetu Ndabiti “kajenekele cuma cimo cacibwa na cimo cahi”? Mwafwa bika tunapande kujauka na byuma bituli nabyo? Mwafwa bika tunapande kukulahela ngwetu Yehova atwana byuma bitutonda? Twasa kulibwahesela bati bukalu butukaliwana nabwo kulutwe?

“NA BIMO BYAHI NJIJENEKA”

5-6. Mukanda wa Myaso 23:1-6 utukwasa bati tuzibisise byalumbunwine Ndabiti omwo wendekele ngwendi bangamba ba Njambi “kubakajeneka cuma cacibwa na cimo cahi”?

⁵ Ndabiti walumbunwine bika mwendekele ngwendi bangamba ba Yehova “kubakajeneka cuma cacibwa na cimo cahi”? Omwo Ndabiti wasonekele mukanda wa Myaso 23, wapangesele majwi a kulifwa. Ngeci, ou mukanda wasa kutukwasa kuzibisisa byalumbunwine. (Tandeni Myaso 23:1-6.) Ndabiti washangumukile eyi capita na majwi akwendeka ngwawo: “Shukulu Kalunga ikeye kanyungi kange. Na bimo byahi njijeneka.” Oku ku mukanda woshe Ndabiti natumbulako byuma bya seho manene bya kufwa ngwe byuma byabibwa byamulingilile Yehova mwafwa ya kumutabesa apwe Kanyungi kendi. Yehova watwamenenene Ndabiti mu “bingila bya kusungama” na kutwalelelaho kumukwasa ha bisimbu byabibwa na bisimbu bya bikalu. Ndabiti wazibukile ngwendi nameme ali ha “mwila wa kuzibuluka” wa Yehova anga aliwana na bukalu. Simbu imo wazeyele, co wafwile ngwe munu uje enda “mukati ka butsiki mu lisusulungu.” Co lalo bitozi bendi bakele na kumuyomba. Oloni Ndabiti ‘kazibile lyoba’ mwafwa Yehova wapwile Kanyungi kendi.

⁶ Ngeci, tukumbululeni oni cihula cetu ca kulibanga. Bika twendekela ngwetu Ndabiti “kajenekele cuma cacibwa na cimo cahi?” Mwafwa wakele na byuma byoshe bije byamukwasele akanyamese busamba bwendi na Yehova. Wabwahelelele nameme wakele na byuma byabindondo bya ku mubila. Ndabiti wajaukile na byuma bije byamwanene Yehova. Kumubezikisa na kumunyungilila kuli Yehova bikebyo byuma byapwile bya seho manene kuli ikeye.

7. Kwesekesa na mukanda wa Luka 21:20-24 bukalu muka bubaliwanene nabwo baka-Kilistu ba mu Yundeya?

⁷ Majwi a Ndabiti atukwasa tunanguke ngwetu tunapande kukala na biyongola byabibwa ha byuma bya ku mubila. Twasa kupangesa byuma bya ku mubila byoshe-byoshe bituli nabyo, oloni kubyapandele kupwa manene bya seho mu kuyoya kwetu. Eyi ikeyo simpi ibazibisisile baka-Kilisitu baje bakele mu Yundeya. (Tandeni Luka 21:20-24.) Yesu wabanangwile ngwendi, simbu imo nganda ya Yelusalema “bakaizengeleka ku mbunga ya maswalale.” Ebi byuma mubyalingiwile bapandele ‘kutewela ku malundu.’ Banu batundile muje mu nganda bobokele, oloni basezele byuma byabingi. Kaposhi ka Kukengela kamo ka kunima kendekele ngwako: “Basezele mahya abo na binjibo byabo, co kubambatele bitenga bimo mu binjibo byabo. Bakulahelele ngwabo Yehova abanyungilila na kubakwasa nga batwameke bya Bumwene mu mutamba wa kulibanga kutubakana byuma byeka bije byamonekele ngwe bya seho.”

8. Bika bitulilongesa kuli baka-Kilistu baje bakele mu Yundeya?

⁸ Bika bitulilongesa kuli baka-Kilistu baje bakele mu Yundeya? Kaposhi ka Kukengela ka kulifwa kendekele lalo ngwako: “Kulutwe tukaliwana na byeseko bije bikamwesa mutwamwena byuma bya ku mubila. Ebi byeseko bikamwesa indi twamona byuma bya ku mubila kupwa bya seho indi kupwa ba kulongwa na kwoboka bikebyo byapwa bya seho. Ha simbu ya ñababa yakama, tukaliwana na byeseko byakama, co kutukasa kulikuwa byuma bimo. Tunapande kulibwahesela kukalinga byuma byoshe-byoshe ngwe mubalingilile baka-Kilistu baje batundile mu Yundeya.”c

9. Byuma muka bimulilongesa ku majwi anangwile Paulu baka-Kilistu ba mu Yundeya?

⁹ Kwapwile kwakukalu kuli baje baka-Kilistu kuseza byuma byabingi bibakele nabyo na kukashangumuka lalo buyoye. Bapandele kukulahela ngwabo Yehova abakwasa mangana bawane byuma bya ku mubila. Oloni kuli byuma bimo byabakwasele. Myaka itanu kunima simbu kanda Baloma bazengeleke Yelusalema, kapositolo Paulu wanangwile baka-Kilistu ba mu Yundeya ngwendi: “Kesi mukakateye mu cizemo ca bimbongo, pweni baka-kujauka na byuma bije mulinabyo. Omwo Njambi nendeka ngwendi, ‘Kunjikamiseze na lumo lwahi nambe kumibyana.’ Ngeci bene, tupweni baka-kusimpa na kwendeka ngwetu, ‘Shukulu Kalunga ikeye mukwasi wange, co kunjizibi lyoba. Munu asa kunjilinga bikajo?’” (Heve 13:5, 6) Baje bakabangeyeye cinangulo ca Paulu simbu kanda Baloma beje, kwabapwililile kwakwasi kujauka na byuma bibakele nabyo. Bakulahelele ngwabo Yehova abakwasa bawane byuma bibatondele. Majwi a Paulu atukwasa tukulahele ngwetu Yehova atwana byuma bya ku mubila bitutonda.

“EBI BINAPUMO KULI YETU”

10. Byuma muka byatunangwile Paulu?

¹⁰ Paulu wanangwile Timateo hamo lika netu ngwendi: “Nga tuli na byakulya na bizalo, ebi binapumo kuli yetu.” (1 Tim. 6:8) Kuma Paulu walumbunwine ngwendi kutwapandele kulikuwa byakulya byabibwa, kukala mu njibo yaibwa nambe kulandako bizalo ha bisimbu bimo ndi? Embwe. Paulu walumbunwine ngwendi tunapande kujauka na byuma byoshe bituli nabyo. (Fili 4:12) Mukemwo mwakele na kulingila Paulu. Busamba bwetu na Yehova bukebwo bwa seho manene kutubakana byuma bya ku mubila bituli nabyo.—Hamba 3:17, 18.

11. Bika bitulilongesa ku majwi alekele Mosesa Baisalele?

¹¹ Yehova azibuka mwamubwa byuma bitutonda. Tucisimutwiyeni ha majwi alekele Baisalele munima ya kukala mu mambo ha myaka 40. Wabalekele ngwendi: ‘Anukeni mwamibezikisilile Shukulu Kalunga Njambi yeni mu byuma byoshe bije bimwapangele na maboko eni. Ikeye babenya waminyungile omwo mwakele na kwendangana mukati ka mambo ije yakama ya kukomokesa. Shukulu Kalunga Njambi yeni wakele hamo neni ha myaka eyi makumi awana, co kumwajenekele cuma na cimo cahi.’ (Kwitu 2:7) Ha myaka 40 Yehova wanene Baisalele byakulya bibatumbula ngwabo maana. Co lalo bizalo bibatundile nabyo mu Ingito kubyabihile. (Kwitu 8:3, 4) Nameme Baisalele bamo kubajaukile na byuma bibakele nabyo, oloni Mosesa wabanukisile ngwendi bakele na byuma byoshe bibatondele. Tuzibisa Yehova kubwaha nga tujauka na byuma bituli nabyo. Yehova ashaka ngwendi tukandelele ku byuma byoshe byali na kutwana nameme bisholoka ngwe byabindondo.

KULAHELENI NGWENI YEHOVA AMIKWASA

12. Bika bimwesa ngwabyo Ndabiti wakulahelele Yehova?

¹² Ndabiti wazibukile ngwendi Yehova wapwa wa kulongwa, co akaka manene mbunge baje bamuzema. Nameme buyoye bwa Ndabiti bwakele mu bushonde mwakele na kusoneka mukanda wa Myaso 34, oloni likulahelo lyamulingisile alizibe ngwendi: “Kangelo ka Shukulu Kalunga” ali na kumunyungilila. (Myaso 34:7) Hamo Ndabiti wakele na kwesekesa Kangelo ka Yehova ku liswalale uje ali mu cilombo oku nalibwahesela kulwisa citozi cendi. Nameme Ndabiti wapwile liswalale wa nzili, co lalo Yehova wamukulahesele ngwendi apwa mwene, oloni Ndabiti kakulahelele cashu cendi ca kupangesa cipapa nambe mukwale mu kuhyana bitozi bendi. (1 Samwe 16:13; 24:12) Ndabiti wakulahelele Njambi mwafwa wazibukile ngwendi kangelo ka Yehova ‘akanyungu baje bazibila lyoba Shukulu Kalunga.’ Kutubandamena ngwetu Yehova atuyungilile mu ngila ya kukomokesa ha simbu ino. Oloni tuzibuka ngwetu baje banakulahela Yehova bakawana mwonyo wa myaka yoshe nameme batsa.

13. Omwo Ngonge wa Mangonge akatulwisa, mwafwa bika tukamoneka ngwe kutwesi na baka-kutulwila, oloni mwafwa bika kutwapandele kukaziba lyoba? (Taleni cikupulo cili ha liputa lya kulibanga.)

¹³ Kulutwe tukaliwana na bukalu buje bunasa kukatwonowesa kukulahela Yehova. Omwo Ngonge wa Mangonge uje emanena cibunga ca baka-mafuti akalwisa banu ba Njambi tunasa kukasinganyeka ngwetu bakatunyongesa. Tunapande kukakulahela ngwetu Yehova asa kutwobola, co akalinga bene ngoco. Kuli baka-mafuti tukamoneka ngwe manga uje kesi na kanyungi. (Ezeki 38:10-12) Kutukakala na bitwa bya nzita, co lalo kutukalilongesa mwakulwila. Baka-mafuti bakasinganyeka ngwabo basa kutuhyana. Kubazibuka ngwabo tungelo ba Yehova banalibwahesela kutunyungilila. Oloni yetu tuzibuka ngoco mwafwa tuli na likulahelo. Baka-mafuti kubakulahelele Njambi. Bakalikomokela manene omwo tungelo ba Yehova bakatulwila.—Kujo 19:11, 14, 15.

LIBWAHESELENI BYUMA BIKALINGIWA KULUTWE

14. Bika bitunapande kulinga mangana tulibwahesele byuma bikalingiwa kulutwe?

¹⁴ Bika bitunapande kulinga mangana tulibwahesele byuma bikalingiwa kulutwe? Ca kulibanga kutwapandele kusinganyeka ngwetu byuma bya ku mubila byapwa bya seho manene, mwafwa litangwa limo tukabiseza. Co lalo tunapande kujauka na byuma bituli nabyo na kupwa ba kubwahelela omwo tuli na kupangela Yehova. Nga tuzibuka mwamubwa Njambi yetu, co tukulahela ngwetu akatunyungilila mwakatulwisa Ngonge wa Mangonge.

15. Byuma muka byaliwanene nabyo Ndabiti bije byamwesele ngwabyo Yehova amukwasa simbu yoshe?

¹⁵ Tucisimutwiyeni ha cuma cakwasele Ndabiti, cije casa kutukwasa tulibwahesele byeseko bitukaliwana nabyo kulutwe. Ndabiti wendekele ngwendi: ‘Makeleni mumone ngweni Shukulu Kalunga wapwa wamubwa. Abwahelela munu uje atewela muli ikeye.’ (Myaso 34:8) Awa majwi amwesa ngwawo Ndabiti wakulahelele ngwendi Yehova amukwasa. Kakangi Ndabiti wakulahelele Yehova, co Njambi wakele na kumukwasa. Ndabiti wapwile mwanike mwaile na kulwa na liswalale wa kutunuka Ngolyata, co walekele uje liswalale wa nzili manene ngwendi: “Ku litangwa lya lelo bene, Shukulu Kalunga akakukundika mu liboko lyange.” (1 Samwe 17:46) Kutundaho, Ndabiti mwapangelele mwene Saulu, ou mwene washakele kumutsiya ha bisimbu byabingi, oloni “Shukulu Kalunga wakele hamo na Ndabiti.” (1 Samwe 18:12) Ndabiti wakulahelele ngwendi Yehova amukwasa mu bukalu bwaliwana nabwo mwafwa wamukwasele kunima.

16. Twasa kumakela bati bubwa bwa Yehova?

¹⁶ Nga tukulahela manene Yehova ha simbu ino, co tukakulahela ngwetu akatukwasa mu bukalu butukaliwana nabwo kulutwe. Tunapande kukulahela manene Yehova omwo tulomba muka-kutupangesa atwaneko matangwa amo a kuhwima, mangana tuwaniwe ku ciwano ca citingitingi nambe ca mutambela, nambe kumulomba ngwetu atengululeko ku matangwa a kupanga mangana tuwaniwe ku biwano byoshe na kuwana simbu yaingi ya kulinga cipangi ca kwambulula. Batico nga mukulunu wa bipangi abyana byuma bitunamulombo na kututundisa bipangi? Kuma tukulahela ngwetu Yehova katuseze nambe kutumbila kuti na kukulahela ngwetu atwana byuma byoshe bitutonda ndi? (Heve 13:5) Bandolome na bandokazi babangi baje bali mu cipangi ca simbu yoshe, banalimwena mwabakwaselelemo Yehova ha simbu ibatondele bukwasi bwendi. Cili bene Yehova wapwa wa kulongwa.

17. Cisoneka muka ca mwaka wa 2022, co mwafwa bika cinaija ha simbu inapande?

¹⁷ Kutwapandele kutewa byuma bikalingiwa kulutwe mwafwa Yehova ali netu. Nga twaka Bumwene bwendi mu mutamba wa kulibanga mu kuyoya kwetu, Njambi kakatuyengula. Baka-Cibunga ca Kutwamenena banangula mukanda wa Myaso 34:10 kupwa cisoneka ca mwaka wa 2022 mangana batukwase kulibwahesela bukalu butukaliwana nabwo kulutwe na kukulahela ngwetu Yehova kakatuseze. Ou mukanda ngwawo: “Baje balemesa Shukulu Kalunga kubakajeneka cuma cacibwa na cimo cahi.”